¿Mi xvul ta ajol?
¿Mi akʼupinoj skʼelel Li Jkʼel-osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:
¿Kʼusi srasonal oy kuʼuntik yoʼ xkalbetik smukʼulal li Jeovae?
Chkalbetik smukʼulal Jeova ta skoj ti kichʼojtik ta mukʼ ta sjunul koʼontontike xchiʼuk ti jkʼanojtik tajeke. Jech xtok, chkalbetik smukʼulal Jeova ta skoj ti ta jkʼantik ti xojtikinik li yantike (w25.01, pajina 3).
Mi oy buchʼu la syayijes koʼontontike, ¿kʼusi xuʼ skoltautik sventa xkakʼtik ta pertone?
Mu jmuktik li kʼusi oy ta koʼontontike, akʼo mi jech, skʼan jiptik lokʼel li skʼakʼal koʼontontik xchiʼuk li skapemal joltike. Vaʼun, mas me lek xkil jbatik xchiʼuk li yantike (w25.02, pajina 15, 16).
Li keremetike, ¿kʼu yuʼun lek ti xchanbeik slekil talelal li Markose?
Li Markose ta sjunul yoʼonton la skolta li yantike. Xuʼ van kʼux laj yaʼi xchiʼuk chopol laj yaʼi kʼalal oy kʼusi la snuptane, pe muʼyuk xchibaj-o. Jech-o laj yakʼ persa ti xamigoin li Pabloe xchiʼuk li yan ermanoetik ti tsotsik ta mantale (w25.04, pajina 27).
¿Kʼusi la skʼan laj yal Jesus kʼalal xi laj yalbe ta orasion li Jeovae: «Voʼon laj kakʼbe snaʼik li abie»? (Juan 17:26).
Li yajchankʼoptak Jesuse snaʼojik xa onoʼox ti Jeova sbi li Diose. Jaʼ yuʼun, li kʼusi laj yalbe skʼoplal Jesuse jaʼ ti kʼu yelan li Jeovae. Taje te smakojbe skʼoplal li kʼusi oy ta yoʼonton tspas ta balumil xchiʼuk ta stojolal li krixchanoetike, li kʼusitik spasoj xa talele xchiʼuk li stalelaltake (w25.05, pajina 20, 21).
¿Kʼusi te ta joltik mi bikʼit chkakʼ jbatike?
Te ta joltik ti oy onoʼox kʼusi mu jnabetik skʼoplale. Jech kʼuchaʼal liʼe, mu jnaʼtik bakʼin chlaj li kʼusitik oy ta balumile xchiʼuk ti kʼuxi tskoltautik li Jeovae. Jech xtok, mu jnaʼtik kʼusi chkʼot ta pasel li okʼom chaʼeje xchiʼuk mu xkaʼibetik smelolal kʼu to yepal xojtikinutik li Jeovae w25.06, pajina 15-18).
¿Kʼuxi ta jtabetik sbalil kʼalal ta jchantik junuk mantal o junuk diskurso ti jaʼ sventa skotol krixchanoetike?
Lek ti xiuk jnopbetik skʼoplale: «¿Kʼusitik sprevailtak chalbe skʼoplal sventa xchʼun li jun krixchano ti melel kʼusi chal Vivliae? ¿Mi yakal chalbe skʼoplal junuk skʼelobil ti jtunel kuʼun sventa jchol-o mantale? ¿Buchʼu van xuʼ xkalbe li kʼusi la jchane xchiʼuk bakʼin xuʼ xkalbe?» (w25.07, pajina 19).
¿Kʼusi chakʼ jchantik ti kʼu yelan akʼe ta perton yuʼun Jeova li Davide?
Li Davide toj tsots la saʼ smul, akʼo mi jech, la sutes yoʼonton ta melel. Vaʼun, akʼat ta perton yuʼun li Jeovae (1 Rey. 9:4, 5). Kʼalal chakʼutik ta perton li Jeovae, muʼyuk xa tsvules ta sjol jmultik sventa stikʼ ta jsatik o ti xakʼbutik kastigo ta tsʼakale w25.08, pajina 17).
¿Kʼusi xuʼ jpastik mi oy junuk kaj-estudiotik vokol chaʼibe smelolal o vokol chaʼi xchʼamel jtosuk chanubtasel ta Vivliae?
Mi laj xa jchapbetik smelolal ta Vivlia xchiʼuk mi vokol-o chaʼibe smelolal chkiltike, jelavkutik ta yan punto xchiʼuk jaʼ to jkʼeltik ta mas tsʼakal (w25.09, pajina 24).
¿Kʼusi skʼan xal kʼalal chal ta Vivlia «li sjuʼel mulil ti chloʼlavane»? (Ebr. 3:13).
Li mulil jkuchojtike jaʼ tstij koʼontontik sventa jpastik li kʼusi chopole, pe maʼuk noʼox, yuʼun chakʼ akʼo naʼetajkutik. Jech kʼuchaʼal liʼe, chakʼ ti teuk xijnopnun-o mi skʼanojutik li Jeovae (w25.10, pajina 16).
¿Kʼusi xuʼ skoltautik sventa masuk to xijnopaj ta stojolal Jeova kʼalal ta jpastik orasione?
1) Jnopbetik skʼoplal li stalelaltak Jeovae. 2) Jnoptik kʼusi yakal ta jnuptantik xchiʼuk kalbetik li Jeovae, jech kʼuchaʼal mi oy buchʼu ti muʼyuk to kakʼojtik ta pertone. 3) Jchʼakbetik lek yorail spasel orasion. Vaʼun, xuʼ me mas to lek xkalbetik Jeova ti kʼu yelan chkaʼi jbatike (w25.10, pajina 19, 20).
¿Kʼuxi xuʼ jkoltatik li buchʼutik oy xa sjabilalike?
Bat jvulaʼantik xchiʼuk nopajtik noʼox jkʼopontik batel. Jech xtok, xuʼ xbat jchiʼintik ta doktor o ti jchiʼintik ta cholmantale (w25.11, pajina 6, 7).
¿Kʼusi tsots skʼoplal skʼan spasik li jnupuneletik sventa xichʼuk-o ichʼel ta mukʼ Jeova li ta skʼakʼalil snupunelike?
Skʼan stsakik ta venta li smantaltak ajvalile, oyuk smelol kʼu yelan chjelav li snupunelike xchiʼuk ti xakʼik ta ilel li talelal chakʼ chʼul espiritue, skʼan bikʼit xakʼ sbaik ti kʼu yelan tslap skʼuʼike xchiʼuk ti kʼu yelan tsmeltsan sbaike, skʼan spʼajik li kʼusitik nopem xaʼiik spasel li krixchanoetik ti mu jechuk chal Vivliae xchiʼuk skʼan jamal xalik xchiʼuk x-ichʼvanik ta mukʼ kʼalal chchapan snupunelike (w25.12, pajina 21-24).