¿Mi jaʼ jun relijion protestante li stestigotak Jeovae?

Maʼuk. Li stestigotak Jeovae jaʼik yajtsʼaklom Cristo, maʼuk protestante chaʼi sbaik. ¿Kʼu yuʼun?

Li Relijion Protestantee jaʼ jtos «relijion ti kontra chil li Katolika likem ta Romae». Akʼo mi mu jechuk chkaʼikutik ti kʼu yelan chchanubtasvan li Relijion Katolikae, maʼuk protestante chkaʼi jbakutik ta skoj liʼe:

1. Ep li kʼusitik xchʼunojik li Relijion Protestantee mu jechuk kʼuchaʼal chal li Vivliae. Jech kʼuchaʼal liʼe, li Vivlia chal ti «jun noʼox Dios [oye]», maʼuk Trinidad (1 Timoteo 2:5; Juan 14:28). Jamal lek chal ti tslajes Dios li buchʼutik chopolike, pe muʼyuk chal ti chchikʼan ta kʼokʼe (Salmo 37:9; 2 Tesalonicenses 1:9).

2. Muʼyuk bu chopol xa chikʼopojkutik ta stojolal li Relijion Katolikae o ta stojolal li yan relijionetike xchiʼuk muʼyuk ta jkʼan ta jtukʼibtaskutik. Moʼoj, yuʼun ti kʼusi noʼox ta jkʼankutike jaʼ ti ta jcholbekutik skʼoplal li Ajvalilal yuʼun Diose, chkakʼ ta koʼontonkutik skoltael yantik sventa oyuk xchʼunel yoʼontonik ta stojolal li lekil aʼyej taje (Mateo 24:14; 28:19, 20). Li kʼusi oy ta koʼontonkutike jaʼ ti xchanik krixchanoetik li kʼusi melel ta sventa li Diose xchiʼuk ta sventa li Skʼope, li Vivliae. Maʼuk ti ta jkʼan ta jtukʼibtaskutik li yantik relijione (Colosenses 1:9, 10; 2 Timoteo 2:24, 25).