Li kʼusi ta jkʼan ta jtatike xkoʼolaj ta splanoal jpʼej na. Mi la avakʼbe yipale, ta onoʼox spas avuʼun.
SVENTA KEREM TSEBETIK
12 Oyuk kʼusi ta avoʼonton stael
¿KʼUSI SMAKOJ?
Sventa oyuk kʼusi xatae, mu baluk noʼox ti te chanopilanbe skʼoplale o ti chakʼan xkʼotuk ta pasele. Sventa xatae, skʼan xachapan aba lek, ti teuk ta ajol ti oy kʼusi xuʼ xjel ta anile xchiʼuk ti skʼan tsots xa˗abteje.
Li kʼusi oy ta avoʼonton staele xuʼ van xata noʼox ta junchibuk kʼakʼal, xemana, ta junchibuk u, bateltike skʼan x˗echʼ jun jabil o mas. Oy kʼusitik mas bikʼitik skʼan xapas baʼyel sventa xata li kʼusi mas mukʼtike.
¿KʼU YUʼUN TSOTS SKʼOPLAL?
Mi la ata li kʼusitik chakʼane, mas chapat avoʼonton ta atojolal, mas lek chavil aba xchiʼuk avamigotak xchiʼuk mas xamuyubaj.
Mas chapat avoʼonton ta atojolal. Mi la avakʼ persa stael li kʼusitik kʼun ta pasele, ta me xavakʼ persa stael li kʼusitik mas tsots ta pasele. Jech xtok, tstsal me avuʼun li kʼusitik chanuptan jujun kʼakʼale, jech kʼuchaʼal li sujele.
Mas lek chavil aba xchiʼuk avamigotak. Jkotoltik ta jkʼupintik xchiʼinel li buchʼutik snaʼojik lek li kʼusitik tskʼan tspas ta xkuxlejalike xchiʼuk ti chakʼbeik yipal staele. Mi koʼol laj kakʼbetik yipal staele, mas me lek chkil jbatik xchiʼuk li kamigotaktike.
Mas xamuyubaj. Kʼalal chata li kʼusi anopoj chapase, mas jun avoʼonton chavaʼi aba.
«Toj lek chkaʼi ti oy kʼusi chkakʼ ta koʼonton staele, yuʼun tskoltaun sventa oyuk noʼox kabtel xchiʼuk ti xkakʼbe yipal staele. Toj lek kʼalal ta jtatik li kʼusi oy ta koʼontontike, yuʼun xuʼ xi xkaltike: ‹¡Pas xa kuʼun un!›» (Christopher).
BEILTASEL TA VIVLIA: «Li buchʼu jaʼ noʼox tskʼel li ikʼe muʼyuk tstsʼun li sbekʼ tsʼunobile xchiʼuk li buchʼu jaʼ noʼox tskʼel li toke muʼyuk kʼusi tstsobbe sat» (Eklesiastes 11:4).
¿KʼUSI STAKʼ XAPAS?
Sventa xata li kʼusi oy ta avoʼontone, paso liʼe.
Tʼujo li kʼusi oy ta avoʼonton staele. Paso junuk slistail li kʼusi chakʼan chatae xchiʼuk kʼelo kʼusi baʼyel chakʼan chata.
Nopo lek kʼuxi chapas. Sventa xatae, xi xapase:
Lekuk me yorail xavakʼbe.
Tsʼibao li kʼusitik skʼan xapase.
Nopbo skʼoplal li kʼusi xuʼ smakote xchiʼuk ti kʼuxi xuʼ stsal avuʼune.
Paso xa noʼox. Mu persauk xachapan skotol sventa xlik apase. Nopbo skʼoplal li kʼusi baʼyel skʼan xapase, vaʼun paso. Nopo kʼuxi pas tal avuʼun li kʼusi laj xa atae.
BEILTASEL TA VIVLIA: «Li kʼusitik snopoj tspas li buchʼutik baxbolike jpʼel skʼoplal lek chkʼot ta pasel» (Proverbios 21:5).