Skarta li jtsop jbeiltasvaneje

Uni ermanoetik:

¡Jaʼ jun mukʼta matanal jtaojtik ti jbiinojtik yajrextiko Jeovae! Kichʼojbetik li sbi Mukʼul Jpas mantal ta sjunul vinajel-balumile, jun biil ti te-o sbatel osile, ti muʼyuk kʼusi xkoʼolaj-oe xchiʼuk ti stuk noʼox jeche. Xchiʼuk jaʼ stuk Jeova ti laj yakʼbutik li jbitik taje, ti jaʼ jech ojtikinbilutik-o talel leʼ xa tal ta sjabilal 1931 (Isa. 43:10). Jaʼ yuʼun, jun tajek koʼontontik ti jbiinojtik yajrextiko Jeovae.

Melel onoʼox ti tsaʼ kʼuxi xuʼ stupʼbe sbi Dios li Diabloe. Li mukʼtik lumetik ti oy ta skʼobe, spʼajojbeik ta jyalel li sbi Jeovae, xchiʼuk li Mukʼta Babilonia eke, ti jaʼ li jventainvanej yuʼun skotol jecheʼ relijionetik ta spʼejel balumile, stupʼojbeik ta Vivliaetik li sbi Dios ta skoj ti spʼajojike. Pe li Jesuse toj jelel li kʼusi la spase. Li biil taje la stoybe skʼoplal kʼalal laj yal ti jaʼ baʼyel skʼan xal ta s-orasionik li yajtsʼaklomtake: «Li voʼoxuque jaʼ jech xacʼopanic Dios chac liʼi: “Jtotic Dios, te oyot ta vinajel, ichʼbiluc ta mucʼ abi”» (Mat. 6:9). Ta tsʼakale xi laj yal xtok kʼalal la spas orasion ta sjunul yoʼontone: «Laj xa cacʼot ta otquinel [o «laj xa kakʼ ta ojtikinel abi», NM] ta stojol li viniquetic liʼi ti laj avacʼbune, jaʼ ti laj atʼuj loqʼuel ta stojol li cristianoetic liʼ ta banamile» (Juan 17:6). Ta skoj ti jaʼ ta jchanbetik li Jesuse, mas xa ta sjunul koʼontontik chkaltik batel ta spʼejel Balumil li sbi jDiostike.

Li teksto sventa sjabilal 2009, «Lek tsʼakal xichʼ cholel li lekil aʼyeje», laj stij koʼontontik ti lek tsʼakal jcholtik batel li mantale (Hech. 20:24, NM). Lek jamal xvinaj ti ep laj yakʼbe sbendision Jeova li kabteltik chlik ta septiembre yuʼun 2008 kʼalal ta agosto yuʼun 2009, yuʼun toj labal sba kʼuyelan laj yichʼ akʼel ta ojtikinel ta spʼejel Balumil sventa slekilal xchiʼuk sventa yichʼel ta mukʼ li sbi Jeovae. Kʼot ta 7,313,173 li jcholmantaletik ti koʼol la xcholik batel mantal xchiʼuk la xchanubtasik li krixchanoetik ti lek chaʼiik mantal sventa kʼuxi xuʼ stsalik batel li vokoliletik ta snuptanik jujun kʼakʼale. Li 18,168,323 ti ayik ta sNaʼobil slajel Cristoe jaʼ senyail ti oy to ep miyon krixchanoetik ti xuʼ chichʼbeik ta mukʼ sbi Jeova kʼalal skʼan toʼox xvul talel li slajeb li kʼusitik chkʼotanuk ta pasele.

Jaʼ to ti bu kʼalal xakʼ Jeovae, ta jcholtik-o batel ta sjunul koʼontontik li aʼyejetike, ta jtunestik skotol kʼusitik x-ayan sventa xkalbetik mantal skotol li krixchanoetik ta yosilal bu ta jcholtik mantale (Mat. 24:14; Mar. 13:10). Mi ta naetik, ta kaye, ta karta, ta telefono o buyuk noʼox, jpastik persa yakʼel ta ojtikinel li sbi Jeova xchiʼuk li kʼusi tskʼan tspas ta stojolal li krixchanoetik ti bu kʼalal xuʼ kuʼuntike.

Oy ep srasonal kuʼuntik ti chkaltik ti poʼot xa xchʼultajes sbi li Jeovae (Eze. 36:23). Anil xa chnopaj talel skʼakʼalil ti chichʼik lajesel skotol li buchʼutik chchopol kʼoptabeik sbi li Diose. ¡Mi kʼot skʼakʼalil taje jaʼ jun mukʼta lekilal yuʼunik li yajtuneltak Jeova ti tukʼ yakʼoj sbaik ta stojolale, ti jaʼik li buchʼutik yakʼojik ta ojtikinbel li sbie xchiʼuk ti yakʼoj sbaik ta stojolal li mukʼul pas mantal yuʼune!

Jaʼ te ivinaj ti oy ta yoʼonton chchabi steklumal Jeova li ta Mukʼta Tsobajeletik ta oxib kʼakʼal xchiʼuk li Mukʼta tsobajeletik internasional ti jaʼ sbi: «¡Viqʼuiluc me asatic!» ti laj yichʼ pasel ta jutuk mu spʼejeluk Balumil li ta sjabilal 2009. Li mukʼta tsobajeletik taje stuk xa noʼox jech echʼ li ta kʼu xa sjalil slikel talel li slumal Jeovae, yuʼun laj skoltautik xtok ta yaʼibel lek smelolal ti tsots skʼoplal ti teuk ta koʼontontik li skʼakʼalil Jeovae (Mar. 13:37; 1 Tes. 5:1, 2, 4).

Xuʼ xkaltik ta melel ti toj lek yoʼonton ta jtojolaltik li Jeovae: chakʼbutik ep muyubajel, chakʼ jkux koʼontontik ta kʼunil jobeltik, chi yikʼutik batel yoʼ bu oy lek voʼe (Sal. 23:1, 2; 100:2, 5).

Uni ermanoetik, naʼik me lek ti ep cha yakʼboxuk sbendision Jeova mi muʼyuk chavikta abaik ta yalel batel li Ajvalilal yuʼun Dios li uetik chtale.

Naʼik me ti kʼanbiloxuk tajek kuʼunkutike.

Avermanotakik,

Li Jtsop Jbeiltasvanej yuʼun li yajRextikotak Jeovae