Skarta li Jtsop Jbeiltasvaneje
Kuni chiʼiltak ta abtel:
¡Ximuyubajkutik tajek ti ta tak tal jkartakutik ta slikebal li jabil ti toj tsots skʼoplale! Yuʼun kʼalal mu to chlaj li jabil 2014, lokʼ xaʼox me 100 jabil ti lik ta Ajvalil ta stojolal yajkontratak li Jesucristo ti jkʼanojtik tajeke (Sal. 110:1, 2).
Li ta tsobajel ch-echʼ ta jujun jabil ta Watch Tower Bible and Tract Society of Pennsylvania, ti echʼ ta slikebal li kabteltik chlik ta septiembre yuʼun 2013 kʼalal ta agosto yuʼun 2014, te la slokʼesik achʼ Vivlia ta inglés ti la skʼelik lek li Komite sventa Traducción del Nuevo Mundo ti toj lek jelubtasbil sventa xchanik li krixchanoetike. Oy xa mas ta 60 jabil stunesoj tal stʼujbil nichʼnab li Jeovae sventa xakʼbutik li Traducción del Nuevo Mundo sbie (Rom. 8:15, 16). Jaʼ yuʼun, ¿mi mu toj labaluk sba chavil ta skoj taje?
Oy xa onoʼox ta sjayibal jabil ti jaʼ yakʼoj tal ta yoʼontonik ti xichʼ lek jelubtasel Vivlia li Komite sventa Stsʼibael vunetik li ta Jtsop Jbeiltasvaneje. Li avie chlokʼ xa mas ta 121 jeltos kʼopetik li Traducción del Nuevo Mundo ta sliklejal o ta jvokʼ noʼoxe. Ta jtijkutik avoʼontonik sventa xavakʼbeik yil Jeova ti chatojbeik ta vokol li Avivliaike. Kʼelik skotol kʼakʼal xchiʼuk nopbeik smelolal, vaʼun jech chanopajik mas ta stojolal li Buchʼu yakʼoj ta naʼele, li Jeova Diose (Sant. 4:8).
Toj chopol chkaʼikutik ti oy bu tsots chil svokol li kermanotaktik ti jkʼanojtik tajeke. Jaʼ yuʼun xkaʼibekutik smelolal ti toj tsots chavaʼiik ti jmoj xa xamuyubajik xchiʼuk li kermanotaktike. Jaʼ jech laj yil svokolik jun utsʼ alalil ta Asia ti jel-o xkuxlejalike, yuʼun ta jech noʼox lik alubuk sjunul sbekʼtal li meʼile. Mu xa snaʼ kʼusi tspas laj yaʼi li doktoretike, yuʼun muʼyuk kʼusi stakʼ utel laj yilik. ¡Toj abol xa noʼox sbaik! Jech oxal, sjunul kʼakʼal xchiʼuk sjunul akʼobal chchabiat yuʼun li smalale xchiʼuk jaʼ jech toj lek stalelalik ek li skerem xchiʼuk li chaʼvoʼ stsebe, yuʼun toj lek ti kʼu yelan tskolta li stot smeʼike. Jech kʼuchaʼal li utsʼ alalil ti toj lek stalelal taje, ep xa vokolil kuchem avuʼunik ek, vaʼun xkuxet noʼox me avoʼontonik kʼalal tstsʼik avuʼunik skotol li prevaetik chkiltik ta skoj li xchʼunel koʼontontike (Sant. 1:2-4). Mi jaʼutik tʼujbil yajtsʼaklomtak Cristo o mi jaʼutik li yan chijetike yalojbutik Jeova ti xijmuyubaj noʼox ta tsʼakal ta skoj ti chkuch kuʼuntik prevaetike, ¡yuʼun chakʼbutik jkuxlejaltik sbatel osil! (Sant. 1:12.)
Ayik mas ta 19,241,252 li ta Snaʼobil slajel Cristo echʼ jabile. ¡Batsʼi tspat tajek koʼontontik ti toj ep buchʼutik ay yichʼik ta mukʼ Jeova xchiʼuk Jesucristo li ta tsobajel ti mas tsots skʼoplal chaʼi li steklumal Diose! ¡Jaʼ jech tspat tajek koʼontontik xtok ti tunik ta prekursor auksiliar mas ta chib miyon ermanoetik li ta marso xchiʼuk avrile! Jech xtok, xijmuyubaj noʼox ta skoj ti xuʼ xa x-ochik ti kʼu sjalil ch-echʼ tsobajel sventa prekursor kʼalal chtal ta vulaʼal li jkʼelvanej ta sirkuito li buchʼutik jaʼo chtun ta prekursor auksiliare, akʼo mi maʼuk ta marso o ta avril. Jaʼ jech ta melel, li buchʼutik pʼijik ta mantale snaʼojik ti toj tsots skʼoplal ti xkakʼ ta koʼontontik li cholmantale xchiʼuk li kʼusitik yan skʼan jpastik ta tsobobbaile. Yuʼun jaʼ tskoltautik sventa tsotsukutik ta mantal xchiʼuk ti junuk-o kaviltike, vaʼun jaʼ jech tstsal kuʼuntik li kʼusitik tspas Diablo sventa tskʼunibtas li xchʼunel koʼontontike xchiʼuk ti chchʼayutik yaʼi ta bee (1 Cor. 15:58).
Maʼuk noʼox taje, yuʼun xkuxet koʼontontik yuʼun xtok li 277,344 ti laj yakʼ sbaik ta stojolal Dios xchiʼuk ti laj yichʼik voʼe; ti jaʼ xa stamojbeik batel sbelel li kuxlejal kʼuchaʼal li yan ermanoetik ta spʼejel Balumile (Mat. 7:13, 14). Skʼanik me koltael li buchʼutik achʼ to ochik ta mantal sventa oyuk lek snakleb li xchʼunel yoʼontonike (Col. 2:7). Jaʼ yuʼun chaʼa, mu me xkikta jbatik ti ta jpatbe jba koʼontontik jaʼ to mi tal li slajebale (Mat. 24:13). Xi chalbutik mantal li Vivliae: «Coltaic me li bochʼotic aluben noʼox chaʼyique. Mu me xʼechʼ avoʼntonic; talbat xacolta abaic» (1 Tes. 5:14). Jaʼ yuʼun, mu me xkikta jbatik ta skʼanel ta j-orasiontik liʼe: «Akʼo taluk li Ajvalilal avuʼune» (1 Tes. 5:17; Mat. 6:10, TNM).
Jpatoj koʼontonkutik ti chakʼupinik skʼelel li Anuario 2014. Mu me xchʼay ta ajolik ti jkʼanojotkutike, yuʼun akʼanojik li Jeovae.
Avermanotakik,
Li Jtsop Jbeiltasvanej yuʼun Stestigotak Jeovae