¡Chtun mas jchanubtasvanejetik sventa chichʼ chanel yan kʼop!
1. ¿Kʼu yuʼun chichʼ chapanel kursoetik sventa xichʼ chanel yan kʼop ta buyuk noʼox jotukal balumil?
1 Li Jeovae yakʼoj sbendision sventa «lek tsʼakal xichʼ cholel li lekil [aʼyej]» ta «jujuchop [s]cʼop» li krixchanoetike (Hech. 20:24, NM; Apo. 7:9). Jech xtok, li «jʼabtel ti jun [«tukʼ», NM] yoʼnton [...], ti lec bije» ep kʼusitik stunesoj sventa xaʼiik mantal li buchʼutik chkʼopojik ta yan kʼope (Mat. 24:45). Jaʼ yuʼun, chchapan kursoetik sventa xichʼ chanel yan kʼop ta buyuk noʼox jotukal balumil. Sventa xkʼot ta pasel taje, ta xichʼ chanubtasel ep ermanoetik skotol jabil sventa xchanubtasvanik.
2. ¿Kʼu yuʼun chtun-o jchanubtasvanejetik sventa xchanel yan kʼop?
2 Li voʼob jabil echʼ xa tale, yichʼoj chanubtasel 144 ermanoetik ta 34 batsʼi kʼopetik li ta Mexicoe. Koliyal li abtelal laj spasik taje, mas ta oxlajunmil jcholmantaletik yichʼojik chanubtasel sventa chcholik mantal ta yan kʼop ti maʼuk li skʼopike. Li ta Mexicoe oy 68 batsʼi kʼopetik xchiʼuk 364 svariante. Taje chakʼ ta ilel ti ep to abtelal skʼan pasele. Jech un chaʼa, mi xa naʼ junuk batsʼi kʼope, ¿mi xuʼ xa chanbe stalelal li j-alkʼop Isaías, ti xi laj yale: «Liʼ oyun vuʼune, tacun batel», ti xie? (Isa. 6:8.) ¿Kʼusitik skʼan spasik li buchʼutik tskʼan chchanubtasvanik ta junuk batsʼi kʼope? ¿Kʼusitik van xuʼ xkoltaatik?
3. ¿Kʼusitik chichʼ kʼanel sventa li buchʼutik ch-ochik ta jchanubtasvaneje?
3 Kʼusitik skʼan pasel. Li kʼusi mas tsots skʼoplal chichʼ kʼanele jaʼ ti yijikuk ta mantale. Jaʼ yuʼun, jaʼ chichʼik tʼujel li moletik o li yajkoltaobba moletik ta tsobobbaile. Akʼo mi mu ventauk li sjabilalike, li kʼusi ventae jaʼ ti mu masuk snaʼ x-ipajike. Xuʼ mi tojol keremetik o mi nupunemik xa. Pe ti kʼusie jaʼ ti jaʼuk onoʼox skʼop ta sbikʼtale, xchiʼuk ti lekuk snaʼe. Li buchʼutik tskʼan ch-ochik ta jchanubtasvaneje, skʼan xalbeik li jkʼelvanej ta sirkuitoe, ti jaʼ tstak batel ta Betel jlik karta xchiʼuk li jtsop moletik ta tsobobbail ti bu chalbe skʼoplal stalelal li ermanoe.
4. ¿Kʼusi yabtel tspas li Betel xchiʼuk li jkʼelvanej ta sirkuito sventa xichʼ chapanel li kursoe?
4 Li yabtel tspas organisasione. Li Betele jaʼ ta skʼopon li ermanoetik ti chichʼik ikʼel ta kurso sventa tsnaʼ mi oy-o ta yoʼonton chchanubtasvanike. Ta tsʼakale ta stakan ta ikʼel ta Betel sventa xichʼik lek chanubtasel. Li Betele ta xalbe jun jkʼelvanej ta sirkuito sventa stʼuj jtsop moletik yoʼ skolta sbaik ta xchapanel li kursoe. Taje jaʼ sventa jaʼ noʼox xakʼ ta yoʼonton chanubtasvanej li buchʼu chakʼ kursoe. Li jkʼelvanej ta sirkuito xtoke jaʼ tstʼuj li buchʼutik chbatik ta chanune, taje skʼan mu xjelav mas ta 26 li jchanunetike (1 Cor. 14:40).
5. ¿Kʼusitik skʼan pasel sventa xichʼ akʼel li kursoe?
5 Li yabtel tspas jchanubtasvaneje. Li jchanubtasvaneje jaʼ chalbe jkʼelvanej ta sirkuito ta jayib ora chakʼ li chanune. Ti kʼusi chichʼ kʼanele jaʼ ti xakʼ chanubtasel jun o oxibuk ora ta xemanae, pe mu stakʼ xjalij mas ta vakib u li chanune. Pe mi xuʼ yuʼun xchanubtasvan jayibuk velta ta xemana li jchanubtasvaneje, li chanune jaʼ noʼox xuʼ xjalij jun u o mu sta.
6. ¿Kʼuxi chakʼ ta ilel sloʼil jun ermano ti chakʼbe bendision Jeova li buchʼutik ta sjunul yoʼontonik ch-ochik ta jchanubtasvaneje?
6 ¿Mi ta van xa koltavan? Yikʼaluk van oy ermanoetik mu xtojob chaʼiik ta xchanubtasvanik li ta skʼopike o ti mu noʼox snaʼ kʼusi chal chaʼiike. Akʼo mi jech, xuʼ xkoltaatik yuʼun xchʼul espiritu Jeova sventa spas yuʼunik li kʼusi tskʼan yoʼontone (Juan 14:16). Jech chakʼ ta ilel li kʼusi la stsʼiba batel ta Betel jun jchanubtasvaneje: «Ta jkʼan chkalboxuk ti muʼyuk chanunajemun jutebuke. La jchan skʼelel xchiʼuk stsʼibael vun koliyal ti laj kichʼ koltael li ta tsobobbaile. Kʼalal skʼan toʼox xkichʼ li kurso sventa yoʼ xi chanubtasvane, mu spas kuʼun chkaʼi li matanal abtelal taje. Pe koliyal li Jeovae mas xa xi tojob ta chanubtasvanej. Kʼalal yakal li chanune chkakʼ venta kʼuyelan ch-abtej li xchʼul espiritu Jeovae xchiʼuk ti kʼuyelan ch-abtej ta jtojolale. Li bu likemun tale chʼabal kʼusi mas x-ayan. Pe li yajtuneltak Jeovae jkʼulejunkutik ta mantal».
7. ¿Kʼusi xuʼ jpastik sventa xkʼot ta pasel li kʼusi ta jkʼan ta j-orasiontik ti akʼo stak tal mas jkʼajojetik ta yabtel li Jeovae?
7 Li Jeovae yakal tstakʼ li orasion ti ta jkʼanbetik ti akʼo stak tal mas jkʼajojetike (Mat. 9:38). Ta melel, tstijbe yoʼonton prekursoretik xchiʼuk jcholmantaletik sventa xbatik ti bu skʼan mas cholel mantal ta yantik kʼopetike. ¿Mi oy ta avoʼonton cha chanubtas li buchʼutik tskʼan chchan akʼope? Mi jeche, naʼo me ti ep chakʼbot sbendision Jeova mi chavakʼ avipe (Mal. 3:10).