¿Mi anaʼoj xa?
¿Kʼu yelan li kareta ti bu tikʼil batel li j-etiopia vinik kʼalal jaʼo kʼoponat yuʼun Felipee?
LI JPʼEL kʼop ta griego ti «kareta» xi chichʼ jelubtasel ta Xchʼul Kʼop Dios sventa Achʼ Balumile jeltos kʼusi chalbe skʼoplal (Ech. 8:28, 29, 38). Xaval yaʼeluke, li ta kareta bu tikʼil batel li j-etiopia vinike maʼuk noʼox jun kareta ti bu tspasik-o kʼope o sventa anilajel, yuʼun mas to mukʼ. Jkʼeltik batel ti kʼu yuʼun jech chkaltike.
Li j-etiopia vinike tsots yabtel yichʼoj xchiʼuk nom bu talem. Jaʼ «jun vinik ti yichʼoj tsots yabtel ta stojolal Kandase ti jaʼ meʼ ajvalil ta Etiopiae xchiʼuk jaʼ sbainojbe skotol li skʼulejale» (Ech. 8:27). Li Sudán xchiʼuk li sural Ejipto ti ojtikinbil avie jaʼ toʼox sventainoj li Etiopia ta voʼnee. Ep van ta kot kareta la stsak li j-etiopia vinik sventa xkʼot ti bu chbate xchiʼuk ep van tajek yikats yichʼoj talel ta skoj ti nom likem tale. Li ta baʼyel sigloe jeltos kareta tstunesik sventa xbatik ta yan lum. Junantik li karetaetike oy chanib syantailtak xchiʼuk lek pixajtik. Xi chal jlik vun ti chalbe skʼoplal Vivliae: «Li ta karetaetik taje xuʼ mas ep kʼusi xkichʼtik batel, mas jun koʼontontik chijbatutik xchiʼuk xuʼ nom bu xijbat» (Acts—An Exegetical Commentary).
Li j-etiopia vinike yakal chchan vun kʼalal nopaj tal li Felipee. Li Vivliae chal ti «anilaj batel ta xokon kareta li Felipee xchiʼuk laj yaʼi ti tsots chaptabe li svun j-alkʼop Isaiase» (Ech. 8:30). Li karetaetik ti chbatik-o ta yan lume mu stakʼ anil xbatik, lektik noʼox kʼun skʼan xbatik. Jaʼ yuʼun, xuʼ xchan batel vun li j-etiopia vinik ta yut karetae xchiʼuk ti xtaat ta be yuʼun li Felipee.
Li j-etiopia vinike laj yalbe «Felipe ti akʼo xmuye xchiʼuk ti akʼo jmoj xchotiike» (Ech. 8:31). Li buchʼu tstsʼotik li kareta sventa anilajele vaʼajtik chbatik. Pe li karetaetik ti ch-ikʼvan batel ta yan lume mas mukʼ, jaʼ yuʼun lek x-ochik-o ta chotlej li Felipe xchiʼuk li j-etiopia vinike.
Ta skoj li kʼusi chal ta Echos ta kapitulo 8 xchiʼuk li kʼusitik yichʼoj tael achʼtik toe, kʼalal chichʼ pasbel slokʼol li j-etiopia vinik ta jvuntike, maʼuk xa chichʼ pasbel jun kareta sventa paskʼop o sventa anilajel, yuʼun mas xa mukʼ chichʼ pasel.