¿Mi anaʼoj xa?
¿Kʼu yuʼun oy bakʼintik chichʼ chaʼalel li kʼusi chal Vivliae?
OY JUNANTIK jtsʼibajometik ta Vivliae la xchaʼalbeik skʼoplal li kʼusi la stsʼibaike, bateltike la xchaʼalik jpʼelantik kʼop. ¿Kʼu yuʼun ti jech la spasike? Jkʼelbetik oxibuk srasonal:
Kʼalal jaʼo laj yichʼ tsʼibaele. Li ta voʼneal Israele jutuk mu skotoluk li krixchanoetike chʼabal yuʼunik li skopiail mantaletike, jaʼ yuʼun jaʼ to te chbat yaʼiik mantal kʼalal te tstsob sbaik ta axibalna xchiʼuk ta temploe (Deut. 31:10-12). Kʼalal jal tajek te vaʼalik xchiʼuk ti ep tajek li krixchanoetike, oy van kʼusi chchʼaybat-o yoʼontonik (Neem. 8:2, 3, 7). Jaʼ yuʼun, chtun tajek ti chichʼ chaʼalilanel jpʼelantik kʼop sventa xuʼ xvul ta sjolik xchiʼuk ti xakʼ ta xkuxlejalike. Mas to toj jtunel yuʼunik mi ep kʼusi smakojbe skʼoplal li kʼusi ch-albatike, jech kʼuchaʼal ta sventa mantaletik xchiʼuk sventa li chapanele (Lev. 18:4-22; Deut. 5:1).
Ti kʼuxi laj yichʼ tsʼibaele. Junantik livroetik ta Vivliae jaʼ kʼejojetik, jech kʼuchaʼal li slivroal Salmos, El Kantar de los Kantares xchiʼuk Lamentasiones. Junantik kʼejojetike oy s-estriviyoal. Ti jech chichʼ chaʼalele jaʼ sventa xaʼibeik skʼoplal kʼusi chal li kʼejoje xchiʼuk ti masuk kʼun xaʼiik sventa xkom ta sjolike. Sventa xkaʼibetik smelolale, jkʼeltik kʼusi chal li Salmo 115: 9 kʼalal ta 11: «Jteklum Israel, pato avoʼontonik ta stojolal li Jeovae, (yuʼun jaʼ tskoltaoxuk xchiʼuk jaʼ a-eskudoik). Snitilulal Aaron, pato avoʼontonik ta stojolal li Jeovae, (yuʼun jaʼ tskoltaoxuk xchiʼuk jaʼ a-eskudoik). Voʼoxuk ti axiʼtaojik li Jeovae, pato avoʼontonik ta stojolal li Jeovae, (yuʼun jaʼ tskoltaoxuk xchiʼuk jaʼ a-eskudoik)». Kʼalal oy buchʼu tskʼejinta li kʼupil kʼejoj taje, mas to chkom ta sjol li kʼusi chale.
Ti kʼu yuʼun laj yichʼ tsʼibaele. Junantik jtsʼibajometik ta Vivliae la xchaʼalilanik jpʼelantik kʼop ta skoj ti toj tsots skʼoplale. Jech kʼuchaʼal liʼe, kʼalal albatik yuʼun Jeova ti mu stakʼ slajesik chʼichʼ li j-israeletike, laj yalbe Moises ti akʼo to xchaʼalilan jayibuk velta sventa xaʼibeik lek srasonal ti kʼu yuʼun mu stakʼ slajesike. Li Diose tskʼan ti xaʼibeik lek smelolal li krixchanoetik ti jaʼ kuxulutik-o yuʼun li chʼichʼe (Lev. 17:11, 14). Kʼalal jelav kʼuk sjaliluke, li jtakboletik xchiʼuk li moletik ta Jerusalene oy kʼusitik laj yalbeik skʼoplal mi ta jkʼantik ti lek xilutik li Diose. Taje te la xchaʼalbeik skʼoplal ti mu stakʼ slajesik li chʼichʼe (Ech. 15:20, 29).
Li Vivliae oy onoʼox chchaʼalilan jpʼelantik kʼop, pe maʼuk me skʼan xal ti tskʼan Jeova ti jech-o jnopes jbatik sventa jchaʼalilantike. Yuʼun xi laj yal li Jesuse: «Kʼalal chapas orasione, mu me xachaʼalilan li kʼusi avaloj [xae]» (Mat. 6:7). Jech xtok, laj yalbe skʼoplal li kʼusitik xuʼ xkal ta j-orasiontike, yuʼun jaʼ li kʼusi oy ta yoʼonton Diose (Mat. 6:9-13). Kʼalal ta jkʼopontik Jeovae, maʼuk me skʼan xal ti ta jchaʼalilantik jujukoj li kʼusi laj xa kaltike, pe stakʼ onoʼox jchaʼkʼanbetik li kʼusi laj xa onoʼox jkʼanbetike (Mat. 7:7-11).
¡Toj lek ti oy kʼusitik chchaʼalbe skʼoplal li Vivliae! Taje jaʼ jtos li kʼusi tstunes Jeova sventa xchanubtasutik yoʼ jtabetik sbalile (Is. 48:17, 18).