¿Mi oy kʼusi chopol chanop ta stojolal yantik?
Kʼalal chopol kʼusi ta jnoptik ta stojolal li yantike xkoʼolaj kʼuchaʼal jtos chamel: toj chopol tajek xchiʼuk xuʼ van mu xkakʼtik venta mi tsakbilutik li ta chamel taje.
Xuʼ me oy buchʼutik chopol kʼusi tsnopik ta stojolal yantik ta skoj noʼox ti jelel slumalik, stsʼunbalik, skʼopik, srelijionik, mi viniketik o mi antsetik, mi jkʼulejik o mi povreik. Junantike chopol kʼusi tsnop ta stojolal yantik ta skoj li sjabilalike, mi chanunajemik o mi muʼyuk o ti kʼu yelan spat xokonike. Akʼo mi jech, yalojik mi muʼyuk kʼusi chopol tsnopik ta stojolal li yantike.
Li voʼote, ¿mi chopol kʼusi chanop ta stojolal li yantike? Kʼun ta ilel kʼalal oy krixchanoetik ti chopol kʼusi tsnopik ta stojolal li yantike, pe xuʼ van vokol chkaʼitik ti jaʼ jechutik li voʼotike. Melel onoʼox ti jkotoltik oy kʼusi chopol ta jnoptik ta stojolal li yantike. Li sociólogo David Williams chal ti kʼalal oy kʼusi chopol tsnop ta stojolal jtsop krixchanoetik li jun krixchanoe, «muʼyuk xa me lek chchiʼin ta loʼil kʼalal tsta ta chiʼinel ta loʼile, taje xuʼ van mu xakʼ venta».
Jun skʼelobile jaʼ li Yovitsa ti te nakal ta jun jteklum ta suresteal Europa ti te nakal jtsop krixchanoetike. Xi chale: «Laj toʼox jnop ti chʼabal lek stalelalik li jtsop krixchanoetik taje. Muʼyuk toʼox jnopoj mi chopol kʼusi ta jnop ta stojolal li yantike. Xi toʼox chkalbe jbae: ‹Melel onoʼox li kʼusi ta jnop ta stojolalike›».
Epal ajvaliletik yakʼojik mantaletik sventa mu jkontraintik li buchʼutik yan-o stsʼunbalike xchiʼuk ti mu kʼusi chopol jnoptik ta stojolal li yantike. Akʼo mi jech, muʼyuk jech kʼotem ta pasel yuʼunik. ¿Kʼu yuʼun? Yuʼun li mantaletik yakʼojike jaʼ noʼox tspajes li kʼusi tspas li krixchanoetike, pe mu xjel yuʼunik li kʼusi tsnopike xchiʼuk ti kʼu yelan chaʼi sbaike. Kʼalal oy kʼusi chopol chichʼ nopel ta stojolal li yantike, te chlik talel ta snopben xchiʼuk ta yoʼonton li krixchanoetike. Vaʼun chaʼa, ¿mi oy van kʼusi stakʼ pasel sventa xlaj skʼoplal taje?
Li ta yan mantaletik chtale, te ta jchantik voʼob beiltaseletik ta Vivlia sventa jkʼeltik kʼuxi koltaatemik epal krixchanoetik sventa mu chopoluk kʼusi snopik ta stojolal li yantike.