Saʼo jeltos avamigotak

Li kʼusi chakʼ vokolile

Mi muʼyuk ta jchiʼintik li buchʼutik oy kʼusi muʼyuk lek chkiltik ta stojolalike, xuʼ me chopol kʼusi xlik jnoptik ta stojolalik. Mi jaʼ ta jchiʼintik li buchʼutik koʼol kelantik xchiʼukike, xuʼ me xlik jnoptik ti mas to lek ti kʼu yelan chkaʼi jbatike xchiʼuk li kʼusi ta jpastike.

Beiltasel ta Vivlia

«Chʼieso ta avoʼontonik ek li kʼanelale» (2 KORINTIOS 6:13).

¿Kʼusi skʼan xal? Kʼalal oʼontonal xie, xuʼ van jaʼ skʼan xal ti kʼu yelan chkaʼi jbatike xchiʼuk li kʼusi ta jnoptike. Mi jaʼ noʼox lek chkiltik li buchʼutik koʼol kelantik xchiʼukike, muʼyuk me chkakʼtik chʼiuk ta koʼontontik li kʼanelale. Sventa mu jechuk xkʼot ta jtojolaltik taje, skʼan me xkamigointik jeltos krixchanoetik.

¿Kʼuxi tskoltautik li jeltos stsʼunbal kamigotaktike?

Kʼalal chkojtikintik lek jun krixchanoe, chkaʼibetik smelolal ti kʼu yuʼun jelel li kʼusitik tspase. Kʼalal mas ta jchiʼintik li krixchano taje, muʼyuk xa jelel chkiltik. Mas oy sbalil chkiltik, yuʼun li kʼusitik chmuyubaj-o o li kʼusitik tsvul-o yoʼontone jaʼ xa jech chkaʼitik ek.

Jkʼeltik kʼusi kʼot ta stojolal li Nazaré ti vokol laj yaʼi yiktael ti chopol toʼox kʼusi tsnop ta stojolal li jyanlum krixchanoetike. Xi chalbutike: «La jchiʼinan xchiʼuk jmoj li-abtej xchiʼukik. Laj kojtikinan krixchanoetik ti jelel tajek ti kʼu toʼox yelan kaʼioj ta stojolalike. Kʼalal chavamigoin krixchanoetik ti jelel kʼusi nopem xaʼiik spasele, muʼyuk chopol kʼusi chanop ta stojolalik, chlik akʼanan xchiʼuk mas xa oy sbalil chavil».

Li kʼusi xuʼ xapase

Akʼo persa xchiʼinel ta loʼil krixchanoetik ti jelel slumalik, stsʼunbalik o ti jelel skʼopike. Paso liʼe:

Jakʼbo sloʼil xkuxlejalik.
Ikʼo ta veʼel.
Chikinta-o li sloʼil xkuxlejalike xchiʼuk jakʼbo ti kʼusi mas tsots skʼoplal chaʼiike.

Mi la avaʼibe smelolal li kʼusi snuptanoj ta xkuxlejalike, mas me chavaʼibe smelolal xchiʼuk ta me xjel ti kʼusi chanop toʼox ta stojolal li jtsop krixchanoetike.

Li kʼusi kʼotem ta xkuxlejalike: Sookammah xchiʼuk Kandasamy / Ta Canadá

«Te lichʼikutik ta Sudáfrica kʼalal laj yichʼ lokʼesel li mantal ti apartheid sbie. Li krixchanoetik ti koʼol stsʼunbalike jaʼ noʼox xuʼ koʼol te xnakiik. Ta skoj taje chopol xa kʼusi lik snopbe sbaik. Maʼuk sakil krixchanounkutik xchiʼuk mu jkʼan jchiʼinkutik, yuʼun junantike solel muʼyuk jbalil laj yilunkutik. Li vaʼ kʼakʼale, mu toʼox jnaʼkutik mi oy kʼusi chopol ta jnopkutik ta stojolal li yantike. Solel voʼonkutik noʼox pʼajbilunkutik laj kaʼikutik.

»Sventa jel li kʼusi ta jnopkutike, laj kakʼkutik persa saʼel kamigotakutik ti jeltos stsʼunbalike. Kʼalal lik jchiʼinkutik li sakil krixchanoetike, laj kakʼkutik venta ti koʼolunkutike. Yuʼun koʼol li vokolil ta jnuptantike xchiʼuk li kʼusitik ta jnuptan ta jkuxlejaltike.

»Jun veltae, laj kikʼkutik tal ta naklej xchiʼuk voʼonkutik kʼuk sjaliluk jun nupultsʼakal ti sakil krixchanoetike. Laj kojtikin jbakutik lek xchiʼuk mu ta sjaliluke laj kamigoin jbakutik. Ta skoj taje, muʼyuk xa kʼusi chopol la jnopkutik ta stojolal li sakil krixchanoetike».