Mu ikʼuk noʼox jmajtik
1. ¿Kʼuxi xuʼ te tsakal skʼoplal cholmantal li kʼusi chal ta 1 Corintios 9:26?
1 Li jtakbol Pabloe xi la stsʼibae: «Li vuʼune [...] chcacʼ persa chiʼanilaj [...] pero muc vovil aniluc noʼox ta jpas batel. Tsots ta xcacʼ majel, pero muc icʼuc noʼox ta jmaj» (1 Cor. 9:26). Li kʼusi skʼan laj yal li Pabloe jaʼ ti oy ta yoʼonton tskʼan tsta li kʼusitik ta sventa mantale. Li beiltasel taje xuʼ jtunestik xtok sventa li kʼuyelan ta jcholtik mantale. Yuʼun ta jkʼantik ti lekuk kʼusitik xkʼot ta pasel yuʼun li «majel» o li kiptik chkakʼtike. ¿Kʼuxi xuʼ jpastik taje?
2. ¿Kʼuxi xuʼ jchanbetik Pablo xchiʼuk li jchʼunolajeletik ta baʼyel siglo kʼalal ta jkʼeltik lek jayib ora xchiʼuk bu ta jcholtik mantale?
2 Batik ti bu oy li krixchanoetike. Li Pablo xchiʼuk li yan jcholmantaletik ta baʼyel sigloe jaʼ te chbat xcholik mantal ti bu snaʼojik oy krixchanoetike (Hech. 5:42; 16:13; 17:17). Mi jaʼ mas te oy ta snaik ta ikʼ osil li krixchanoetik bu ta jcholtik mantale, xuʼ van mas lek ti jaʼo jcholtik mantal li ta naetike. ¿Ta jayib ora chnoj li chʼivit bu chacholik mantale? Ti jcholtik mantal ta kayeetik li vaʼ orae xuʼ van mas lek jcholtik mantal.
3. ¿Kʼuxi xuʼ jtunes lek kiptik sventa lek xkabtelantik li bu ta jcholtik mantale?
3 Kabtelantik lek li yosilal cholmantale. Yan ti kʼuyelan xuʼ lek jtunestik li kiptik ta cholmantale jaʼ ti xkabtelantik lek li bu ta jcholtik mantale. Jech kʼuchaʼal liʼe, kʼalal ta jun noʼox yavilik chichʼik takel batel epal jcholmantaletike, mas me skʼan xchʼakbeik yorail xchiʼuk xakʼik persa sventa lekuk chapalik kʼusi tspasik xchiʼuk ti oyuk bu chcholik lek mantale. ¿Mi mu masuk van lek ti xichʼik chʼakele? Kʼalal ta jcholtik mantal ta parajeetike, mas me sujom xchiʼuk mas me ep ta jtatik ta chiʼinel ta loʼil krixchanoetik mi oy noʼox spʼisol li kʼu kepaltik ta jujukot karoe. ¿Mi xuʼ van jkʼantik junuk yosilal cholmantal ti te noʼox nopol ta jnatik sventa mu persauk bu nom xijbate? Mi jech ta jpastike muʼyuk xa ch-echʼ ora kuʼuntik sventa xijkʼot.
4. ¿Kʼusi xuʼ jpastik sventa lek «chbat [jsaʼtik] tal cristianoetic»?
4 Li Jesuse laj yal ti «chbat [saʼik] tal cristianoetic» li yajtsʼaklomtake (Mar. 1:17). Li buchʼu xtojob lek ta stsakel choye maʼuk noʼox tsjip ochel stsakobil xchoy ta yut voʼ, moʼoj, yuʼun chakʼ persa sventa stsak li choye: tsabe lek yorail xchiʼuk yavil sventa tsta xchiʼuk chlik saʼ ta anil. Ta melel, lek tstunes li yipe. Jechuk me jpastik ek kʼalal ta jcholtik mantale (Heb. 6:11).