Aʼyejetik

◼ Vunetik ta xichʼ akʼel ta marso: livro Chchanubtasvan. Akʼo persa slikesel chanubtaseletik ta Vivlia li ta sba velta vulaʼale. Mi oy xa slivro li krixchanoe, pe mu skʼan xchʼam junuk chanubtasele, akʼbo jlikuk revista ti mas pokoʼik jutuke o junuk foyeto ti chkʼot ta yoʼontone. Avril: ¡Despertad! xchiʼuk Li Jkʼel osil ta toyole. Mi kʼot ta yoʼonton mantal li krixchanoe akʼbo li tratado Li kʼusi melele xchiʼuk akʼbo yipal slikesel junuk chanubtasel ta Vivlia. Kʼalal chbat avulaʼan li buchʼutik ayik ta Snaʼobil slajel Cristo o ta yan tsobajeletik ti tsotsik skʼoplal ti maʼukik to yajrextiko Jeovae, akʼbo yipal slikesel junuk chanubtasel ta Vivlia xchiʼuk li livro Chchanubtasvan[e]. Mayo: foyeto Cha vamikoin xchiʼuk Li Vivliae, ¿kʼusitik chalbe skʼoplal?

◼ Li Snaʼobil slajel Cristoe chkʼot ta jueves 5 yuʼun avril ta 2012. Mi oy atsobajelik ta juevese, skʼan me xajelbeik skʼakʼalil sventa xokoluk xkom li Salone. Yan ti mi mu kʼusi xavutik ta sjelbel skʼakʼalile xchiʼuk ti muʼyuk ch-echʼ li Tsobajel sventa Tunelale, vaʼun bi li kʼusitik toj jtunel sventa tsobobbail ti ch-echʼ ox li ta tsobajel taje xuʼ jaʼ to xichʼ jelubtasel ta yan xemana ta Tsobajel sventa Tunelal.

◼ Li ta yan uetik chtale ta xichʼ kʼelel li video Los jóvenes preguntan... ¿Cómo conseguir amigos verdaderos? xchiʼuk Los jóvenes preguntan... ¿Qué haré con mi vida? Mi muʼyuk avuʼune kʼano xa noʼox li ta atsobobbaile.

◼ Jaʼ jun muyubajel chavichʼik albel ti chlik xa lokʼuk ta garífuna kʼop li revista Li Jkʼel osil ta toyole, chlik lokʼuk sventa li 1 yuʼun avrile. Li kʼop taje tstunesik ta Belice, Honduras, Guatemala xchiʼuk ta Nicaragua. Chichʼ talel mantaletik sventa chichʼ chanel ta tsobobbail xchiʼuk junantik sventa skotol krixchanoetik. Jech oxal xuʼ xichʼ akʼel komel ta cholmantal. Ximuyubaj chkalbotkutik xtok ti ta yuilal avril ta 2012 chlik lokʼuk Kabteltik sventa Dios ta batsʼikʼop mazateco. Li kʼop taje tstunesik ta México.