10 Spatuk yoʼontonik ta atojol

¿KʼUSI SMAKOJ?

Xuʼ jpat koʼontontik ta stojolal li buchʼu tstsak ta venta mantaletike, ti tspas li kʼusi yaloje xchiʼuk ti muʼyuk tsjut kʼope. Vaʼun, li stot smeʼe, li yamigotake xchiʼuk li yajval yabtele tspat yoʼontonik ta stojolal.

¿KʼU YUʼUN TSOTS SKʼOPLAL?

Sventa masuk xakʼik apas li kʼusi chakʼane, skʼan xavakʼ ta ilel ti xuʼ spat yoʼontonik ta atojolale.

«Xuʼ spat yoʼontonik ta atojolal atot ameʼ kʼalal skotol ora chavakʼ ta ilel ti xnop avuʼun lek li kʼusi chapase xchiʼuk ti chapas li kʼusi abainoje, maʼuk noʼox kʼalal te skʼelojoxuke» (Sarahi).

BEILTASEL TA VIVLIA: «Kʼelo˗o me abaik ti buchʼuoxuk ta melele» (2 Korintios 13:5).

¿KʼUSI STAKʼ XAPAS?

Li tojobtaseletik chtale tskoltaot sventa spat yoʼontonik yan velta ta atojolal li atot ameʼe o ti masuk to spat yoʼontonik ta atojolale.

Mu xajut kʼop. Mi chajut kʼope, muʼyuk xa me tspat yoʼontonik ta atojolal. Pe mi melel xanaʼ xakʼopoje, mas to kʼalal oy kʼusi muʼyuk lek chbat ta pasel avuʼune, tspat yoʼontonik ta atojolal.

«Mu vokoluk chkaʼitik ti jamal chijkʼopoj kʼalal oy kʼusi lek chbat ta pasel kuʼuntike, pe mi jaʼ jech jamal chijkʼopoj manchuk mi xuʼ sok˗o jkʼoplaltike, mas me tspat yoʼonton ta jtojolaltik» (Caiman).

BEILTASEL TA VIVLIA: «Oy ta koʼontonkutik ti sakuk jtalelalkutik ta skotole» (Ebreos 13:18).

Paso li kʼusi abainoje. Kʼalal laj yichʼik jakʼbel li buchʼutik sbainojik skʼelel j˗abteletik ta empresaetik ta Estados Unidose, li 78% laj yal ti «toj tsots la skʼoplal ti spas li kʼusi oy ta sbaik li j˗abteletik sventa sta yabtelike». Mi la avakʼ ta avoʼonton li kʼusi oy ta aba spasele, ta me xtun avuʼun mi lachʼie.

«Chakʼik venta jtot jmeʼ kʼalal ta jpas noʼox li kʼusi chalbeikune. Mi chkakʼ ta koʼonton li kʼusi jbainoje, mas tspat yoʼontonik ta jtojolal» (Sarah).

BEILTASEL TA VIVLIA: «Jpatoj koʼonton ti chkʼot ta pasel avuʼune, [...] jnaʼoj ti maʼuk noʼox chapas li kʼusi chkale» (Filemon 21).

Oyuk smalael avuʼun. Anil chkakʼtik venta kʼalal oy buchʼu sta xa xchʼiele. Pe vokol ta naʼel mi xtojob xa snopel.

«Mu ta aniluk tspat yoʼontonik ta atojolal li atot ameʼ o li yantike. Pe mi jech˗o chapas li kʼusi abainoje, mas me tspat yoʼontonik ta atojolal» (Brandon).

BEILTASEL TA VIVLIA: «Tsʼikuk me avuʼunik» (Kolosenses 3:12).