¿Mi xvul ta ajol?
¿Mi akʼupinoj skʼelel Li Jkʼel˗osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:
¿Kʼusi sbalil ta jtabetik mi ta jchʼakbetik yorail sventa jchiʼintik ta loʼil li Jeovae, mi ta jchikintatik li kʼusi chalbutike xchiʼuk mi ta jnopbetik skʼoplale?
Mas lek kʼusitik chkʼot ta nopel kuʼuntik, mas chijtojob ta chanubtasvanej, mas to tstsatsub li xchʼunel koʼontontike xchiʼuk mas to ta jkʼantik li Jeovae (w22.01, paj. 30, 31).
¿Kʼu yuʼun lek ti jpat koʼontontik ta stojolal Jeova xchiʼuk li buchʼutik sbiiltasoje?
Avie, jaʼ yorail ti jpat koʼontontik ta stojolal Jeova xchiʼuk li kʼusitik tspase. Jaʼ te chvinaj ti jpatoj koʼontontik ta stojolal moletik kʼalal ta jchʼuntik li kʼusi chkʼot ta nopel yuʼunike xchiʼuk mi ta jchʼuntik li beiltasel chakʼike. Kʼalal mi lik li mukʼta tsatsal vokolile, chapalutik sventa jchʼuntik mantal akʼo mi oy kʼusi xkichʼtik albel ti mu xkaʼibetik smelolale o ti mu sta˗o chkaʼitike (w22.02, paj. 4-6).
Li anjele, ¿kʼu yuʼun laj yalbe Sakarias ti ta xilik ti te stsakoj splomo li ajvalil Sorobabele? (Sak. 4:8-10).
Li kʼusi laj yil Sakariase laj yakʼbe ta aʼiel li steklumal Dios ti ta stsuts svaʼanel li temploe xchiʼuk ti jaʼ jech chkom kʼuchaʼal tskʼan yoʼonton Jeovae akʼo mi muʼyuk labal sba chilik li yantike (w22.03, paj. 16, 17).
¿Kʼusi xuʼ jpastik sventa lekuk ta chanel xilik yantik ti kʼu yelan chijkʼopoje? (1 Tim. 4:12).
Lekuk avoʼonton xchiʼuk ichʼvanan ta mukʼ li ta cholmantale, ta sjunuluk avoʼonton xakʼejin li ta tsobajeletike, nopuk xavaʼi xavakʼ aloʼil, meleluk skotol li kʼusi chavale, spatuk oʼontonal li kʼusi chavale xchiʼuk mu xachopol kʼopta li yantike (w22.04, paj. 6-9).
Li jkot jtiʼvanej chonbolom chalbe skʼoplal ta Apokalipsis 13:1 xchiʼuk 2, ¿kʼu yuʼun ti oy kʼusitik xkoʼolaj xchiʼuk li chankot jtiʼvanej chonbolometik (ajvaliletik) chalbe skʼoplal li ta slivroal Daniel kapitulo 7?
Li jkot jtiʼvanej chonbolom chalbe skʼoplal ta Apokalipsis 13 maʼuk noʼox skʼoplal jun ajvalil kʼuchaʼal li Romae. Yuʼun li jtiʼvanej chonbolom taje jaʼ skʼoplal skotol li ajvaliletik ti spasojik talel ta mantal li krixchanoetike (w22.05, paj. 9).
¿Kʼuxi chkakʼtik ta ilel ti jpatoj koʼontontik ti tukʼ chchapanvan li Jeovae?
Mi oy buchʼu oy kʼusi chopol spasojbutike, skʼan mu jnakʼ skʼakʼal koʼontontik, jaʼ lek kakʼtik ti akʼo xchapan li Jeovae. Jaʼ tslajesbe skʼoplal xchiʼuk chchapan skotol li kʼusi chopol kʼotem ta pasel yuʼun li mulile (w22.06, paj. 10, 11).
Kʼalal chichʼ albel junuk ermano ti akʼo spas orasion li ta tsobajele, ¿kʼusi skʼan teuk ta sjol?
Li orasione maʼuk sventa jtojobtastik li ermanoetike o ti xkaltik aʼyejetike. Jech xtok, kʼalal chlik li tsobajele, mu persauk ep kʼusi chal ta s˗orasion (Mat. 6:7) (w22.07, paj. 24, 25).
¿Kʼusi skʼan xal ti «chchaʼkuxiik sventa chapanel li buchʼutik toj chopol kʼusitik la spasike»? (Juan 5:29).
Taje maʼuk skʼan xal ti mi chaʼkuxiike chichʼik chapanel ta skoj ti kʼusi spasojik toʼox ta voʼnee. Li kʼusi skʼan xale jaʼ ti chkʼelbat stalelalik yuʼun Jesus kʼalal mi chaʼkuxiik tale (w22.09, paj. 18).
¿Kʼusi lekil aʼyej laj yal li ermano Joseph Rutherford ta jun asamblea ta septiembre ta 1922?
Ta jun asamblea ta Cedar Point (Ohio, Estados Unidos), xi laj yale: «¡Kʼelavilik, ch˗ajvalilaj xa li Ajvalile! Voʼoxuk yaj˗abteloxuk sventa xavalbeik batel skʼoplal. Jaʼ yuʼun, albeik, albeik, albeik skʼoplal li Ajvalil xchiʼuk li Ajvalilal yuʼune» (w22.10, paj. 3-5).
Jech kʼuchaʼal chal ta Isaias kapitulo 30, ¿kʼuxi tskoltautik Jeova sventa xkuch kuʼuntike?
Li ta kapituloe chal ti tskoltautik Jeova kʼalal 1) tstsʼet chikinta j˗orasiontik xchiʼuk tstakʼbutik, 2) tsbeiltasutik xchiʼuk 3) chakʼbutik bendision avi xchiʼuk li ta jelavele (w22.11, paj. 9).
¿Kʼuxi jnaʼojtik ti kʼot ta pasel ta voʼne xchiʼuk ti chkʼot ta pasel ta tsʼakal li kʼusi chal Salmo 37:10, 11 xchiʼuk 29?
Li kʼusi la stsʼiba li ajvalil Davide te laj yakʼ ta aʼiel ti jun noʼox yoʼontonik ta Israel mi ajvalilaj li Salomone. Kʼalal laj yalbe skʼoplal Jesus li Paraiso chtal ta tsʼakale, jaʼ la stunes li versikulo 11 (Mat. 5:5; Luk. 23:43) (w22.12, paj. 8-10, 14).