¿Mi anaʼoj xa?

¿Kʼu yuʼun lek ti albatik yuʼun Jeova li j˗israeletik ti xuʼ xakʼik tortola o paloma ta smotone?

LI MANTAL akʼbat yuʼun Jeova li Moisese chal ti xuʼ xakʼik ta matanal jkotuk tortola o palomae. Kʼalal chichʼ albel skʼoplal li matanaletik chichʼ akʼele, jmoj chichʼ albel skʼoplal li mutetik taje. Jaʼ yuʼun, li j˗israeletike xuʼ xakʼik ta matanal jkotuk tortola o jkotuk paloma (Lev. 1:14; 12:8; 14:30). Toj lek ti jech laj yichʼik albele, yuʼun bakʼintike, vokol ta tael li tortolaetike. Jkʼeltik batel kʼu yuʼun.

Li tortolaetike te oyik ta Israel kʼalal jaʼo mas kʼixine. Pe li ta yuilal oktuvre ti jaʼo otonyoe, chvilik batel ta yan lumetik ti bu mas kʼixine. Vaʼun, jaʼ to tsutik talel ta Israel li ta primaverae (Kant. 2:11, 12; Jer. 8:7). Jaʼ yuʼun, li ta yorail siktike, li j˗israeletike vokol chaʼiik stael tortolaetik sventa xakʼbeik ta smoton li Jeovae.

Pe li palomaetike mu snaʼ sjel yavilik, jaʼ yuʼun oy ta tael palomaetik ta Israel ta sjunul jabil. Jech xtok, oy tstsʼunik li j˗israeletike (koʼoltaso xchiʼuk Juan 2:14, 16). Jlik livro chal ti te ta nopol Israele «li krixchanoetike stsʼunoj spalomaik. Sjomoj li skʼal snaik o spakʼbal snaik sventa te xnaki li palomaetike» (koʼoltaso xchiʼuk Isaias 60:8).

¿Kʼusi chakʼ jchantik ta stojolal Jeova liʼe? Ti jaʼ jun jkʼanvanej Diose xchiʼuk ti snaʼ stsakvan ta ventae, yuʼun la xchʼam li mutetik ti xuʼ tstaik ta sjunul jabil li j˗israeletike.