Mu xaxiʼ yuʼun li kʼusi chtal ta tsʼakale

Poʼot xa xlaj smalael yuʼun Jeova ta stojolal li krixchanoetike. Mi kʼot yorail taje, chichʼ lajesel li jecheʼ relijionetike, li steklumal Diose chichʼ tsakel ta kʼop yuʼun jtsop jteklum, vaʼun li Jeovae tslajes ta Armajedon skotol li chopol krixchanoetike. ¡Oy xa tajek ta koʼontontik ti xkʼot ta pasel taje!

Ep to kʼusitik mu jnaʼtik ta sventa li mukʼta tsatsal vokolile. Jech kʼuchaʼal liʼe, mu jnaʼtik lek kʼusi kʼakʼalil chlik. Mu jnaʼtik xtok kʼu yuʼun chbat stsakik ta kʼop jecheʼ relijionetik li ajvaliletike. ¿Kʼu sjalil chichʼ tsakel ta kʼop li steklumal Jeovae xchiʼuk kʼusitik chichʼik pasbel? ¿Kʼusi tspas Jeova sventa xakʼbe slajeb chopol krixchanoetik li ta Armajedone?

Muʼyuk me srasonal sventa xijxiʼ yuʼun li kʼusitik chtal ta tsʼakale, yuʼun sventa junuk noʼox koʼontontike, li Vivliae chalbutik li kʼusitik chkʼotanuk ta pasele. Jech kʼuchaʼal liʼe, jnaʼojtik ti kuxulutik «ta slajebal xa kʼakʼale» (2Ti 3:1). Jech xtok, sventa mu xlaj-o skʼoplal li melel relijione, «chichʼ jutukajesbel skʼakʼalil» ti kʼu sjalil chichʼ lajesel li jecheʼ relijionetike (Mt 24:22). Jpʼel ta koʼontontik ti tspoj steklumal li Jeovae (2Pe 2:9). Jnaʼojtik xtok ti oy buchʼu stʼujoj Jeova ti tukʼ xchiʼuk ti oy sjuʼel sventa xakʼbe slajeb li buchʼu toj chopolike xchiʼuk ti tspoj li epal krixchanoetik ta Armajedone (Ap 19:11, 15, 16).

Kʼalal chkʼot ta pasel skotol taje, li krixchanoetike «chbat xchʼulelik ta xiʼel» (Lu 21:26). Pe li voʼotike muʼyuk chijxiʼ. Mi la jchantik xchiʼuk mi la jnopbetik skʼoplal ti kʼu yelan la spoj steklumal Jeova ta voʼnee xchiʼuk li kʼusi yaloj ti chkʼot ta pasel ta tsʼakale, jpʼel me ta koʼontontik ta jpastik li kʼusi xi chal ta Lukas 21:28: «Tukʼ xavaʼiik xchiʼuk toyo muyel asatik, yuʼun nopol xa li akolebalike».