Li kʼusitik tsjakʼ jkʼelvunetike

Li ta 2 Tesalonisenses 3:14 chal ti oy buchʼu skʼan xichʼ akʼbel senyaile. ¿Mi jaʼ oy ta sba yakʼel li moletike o mi ta jujuntal li ermanoetike?

Li jtakbol Pabloe xi laj yalbe li jchʼunolajeletik ta Tesalonikae: «Mi oy buchʼu mu xchʼun li kʼusi chkalkutik ta karta liʼe, akʼbeik me senyail» (2 Tes. 3:14). Laj toʼox yichʼ alel ti jaʼ sventa moletik ta tsobobbail li mantal taje. Xuʼ toʼox sjelubtasik jun mantal sventa spʼijubtasik tsobobbail mi oy buchʼu muʼyuk yakal chchʼun li mantaletik chal ta Skʼop Diose xchiʼuk ti ep xa ta velta yichʼoj tojobtasele. Vaʼun, li ermanoetike muʼyuk xa mas ta xchiʼinik, jaʼ xa noʼox chchiʼinik ta jujun tsobajel xchiʼuk li ta cholmantale.

Ti kʼu xa yelan chkaʼibetik smelolal avi li tojobtasel laj yal Pabloe, jaʼ ti ta jujuntal yajtsʼaklomtak Kristo tsnop stukik li kʼusi tspasike. Jaʼ yuʼun, li moletik ta tsobobbaile mu xa persauk sjelubtasik jun mantal sventa spʼijubtasik li ermanoetike. ¿Kʼu yuʼun ti jech chkaltike? Kalbetik skʼoplal ti kʼu yuʼun jech laj yal li Pabloe.

Li Pabloe laj yal ti oy ermanoetik ta tsobobbail ti mu xichʼ smelolike, yuʼun mu xchʼunik li tojobtasel laj yakʼanbe batel ti te lokʼem ta Skʼop Diose. Jun velta kʼalal ay svulaʼan li tsobobbaile, xi laj yalanbe komele: «Mi oy buchʼu mu skʼan x-abteje, akʼo mu xveʼ xtok». Akʼo mi jech, oy junantik ti mu skʼan x-abtejik sventa smakʼlin sbaik akʼo mi xuʼ to yuʼunik abtel. Jech xtok, tstikʼ sbaik ta spasel li kʼusi mu sventaik-oe. Li ermanoetike, ¿kʼu van yelan skʼan xilik li buchʼutik mu xichʼ smelolike? (2 Tes. 3:​6, 10-12).

Li Pabloe xi laj yale: «Akʼbeik me senyail». Li ta griego kʼope chakʼ ta aʼiel ti skʼan naʼel buchʼu li krixchano taje xchiʼuk ti skʼan xkichʼ jpʼijiltik sventa mu jchanbetik li xchopol talelale. Li mantal taje jaʼ sventa sjunul tsobobbail, maʼuk noʼox sventa li moletike (2 Tes. 1:1; 3:6). Jaʼ yuʼun, mi oy junuk yajtsʼaklom Kristo laj yakʼ venta ti oy jun ermano ti muʼyuk tstsak ta venta li tojobtasel chal ta Skʼop Diose, jaʼ me tsnop stuk mi muʼyuk xa chchiʼin.

¿Mi jaʼ van skʼan xal ti mu xa stakʼ jchiʼintik jech kʼuchaʼal li buchʼu chichʼ lokʼesel ta tsobobbaile? Moʼoj, yuʼun xi to laj yal li Pabloe: «Jaʼ lek pʼijubtasik-o kʼuchaʼal jun ermano». Jaʼ yuʼun, li yajtsʼaklomtak Kristoe jech-o ta xchiʼinik ta tsobajel xchiʼuk ta cholmantal, pe jaʼ muʼyuk chchiʼinik kʼalal chchʼay yoʼontonik o li ta reunion sosiale. Li Pabloe laj yal ti jaʼ sventa xichʼ kʼexlaltasele. Kʼalal muʼyuk xa ta jchiʼintik li buchʼu mu xichʼ smelolale, xuʼ me xkʼexav ta skoj li kʼusitik tspase, vaʼun ti sjel stalelale (2 Tes. 3:​14, 15).

Li avie, ¿kʼuxi xuʼ xkakʼ ta jkuxlejaltik li tojobtasel taje? Baʼyel, skʼan jkʼeltik mi ta melel mu onoʼox xichʼ smelolal li ermano jech kʼuchaʼal laj yal li Pabloe. Li Pabloe maʼuk chalbe skʼoplal li ermanoetik ti jelel kʼusi tsnop tspasik ta skoj ti xakʼ sjol yoʼontonike o ti jaʼ tspasik li kʼusi mu jkʼupintike. Jech xtok, maʼuk chalbe skʼoplal li buchʼutik chopol kʼusi la spasbutike. Yuʼun jaʼ laj yalbe skʼoplal li jchʼunolajeletik ti laj yichʼik tojobtasel ta Skʼop Diose, pe ti yolbaj xa mu skʼan stsakik ta ventae.

Mi laj kakʼtik venta ti oy jun ermano ti mu xchʼun jtosuk tojobtasel ta Vivliae,a voʼotik me ta jnop jtuktik ti muʼyuk ta jchiʼintik kʼalal ta jchʼay koʼontontik xchiʼuk li ta reunion sosiale. Ta skoj ti ta jnoptik ta jujuntal li kʼusi ta jpastike, mu me buchʼu xkalbetik, jaʼ noʼox me xuʼ xkalbetik li kutsʼ kalaltik ti jmoj nakalutik xchiʼuk ti jaʼik testigoetike. Li ermano taje jaʼ noʼox me xuʼ jchiʼintik ta jujun tsobajel xchiʼuk ta cholmantal. Pe mi la sjel stalelale, xuʼ xa me jchiʼintik li ta yan kʼusitik ta jpastike.