¿Kʼusi xuʼ jpas mi mu jkʼupin ti xibat ta eskuelae?

Mi toj echʼom x-ilin li amaestroe, mi chasujoxuk achiʼiltak ta chanun sventa oyuk kʼusi xapase, mi toj vokol chavaʼi spasel li eksamenetike, mi toj ep li atarea chavichʼ akʼbel chavaʼie, xuʼ van jaʼ xa mu xakʼupin-o ti xabat ta chanune. Mi jeche, mu chopoluk xavaʼi aba, yuʼun stalel onoʼox.a Xi chal jun tseb ti Rachelb sbie:

«Solel mu jkʼupin ti xibat ta eskuelae. Jaʼ lek chkaʼi ti yanuk-o bu xibate, jech kʼuchaʼal ta playa o xchiʼuk kamigotake. O jaʼ mas xuʼ to chkaʼi ti jkolta jtot jmeʼ ta smeltsanel veʼlil o ta xchʼubael jnakutike».

Mi jaʼ jech chanop kʼuchaʼal li Rachele, xuʼ van jaʼ jun sujel chavaʼi ti chabat ta eskuelae, ti persa skʼan xatsʼik jaʼ to mi lalokʼ ta chanune. ¿Kʼusi xuʼ xapas sventa mu jechuk xavaʼi abae?

¿Mi anaʼoj xa? Mi chavakʼ persa sventa lekuk kʼusi xanop ta sventa li eskuelae, xuʼ van xlik akʼupin xchiʼuk chavakʼ venta ti jtunel avuʼune, yuʼun li kʼusitik te chachane ta onoʼox skoltaot mi la ata avaʼleje.

Sventa xuʼ xakʼupin ti chabat ta eskuelae, jaʼuk xanopbe skʼoplal li sbaliltak chatabee.

Oy kʼusitik lekik chachan. Kʼalal ep kʼusitik chachane, jaʼ tskoltaot sventa xanaʼuk xchapanel kʼalal oy kʼusi chanuptan ta avabtel o li kʼusi chanuptan ta akuxlejale, ti mu persauk xamala ti oyuk kʼusi spasik li yantike. Akʼo mi oy kʼusitik mu xakʼupin li ta eskuelae, xiuk xajakʼbe abae: «¿Kʼuxi tskoltaun li kʼusi yakal jchane?».

Beiltasel ta Vivlia: «Chabio li pʼijilale xchiʼuk ti xatojob snopele» (Proverbios 3:21).

Chlekub li kʼusi nopem xavaʼi spasele. Ta skoj ti oy yorail li kʼusitik chichʼ pasel ta eskuelae, tskoltaot sventa lekuk xatunes li akʼakʼale, ti xchapetuk li kʼusi chapase xchiʼuk ti lekuk baxbolot ta abtele. Skotol taje tskoltaot kʼalal mi la ata xa ox avaʼleje. Jaʼ yuʼun, xiuk xajakʼbe abae: «Li eskuelae, ¿kʼuxi yakal tskoltaun sventa lekuk xchapet li kʼusi ta jpase xchiʼuk ti lekuk baxbolun ta abtele? ¿Kʼuxi xuʼ masuk to xitojob spasel?».

Beiltasel ta Vivlia: «Kʼusiuk tsatsal abtelal chichʼ tabel sbalil» (Proverbios 14:23).

Chlekub ti kʼu yelan chachiʼin ta loʼil li yantike. Kʼalal chachiʼin li achiʼiltak ta chanune, chachan ti kʼu yelan skʼan xatsak ta venta li yantike xchiʼuk chlik avaʼibe smelolal ti kʼu yelan chaʼi sbaike. Jun kerem ti Joshua sbie xi chale: «Ti lek ta jchiʼintik ta loʼil li yantike toj tsots skʼoplal jech kʼuchaʼal ti lekuk chanunajemutike. Yuʼun chtun kuʼuntik ti kʼu sjalil kuxulutike». Xiuk xajakʼbe abae: «Li eskuelae, ¿kʼuxi skoltaojun sventa lekuk jchiʼin ta loʼil li yantik akʼo mi yan-o kʼusitik xchʼunojik o yan-o stsʼunbalike?».

Beiltasel ta Vivlia: «Jaʼ xapasik batel li kʼusi jun-o avoʼonton akotolike» (Ebreos 12:14).

Tskoltaot sventa xanaʼ kʼusi chapas ta jelavel. Li eskuelae xuʼ skoltaot ta snaʼel li kʼusi xatojob spasele, vaʼun ti xanaʼuk kʼusi ti xuʼ xavakʼ ta avoʼonton xchanele. Jun tseb ti Brooke sbie xi chale: «Xuʼ van xavakʼ ta avoʼonton xchanel jtosuk abtelal ti chakʼik ta chanel ta eskuela jech kʼuchaʼal la jpase, vaʼun mi lalokʼ ta chanune chapalot xa ox sventa xa-abtej». Xiuk xajakʼbe abae: «¿Kʼusi chi˗abtej-o mi lilokʼ ta chanune? ¿Kʼusi xuʼ chichanunaj-o sventa jchan li abtelal taje?».

Beiltasel ta Vivlia: «Qʼuelo me lec ti bu chavacʼ batel avacane» (Proverbios 4:26, Xchʼul cʼop Jtotik Dios, ta skʼop Chenalhoʼ).