«Kʼalal chkakʼtik ta ilel jlekil talelaltike»
Li Danielle ti jaʼ stestigo Jeova ta Sudafricae te la sta jun maletin ti chʼay komel ta sjolik ti bu chuchʼik kafee. Li ta yut maletine te oy yav stakʼin ti oy stakʼinale xchiʼuk starjetatak sventa vanko. Ta skoj ti tskʼan tsutesbe yajval maletin li Daniellee, la saʼ bu nakal o mi oy bu tstabe snumeroal stelefono, pe jaʼ noʼox la stabe sbi jun vinik. Kʼopoj batel ta vanko sventa skʼel mi x-albat ti bu nakale, pe muʼyuk albat. Jaʼ noʼox te la sta jun sreseta doktor, vaʼun kʼopoj batel li ta numero te oy ta resetae, ti bu kʼot li yamadae jaʼ ta jun konsultorio, li buchʼu la stakʼe laj yal ti chakʼbe batel snumero Danielle li vinike.
Li vinike toj labal sba laj yaʼi ti te kʼoponat batel ta konsultorioe xchiʼuk ti albat ti oy buchʼu la sta li smaletine, vaʼun ti tskʼan la tsutesbate. Kʼalal bat yichʼ talele, te oy li Danielle xchiʼuk li stote. Vaʼun, laj yalbeik kʼuchaʼal ti la saʼik ta persa sventa sutesbeike, laj yalbeik ti jaʼik stestigotak Jeovae xchiʼuk ti chakʼik persa ta xchʼunik li kʼusi chal li Vivliae, jaʼ yuʼun toj tsots skʼoplal chilik ti lekuk stalelalike (Ebreos 13:18).
Ta mas tsʼakale, li vinike la stakbe batel jun mensaje li Danielle xchiʼuk stot sventa stojbe ta vokol li kʼusi la spasike. Xi la tsʼibae: «Kolavalik tajek ti la avakʼik persa sventa xataikune, ximuyubaj ti laj kojtikinoxuke. Muʼyuk ta jchʼay ta jol ti laj avakʼik ta ilel slekil avoʼontonik ta jtojolale, jaʼ yuʼun ta jkʼan chkakʼboxuk kʼuk yepal uni takʼin sventa jtojboxuk ta vokol. Jnaʼoj ti ep kʼusitik chaviktaik spasel sventa xapasik li kʼusitik yakʼojboxuk abainik li Diose. Ti muʼyuk laj yichʼ komel li Daniellee jaʼ sprevail ti lekil krixchanooxuke. Yan velta kolaval chakalboxuk xchiʼuk ti xakʼboxuk bendision Dios ta sventa li kʼusitik chapasike».
Jun chib u ta mas tsʼakale, li vinik taje la xchiʼin sbaik ta loʼil xchiʼuk li stot Daniellee, vaʼun laj yalbe li kʼusi jaʼtik to kʼot ta stojolale, jaʼo yakal ta manolajel, vaʼun te pʼajem la sta yav takʼin, la sabe li yajvale. Kʼalaluk laj yakʼbe sutele, laj yalbe ti kʼuchaʼal jech la spase, yuʼun mu to jaluk yechʼele jaʼ jech pasbat taje. Xi laj yale: «Kʼalal chkakʼtik ta ilel jlekil talelaltike, xuʼ me stij oʼontonal, vaʼun jun noʼox yoʼonton skotol li krixchanoetike».