¿Mi xvul ta ajol?
¿Mi akʼupinoj skʼelel Li Jkʼel-osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:
¿Kʼusi smakoj ti ta jel jnopbentike? (Rom. 12:2).
Mu baluk noʼox ti jpastik jtoschaʼtosuk sventa lekuk xa li jtalelaltike. Skʼan nopoltikuk noʼox jkʼeltik kʼu kelantik ta melel xchiʼuk mi oy kʼusi skʼan jelel chkiltike, jeltik sventa lekuk xilutik li Jeovae (w23.01, paj. 8, 9).
¿Kʼuxi xuʼ ta smeloluk noʼox xkiltik li kʼusi chkʼotanuk ta pasel ta balumile?
Oy ta koʼontontik snaʼel li kʼusi chkʼot ta pasel ta balumile xchiʼuk li albil kʼopetike. Pe mu jkʼantik ti xchʼak sba kuʼuntik li ermanoetik ta skoj ti chkaltik li kʼusi ta jnoptik jtuktike, jaʼ noʼox kaltik li kʼusi yaloj s-organisasion Jeovae (1 Kor. 1:10) (w23.02, paj. 16).
¿Kʼusi sjelbenal ti kʼu yelan laj yichʼ voʼ li Jesuse xchiʼuk ti kʼu yelan chichʼ voʼ li yajtsʼaklomtake?
Li Jesuse mu persauk laj yakʼ sba ta stojolal li Jeova jech kʼuchaʼal ta jpastike, yuʼun jaʼ xa onoʼox steklumal Dios ti bu vokʼ li Jesuse. Mu persauk la sutes yoʼonton ta skoj mulil, yuʼun jaʼ tukʼil vinik (w23.03, paj. 5).
¿Kʼusi xuʼ jpastik sventa masuk to xakʼ skomentarioik li ermanoetike?
Jlikel noʼox xkakʼ jkomentariotik sventa xakʼ mas skomentarioik li ermanoetike. Jech xtok, skʼan mu epuk kʼusi xkalbetik skʼoplal sventa oyuk to kʼusi xuʼ xalik li yantike (w23.04, paj. 23).
¿Kʼusi jaʼ li «Chʼul Be» ti chalbe skʼoplal Isaias 35:8?
Li ta skʼakʼalil judaetike, jaʼ skʼoplal li be ti bu xanavik batel kʼalal lokʼik ta Babilonia yoʼ xbatik ta Israele. Avie, li Jeovae xchapanoj jun be sventa li yajtuneltake. Kʼalal jal toʼox skʼan li sjabilal 1919, laj yichʼ chapanel li be taje. Sventa xichʼ chapanele, laj yichʼ jelubtasel ta yan kʼopetik xchiʼuk laj yichʼ pasel imprimir li Vivliae. Li ta Chʼul Bee te lik xanavikuk li steklumal Jeova sventa x-ikʼatik batel li ta paraiso xkaltike xchiʼuk ti skʼupinik li bendisionetik chakʼ talel ta jelavel li Ajvalilal yuʼun Diose (w23.05, paj. 15-19).
¿Buchʼu skʼoplal li chaʼvoʼ antsetik chal ta kapitulo 9 ta Proverbiose?
Li ta Proverbiose chal ti buchʼu chchikintabe li kʼusi chal «li bol antse» ch-ikʼatik batel ta «Mukinal». Pe chalbe skʼoplal xtok yan ants ti jaʼ skʼoplal «li melel pʼijilale». Li buchʼu chchikinta li kʼusi chale jaʼ te chanav batel li «ta sbelel pʼijilale» xchiʼuk tsta xkuxlejal (Prov. 9:1, 6, 13, 18) (w23.06, paj. 22-24).
¿Kʼuxi laj yakʼ ta ilel Jeova ti bikʼit yakʼoj sba xchiʼuk ti snaʼ xrasonaj kʼalal la xchiʼin ta loʼil li Lote?
Li Jeovae laj yalbe Lot ti xjatav batel ta vitstikaltike. Kʼalal xvokolet la skʼanbe Jeova ti x-akʼe batuk ta Soare, li Diose laj yalbe ti xuʼe (w23.07, paj. 21).
¿Kʼusi xuʼ spas mi tskʼel pornografia smalal li jun antse?
Skʼan teuk ta sjol ti maʼuk ta smule. Jaʼ mas lek ti xnopaj ta stojolal Jeova xchiʼuk ti snopbe skʼoplal li sloʼilal antsetik chal ta Vivlia ti patbat yoʼontonik yuʼun Jeovae. Xuʼ me skolta smalal sventa stsal yuʼun skʼelel li pornografiae (w23.08, paj. 14-17).
¿Kʼuxi tskoltautik li pʼijilal sventa manxoukutik noʼox kʼalal chkichʼtik jakʼbel li kʼusi jchʼunojtike?
Kʼalal oy kʼusi chkichʼtik jakʼbele, xuʼ me skoltautik sventa jnaʼtik kʼusi tsnop o kʼusi tsvul-o yoʼonton li krixchanoe. Vaʼun, xuʼ xkakʼtik ta ilel slekil koʼontontik (w23.09, paj. 17).
¿Kʼusi chakʼ jchantik ti bu la sta stsatsal yoʼonton li Mariae?
Kʼalal laj yaʼi Maria ti chchiʼin yole, jaʼ xkaltik, li Mesiase, la skʼanbe koltael li yantike. Li Gabriel xchiʼuk Elisabete la stunesik Skʼop Dios sventa stsatsubtasik li Mariae. Li voʼotik eke xuʼ me spat koʼontontik li ermanoetike (w23.10, paj. 15).
¿Kʼuxi tstak’ j-orasiontik li Jeovae?
Li Jeovae jamal chal ti ta onoʼox xchikinta li j-orasiontike xchiʼuk kʼalal tstakʼe tstsak ta venta li kʼusi oy ta yoʼonton tspase (Jer. 29:12). Jech xtok, jelajtik kʼu yelan tstakʼbe s-orasion yajtuneltak manchuk mi koʼol li kʼusi tskʼanike. Pe ta onoʼox skoltautik (w23.11, paj. 21, 22).
Mi laj xa onoʼox yalbe skʼoplal spatobil oʼontonal li ta Romanos 5:2, ¿k’u yuʼun chchaʼal li ta versikulo 4?
Kʼalal chaʼi ta sba velta mantal li jun krixchanoe, xuʼ van spatoj yoʼonton ti chkuxi ta balumil mi pasem xa ox ta Paraisoe. Pe mi laj yil svokol, mi kuch yuʼun xchiʼuk mi laj yakʼ venta ti lek skʼoplal ta stojolal Jeovae, mas to me chchʼun ti chkʼot ta pasel li kʼusi smalaoje (w23.12, paj. 12, 13).