Skarta li Jtsop Jbeiltasvaneje
Kuni ermanotak:
Li Jtotik ta vinajel ti jaʼ li Jeovae, jaʼ stalelal ti chkʼanvane. Jaʼ yuʼun xi chal li Vivliae: «Li Diose jaʼ stalel ta xcʼanvan o» (1 Juan 4:8). Akʼo mi Skotol xuʼ yuʼun, li ta Vivliae muʼyuk chal «ti jaʼ juʼelal li Diose». Ti kʼuyelan ch-ajvalilaje jaʼ ta skoj ti chkʼanvane, taje jaʼ li kʼusi mas chijnopaj-o ta stojolale.
Chijmuyubaj yuʼun ti muʼyuk onoʼox tsujutik sventa xijtun ta stojolal li Jeovae. Maʼuk jun ajvalil ti tsots tspasvan ta mantale. Jaʼ yuʼun, tskʼan ti xijtun ta stojolal ta skoj ti jkʼanojtike ti chlokʼ ta koʼontontike. Jaʼ jech chkakʼbetik yil ti ta jkʼantik jaʼ tsventainutike, yuʼun jchʼunojtik ta melel ti tukʼ xchiʼuk ta slekil yoʼonton ch-ajvalilaje. Taje jech onoʼox vinajem ti kʼu xa sjalil likem talel xkuxlejal li krixchanoetike.
Li Adán xchiʼuk Evae muʼyuk laj yichʼik sujel sventa xchʼunbeik li smantal Jeovae, yuʼun akʼbat stʼuj stukik li kʼusi tskʼan tspasike. Ti skʼanojikuk ta melel li Jeovae xchiʼuk ti tstojbeikuk ta vokol li kʼusi spasoj ta stojolalike muʼyuk xakʼ ti xtijbat yoʼontonik yuʼun Satanás sventa stoy sbaik ti jechuke.
Kʼalal echʼ xaʼox kʼuk sjaliluke, xi laj yalbe komel mantal j-israeletik li Moisese: «Aʼyo avaʼyic, liʼ ta orae chacacʼboxuc atʼujic li cʼusi chacʼanique: ¿me jaʼ li cuxlejale xchiʼuc lequilale, o me jaʼ li lajel, xchiʼuc cʼusitic chopole?» (Deut. 30:15). Li j-israeletike jaʼ tstʼuj stukik ti kʼuyelan tskʼan chkuxiike. Xi laj yalbe j-israeletik li Josué eke: «Me mu xacʼan jaʼ xatunic yuʼun li Mucʼul Diose, tʼujic ta ora bochʼo chacʼan chatunic yuʼun». Xi la stakʼbeik Josué li j-israeletike: «Mu xcʼot ta pasel ta jcomtsancutic li Mucʼul Diose» (Jos. 24:15, 16). Jech chkaʼi jbatik ek. Jkʼanojtik li Jeovae xchiʼuk mu xkʼot-o chkaʼitik ti jnoptik ti chijnamaj ta stojolale.
Xkaʼibetik lek smelolal ti kʼusi smakoj ti xuʼ jnop jtuktik li kʼusi ta jkʼan ta jpastik ti jaʼutik yajtsʼaklom Cristoe. Akʼo mi oy yabtelik sventa stojobtasutik xchiʼuk stukʼibtasutik li moletik ta tsobobbaile, muʼyuk tsujvanik sventa jech jpastik o ti jchʼuntik kʼuchaʼal chalike. Xi la stsʼiba li jtakbol Pabloe: «Mu yuʼunuc ta jcʼan vuʼun yajvalun xchʼunojel avoʼntonic chicʼot. Jaʼ noʼox ta jcʼan ta jcoltaoxuc, yuʼun jech xcuxet noʼox avoʼntonic. Yan li xchʼunojel avoʼntonic ta stojol Cajvaltique jnaʼoj ti staoj yav achʼunojic oe» (2 Cor. 1:24).
Mas ta jkʼupintik mi chlokʼ ta koʼontontik spasele, jaʼ mu sta mi ta sujel ta jpastike. Li Jeovae tskʼan ti jpastik kʼusitik lek ta skoj ti chijkʼanvane. Taje tsots skʼoplal ti jech jpastike, yuʼun xi la stsʼiba li Pabloe: «Acʼo me xuʼ cuʼun ta jqʼuelan scotol cʼusitic oy cuʼun, acʼo me xuʼ cuʼun ta jqʼuelan jbecʼtal sventa chichʼ chiqʼuel ta cʼocʼ, pero me mu xicʼanvane, muʼyuc cʼusi jtu o» (1 Cor. 13:3).
Kʼalal chil Jeova ti epal miyon ermanoetik chtunik ta stojolal ta skoj ti skʼanojik ta melele, jaʼ yichʼel ta mukʼ xchiʼuk jaʼ chmuyubaj-o li Jeovae.
Li Jeova eke skʼanoj tajek skotol li yajtuneltake. Taje te tsakal akʼoplalik voʼoxuk ololetik xchiʼuk kerem tsebetik ti jaʼ akʼanojik li Jeovae ti maʼuk li kʼusitik oy ta balumile. Xuʼ xachʼunik ta melel ti kʼanbiloxuk tajek kuʼunkutike (Luc. 12:42, 43).
Ta skoj ti akʼanojik li Jeovae kermanotakutik, li echʼ jabile 1,748,697,447 ora la acholik mantal. Jech xtok, ta skoj li kʼanelale li 7,782,346 jcholmantalutike la jcholtik mantal ta spʼejel Balumil. Xijmuyubaj tajek, yuʼun ti 268,777 laj yakʼ xkuxlejalik ta stojolal Jeova xchiʼuk laj yichʼik voʼ ti te kapal skʼoplalik ek li epal kerem tsebetike. Taje jaʼ skʼan xal ti te van 5,168 laj yichʼik voʼ li ta jujun sabado xchiʼuk domingoe. ¡Taje chijmuyubaj tajek yuʼun!
Li avi ti kuxulutik ta slajebal kʼakʼale oy onoʼox jvokoltik, kʼopetik, chkichʼtik nutsel, chij-ipaj xchiʼuk oy bakʼintike jaʼ ta skoj li malubele. Pe mu onoʼox bu chijlubtsaj, mi jaʼuk chkakʼtik ti oy kʼusi tsmakutik ta bee. Naʼik me ti kʼanbiloxuk tajek kuʼunkutike (Heb. 10:39; 2 Cor. 4:16).
Avermanotakik,
Li Jtsop Jbeiltasvanej yuʼun Stestigotak Jeovae