Li aʼyej yichʼoj tal Vivliae

Paso imprimir

Oy sderecho ch-ajvalilaj li Jeovae. Jaʼ noʼox stuk mas lek ti kʼu yelan ch-ajvalilaje. Li kʼusi oy ta yoʼonton tspas ta sventa spʼejel balumil xchiʼuk ta stojolal krixchanoetik li Jeovae chkʼot onoʼox ta pasel yuʼun.

Teik ta Nichimaltik Eden li Adan xchiʼuk Evae, te nopol oy li kiletel chone.

Kʼalal echʼ xa ox 4026 m.t.J.

Li «kiletel chone» la xchibal kʼopta ti oy sderecho ch-ajvalilaj li Jeovae xchiʼuk ti kʼu yelan ch-ajvalilaje. Jamal onoʼox laj yal Jeova ti oy jun nitilulal ti chpechʼbe ta tekʼel sjol li kiletel chone, li Satanase (Jenesis 3:1-5, 15). Pe oy kʼuk sjalil ti chakʼ permiso ti sventain sba stuk li krixchanoetik ti jaʼ pasbilik ta mantal yuʼun li Satanase.

Li Abrane chchikinta li kʼusi tspas Dios ta tsakale

Sjabilal 1943 m.t.J.

Li Abraane albat yuʼun Jeova ti jaʼ chkʼot ta albil nitilulal li jun snitilulale (Jenesis 22:18).

Kʼalal echʼ xa ox 1070 m.t.J.

Albat yuʼun Jeova li ajvalil David ti te chlokʼ talel ta yutsʼ yalal li albil nitilulale, jech albat ta mas tsʼakal li Salomon eke (2 Samuel 7:12, 16; 1 Reyes 9:3-5; Isaias 9:6, 7).

Sjabilal 29 t.J.

Laj yal Jeova ti jaʼ albil nitilulal li Jesuse xchiʼuk ti jaʼ chuʼuninbe li xchotleb ajvalil Davide (Galatas 3:16; Lukas 1:31-33; 3:21, 22).

Sjabilal 33 t.J.

Li Satanas ti jaʼ li «kiletel chone» laj yakʼ ta milel li Jesuse, vaʼun jaʼ jech la syayijes kʼuk sjalil li albil nitilulale. Li Jeovae la xchaʼkuxes Jesus sventa xkuxi yan velta ta vinajel xchiʼuk la xchʼam ti kʼu yepal sbalil li stukʼil kuxlejal Jesuse. Ti jech la spase, jaʼ sventa tspas-o perton li mulile xchiʼuk jaʼ sventa xkuxiik sbatel osil li snitilulal Adane (Jenesis 3:15; Echos 2:32-36; 1 Korintios 15:21, 22).

Yakal chichʼ jipel yalel tal ta balumil li kiletel chon o Satanas jech kʼuchaʼal chal li Apokalipsise

Te van ta sjabilal 1914 t.J.

Li Jesuse la sjip yalel ta balumil li «kiletel chone» xchiʼuk «toj komkom xa li [yorail]» te ch-iktaate (Apokalipsis 12:7-9, 12).

Yakal sventain tal balumil Jesus jech kʼuchaʼal chal li Apokalipsise

Ta jelavel

Li Jesuse chchuk jmil jabil li Satanase, mi laje tsmil. Taje jaʼ jech ta xvochʼbe sjol. Vaʼun, chkʼot ta pasel li kʼusi onoʼox tskʼan yoʼonton Jeova ta sventa li balumile xchiʼuk li kʼusi tskʼan tspas ta stojolal li krixchanoetike. Jaʼ jech sak chkom li sbi Dios ta skoj li kʼusitik chopol albile, jech xtok, te chvinaj ta melel ti jaʼ mas lek ti kʼu yelan ch-ajvalilaje (Apokalipsis 20:1-3, 10; 21:3, 4).