Xchukel batel j-israeletik ta Babilonia kʼalal to ta xchaʼvaʼanel li smuroaltak Jerusalene

Kʼalaluk te chukulik ta Babilonia li j-israeletike, la jyil epal preva li xchʼunel yoʼontonike. Li Sadrac, Mesac xchiʼuk Abed-negoe la jyichʼik tikʼel ochel ta orno ti xleblun skʼakʼale, pe kuxul lokʼesatik yuʼun li Diose. Ta tsʼakal, kʼalaluk la jyichʼ tsakel ta kʼop yuʼun jmedoetik xchiʼuk jpersiaetik li Babiloniae, li Daniele la jyichʼ jipel ochel ta xchʼen leonetik, pe li Diose la smakbe ye li leonetike, jaʼ jech la jyichʼ chabiel li Daniele.

Ta slajebal ne li ajvalil Ciro ta Persiae la skolta lokʼel li j-israeletike. Jech oxal jaʼo kʼotik ta yosilalik kʼalal lokʼ xaʼox lek 70 jabil ti la jyichʼik chukel batel ta Babiloniae. Li kʼusi baʼyel la spasik ti kʼalaluk kʼotik ta Jerusalene, jaʼ svaʼanel li xchʼulna Jeovae. Pe ta anil noʼox pajtsanbat yabtelik yuʼun li yajkontraike. Jaʼ yuʼun nopol xaʼox van ta 22 jabil svulelik ta Jerusalén kʼalal tsuts yuʼunik svaʼanel li chʼulnae.

Jech noxtok ta jchantik ta sventa Esdras ti sut batel ta Jerusalén sventa ta slekubtas li chʼulnae. Taje kʼot ta pasel kʼalal stsakoj xaʼox 47 jabil stsutsel li chʼulnae. Kʼalal lokʼ xaʼox oxlajuneb jabil skʼotel ta Jerusalén li Esdrase, li Nehemiase koltavan ta svaʼanel li smuroaltak Jerusalene. Skotol li loʼiletik ta SVOʼVOKʼALE jalij 152 jabil.