Jchanbetik li xchʼunel yoʼontonike
1. ¿Kʼusi vunal chlik jchantik ta Xchanel Vivlia ta Tsobobbail li ta xemanail 19 yuʼun oktuvree?
1 Li ta xemanail 19 yuʼun oktuvre ta 2015 chlik jchantik ta Xchanel Vivlia ta Tsobobbail li livro Jchanbetik li xchʼunel yoʼontonike. Li livro liʼe chalbe skʼoplal chanlajunvoʼ viniketik xchiʼuk antsetik ti tukʼ yoʼonton echʼike. Kʼalal mi la jkʼeltike, xuʼ me kuxul xkiltik li buchʼutik te chalbe sloʼilal mi la jnopbetik skʼoplal li kʼusitik vokol laj yaʼiik spasele xchiʼuk li vokoliletik la snuptanik ta skoj ti tukʼ laj yakʼ sbaik ta stojolal Jeovae. Jech xtok, oy kʼusi chakʼ jchantik ti toj jtunel ta jkuxlejaltike (Ev. 6:12).
2. Alo jlomuk kʼusitik yichʼoj tal li livro Jchanbetik li xchʼunel yoʼontonike.
2 Li kʼusitik yichʼoj li livroe. Oy chaʼtos kʼusi yichʼoj tal ti toj jtunelike, li baʼyele jaʼ ti lek chchol kʼusi ta jabilal kuxiik li krixchanoetik ti chalbe skʼoplal Vivliae, li xchibale jaʼ ti yichʼoj tal mapaetike, taje tskoltautik snaʼel bu kuxiik xchiʼuk kʼusi jabilal. Li ta jujun kapituloe yichʼoj tal «Sjakʼobiltak sventa jnopbetik skʼoplal», ti tskoltautik sventa jnopilantik li loʼiletike xchiʼuk ti xkakʼ ta jkuxlejaltik li kʼusi la jchantike. Jech xtok, yichʼoj tal kʼupil sba lokʼoletik ti solel lek pasbil sventa teuk xa xkaʼi jbatik li ta loʼiletike.
3. ¿Kʼuxi xuʼ jtabetik lek sbalil kʼalal mi lik jchantik li livroe?
3 Kʼuxi xuʼ jtabetik lek sbalil. Li ta «Skarta li Jtsop Jbeiltasvaneje», ti te chvinaj ta pajina 2 li ta livroe, xi chalbutike: «Tuneso anopben sventa xakʼel xchiʼuk xavaʼi li kʼusitik la snuptanik li buchʼutik chkalbetik skʼoplale, vaʼun nopo kʼusi van la apas jechuk li ta jujutos kʼusitik la snuptanike». Pe kʼalal ta jtunes li jnopbentike maʼuk me skʼan xal ti ta jnop jtuktik kʼusi skʼan xal li loʼiletik ta Vivliae; moʼoj, yuʼun skʼan teuk xa xkiltik xchiʼuk voʼotikuk xa xkaʼi jbatik li ta kʼusi la snuptanike. Sventa spas kuʼuntike skʼan me jchʼakbetik yorail yoʼ jnopilanbetik skʼoplal (Neh. 8:7, 8). Mi ta oʼlol kapitulo laj yichʼ likesel xchanel li livroe, li ermano ti jaʼ oy ta sba yetʼesele ta svules ta joltik li kʼusi laj yichʼ chanel li echʼ xemanae; pe mu me sta jun minuto. Jech xtok xuʼ sjakʼ jun o chibuk sjakʼobil mi ta oʼlol kapitulo kechel chkome, ta skoj ti muʼyuk yichʼoj tal li «Sjakʼobiltak sventa jnopbetik skʼoplal».
4. ¿Kʼu yuʼun toj jtunel ti jchantik li livro Jchanbetik li xchʼunel yoʼontonike?
4 Li sbalumil Satanase yakʼoj persa jujun kʼakʼal sventa tskʼunibtas li xchʼunel koʼontontike o ep kʼusitik tstunes sventa tslajes ta jyalel. Li ta livro liʼe xchiʼuk li yan mantaletik chlokʼ li ta revista Li Jkʼel osil ta toyole, ti «Jchanbetik li xchʼunel [yoʼonton]» sbi eke, jaʼ jun matanal yakʼoj Jeova sventa stsatsubtas li xchʼunel koʼontontike (Sant. 1:17). Jaʼ yuʼun jtabetik me lek sbalil kʼalal mi lik jchantik ta Xchanel Vivlia ta Tsobobbail li livro taje xchiʼuk kakʼ me jloʼiltik.