LI JKUXLEJALTIKE
Jpakbetik skʼoplal li stukʼil mantaltak Jeovae
Jaʼ chal stuk Jeova li mantaletik ta sventa jtalelaltike. Jech kʼuchaʼal liʼe, laj yal ti jaʼ sventa sjunul xkuxlejalik kʼalal chnupun li jun vinik xchiʼuk jun antse (Mt 19:4-6, 9). Toj chopol chil li jeltos mulivajele (1Ko 6:9, 10). Maʼuk noʼox taje, kʼuchaʼal yajtunelutike chalbutik mantal ta sventa ti kʼu yelan skʼan jlap jkʼuʼ jpokʼtike xchiʼuk ti kʼu yelan skʼan jmeltsan jbatike, vaʼun jaʼ mu xijkoʼolaj-o kʼuchaʼal li yan krixchanoetike (Dt 22:5; 1Ti 2:9, 10).
Li avie ep krixchanoetik mu skʼan xchʼunbeik smantal li Jeovae (Ro 1:18-32). Ta skoj li kʼusitik achʼ chlokʼ tale, jaʼ xa jech stalelalik, tslap skʼuʼ spokʼik xchiʼuk tsmeltsan sbaik li krixchanoetike. Xtoyet xa chaʼi sbaik ta skoj li mulivajel tspasike xchiʼuk chchopol kʼoptaik li buchʼutik mu jechuk tspas kʼuchaʼal stukike (1Pe 4:3, 4).
Li stestigoutik Jeovae skʼan me tsotsuk koʼonton jpakbetik skʼoplal li smantaltak ta sventa li jtalelaltike (Ro 12:9). ¿Kʼuxi ta jpastik? Jaʼo kʼalal ta slekil koʼonton chkalbetik yantik li kʼusi lek chil Diose xchiʼuk ti kʼalal chkakʼ ta jkuxlejaltike. Jech kʼuchaʼal liʼe, kʼalal ta jnoptik ti kʼu yelan ta jlap jkʼuʼ jpokʼtik xchiʼuk ti kʼu yelan ta jmeltsan jbatike, xiuk me jakʼbe jbatike: «¿Buchʼu yakal ta jchʼunbe smantal: mi jaʼ li Jeovae o mi jaʼ li balumile? ¿Mi jamal xvinaj ta jpat jxokon ti jaʼ yajtunelun Diose?». Jech xtok, kʼalal ta jnop kʼusi ta jkʼeltik ta television o junuk pelikulae, skʼan me jnoptik kʼu van yelan chil li Jeovae, mi lek kʼusi chakʼ jchantik xchiʼuk mi xuʼ van skʼunibtasutik ta mantal (Sl 101:3). ¿Kʼu van yelan chil kutsʼ kalaltik xchiʼuk yan krixchanoetik li kʼusi ta jkʼeltike? (1Ko 10:31-33).
¿Kʼu yuʼun toj tsots skʼoplal ti jpakbetik skʼoplal li smantaltak Jeova ta sventa li jtalelaltike? Yuʼun poʼot xa xakʼbe slajeb lumetik xchiʼuk choplejal li Jesukristoe, pe jaʼ noʼox me kuxul chkomik li buchʼutik chchʼunbeik smantal Diose (Eze 9:4-7; 1Jn 2:15-17). Jaʼ yuʼun chaʼa, jpʼeluk me ta koʼontontik spakbel skʼoplal li smantaltak Jeovae, yuʼun kʼalal chil jlekil talelaltik li krixchanoetike ta me xkakʼtik ta ichʼel ta mukʼ li Diose (1Pe 2:11, 12).
¿Mi jamal xvinaj ta jtalelal ti jaʼ yakal ta jchʼunbe smantal li Diose?
KʼALAL MI LAJ AKʼELIK LI VIDEO PASO TA AVAMIGO LI JEOVAE: JUN ANTS XCHIʼUK JUN VINIK, TAKʼIK LI SJAKʼOBILTAK LIʼE:
¿Kʼu yuʼun skʼan jchʼunbetik smantal li Jeovae?
¿Kʼu yuʼun ta sbikʼtal noʼox skʼan xakʼbeik xchan smantaltak Jeova yalab xnichʼnabik li totil meʼiletike?
Mi kerem tsebutik o mi mol meʼelutik xae, ¿kʼu yelan xuʼ jkoltatik li krixchanoetik sventa stabeik sbalil li slekil yoʼonton Diose?