«Oyuc slequil» koʼontontik
1. ¿Kʼusi ti chtun xa tajek yuʼunik li krixchanoetike?
1 Muʼyuk jech ilbil-o ti toj ep krixchanoetik tskʼanik koltaele. Ta skoj li kʼusitik xibal sba chkʼotanuk ta pasel ta spʼejel Balumile ch-ipajik ta at-oʼonton, muʼyuk xmuyubajik xchiʼuk muʼyuk xa kʼusi spat-o yoʼontonik. Li yajtsʼaklomutik Cristoe jnaʼojtik ti ta smiyonal xa noʼox krixchanoetik ti tskʼanik koltaele, xchiʼuk ti oy ta jbatik skoltaelik ta slekil koʼontontike (Mat. 22:39; Gál. 6:10). Jkʼeltik kʼuxi xuʼ xkakʼbetik yil slekil koʼontontik ta melel li jchiʼiltaktike.
2. ¿Kʼuxi xuʼ xkakʼtik ta ilel li slekil koʼontontike?
2 Jun abtelal ti ta slekil koʼonton ta jpastike. Li buchʼu noʼox xuʼ spat koʼontontike jaʼ li Diose (2 Cor. 1:3, 4). Li Jeovae chalbutik ti «oyuc slequil» koʼontontik jech kʼuchaʼal li stuke xchiʼuk ti jcholbetik li lekil aʼyejetik ta sventa li Ajvalilal yuʼun Dios li jlakʼnataktike (1 Ped. 3:8). Kʼalal ta jcholilantik li mantale xuʼ jpatbetik yoʼonton «li bochʼotic oy svocolique», yuʼun li Ajvalilal yuʼun Diose jaʼ noʼox xuʼ yuʼun tslajes ta melel li vokolile (Isa. 61:1). Ta skoj ti oy slekil yoʼonton ta stojolal li yajtuneltake, li Jeovae ta slajes li choplejale xchiʼuk ta xakʼ ti oyuk jun achʼ Balumile (2 Ped. 3:13).
3. ¿Kʼuxi xuʼ jchanbetik stalelal Jesús ta sventa ti kʼuyelan chil li krixchanoetike?
3 Jechuk xkiltik li krixchanoetik jech kʼuchaʼal laj yil Jesuse. Kʼalal laj xcholbe mantal epal krixchanoetik li Jesuse toj ep sbalil laj yil ta jujuntal. Yuʼun snaʼoj li kʼusi chtun yuʼunik ta mantal ta jujuntale xchiʼuk jaʼ tijbat-o yoʼonton ti ta slekil yoʼonton la xchanubtasane, xchiʼuk kʼuxubaj ta yoʼonton ti xkoʼolajik kʼuchaʼal chijetik ti muʼyuk buchʼu xkʼelatike (Mar. 6:34). Mi ta jchanbetik stalelal li Jesuse, ta me stij koʼontontik ta melel ti xkakʼtik ta ilel li slekil koʼontontike, te chvinaj ta jsatik xchiʼuk ta jkʼopojeltik. Jech xtok baʼyuk chkakʼ ta jkuxlejaltik li xcholel mantale xchiʼuk ti jaʼ chkalbetik li kʼusi chtun yuʼun li buchʼu chaʼibutike (1 Cor. 9:19-23).
4. ¿Ku yuʼun skʼan jlaptik li xkʼuxul slekil oʼontonale?
4 Ta smilal noʼox krixchanoetik ta spʼejel Balumile, lek xa chaʼiik li mantal ta sventa li Ajvalilal yuʼun Dios ti tspat oʼontonale xchiʼuk ti chkakʼtik ta ilel ti oyik ta koʼontontik ta melele. Kʼalal ta jlaptik li xkʼuxul slekil oʼontonale, yakal me chkichʼtik ta mukʼ li jkʼanvanej Dios kuʼuntike, ti jaʼ li Jeovae (Col. 3:12).