La jyakʼbe yichʼ voʼ Jesús li Juane

KʼELAVIL li paloma ta xyal tal ta sjol li vinike. Li vinike jaʼ Jesús. Oy xa van 30 sjabilal. Li vinik te xchiʼuke jaʼ Juan. La xa jchantik jutuk ta stojolal li Juane. ¿Mi xvul ta ajol kʼalal María bat svulaʼan li Isabele? ¿Mi xvul ta ajol ti bakʼ ta muyubajel li yol Isabele? Li neneʼ ti muʼyuk toʼox vokʼeme jaʼ li Juane. Pe ¿kʼusi tspasik li Juan xchiʼuk li Jesús tanae?

Li Juane naka to la smuk ta ukʼum Jordán li Jesuse. Jaʼ jech la jyichʼ voʼ li Jesuse. Kʼalaluk oy buchʼu ta xichʼ voʼe, ta xichʼ mukel ta voʼ, vaʼun ta xichʼ lokʼesel. Li Juane jaʼ jech ta spasbe krixchanoetik; jech oxal Juan J-akʼvanej ta voʼ sbi. Pe ¿kʼu yuʼun la jyakʼbe yichʼ voʼ li Jesuse?

Veno, yuʼun li Jesuse tal ta stojolal Juan vaʼun la skʼanbe akʼo akʼbatuk yichʼ voʼ. Li Juane ta xakʼbe yichʼ voʼ li krixchanoetik ti tskʼan chakʼik ta ilel ti sutesoj xa yoʼontonik ta skoj li kʼusitik chopol spasojike. Pe ¿mi oy van kʼusi spasoj Jesús sventa tsutes yoʼonton ek? Muʼyuk, muʼyuk bu spas-o jech, yuʼun jaʼ xNichʼon Dios ti likem tal ta vinajele. Jaʼ yuʼun, oy yan srasonal ti kʼu yuʼun tal skʼan Jesús ti akʼo akʼbatuk yichʼ voʼ yuʼun li Juane. Jkʼeltikik.

Kʼalal mu toʼox chtal ta stojolal Juan li Jesuse, jkarpintero toʼox. Li jun jkarpinteroe jaʼ tspas li kʼusitik ta teʼe, jech kʼuchaʼal mexa, xila xchiʼuk chotlebaletik. Li José, smalal li Mariae, jaʼ jkarpintero toʼox, jaʼ la xchanubtas ta jkarpinteroal li Jesuse. Pe li Diose muʼyuk la stak tal xNichʼon ta Balumil sventa tspas ta jkarpintero. Moʼoj, yuʼun oy yan yabtel yuʼun, vaʼun la xa sta yorail li abtelal taje. Jech oxal, sventa chakʼ ta ilel Jesús ti tal spasbe yabtel li sTote, la skʼanbe Juan ti akʼo x-akʼbat yichʼ voʼe. ¿Mi lek van la jyil Dios taje?

Lek, yuʼun kʼalaluk lokʼ tal ta voʼ li Jesuse, oy buchʼu xi la jyal tal ta vinajele: Liʼe jaʼ jNichʼon ti jpatoj koʼonton ta stojolale, xi. Jech noxtok, jam la yaʼeluk li vinajele xchiʼuk li jkot paloma liʼe yal tal ta stojolal li Jesuse. Pe maʼuk melel paloma. Jaʼ noʼox ti xkoʼolaj yileluke. Ta melel jaʼ li xchʼul s-espiritu Diose.

Vaʼun kʼalal la xaʼox yichʼ voʼ li Jesuse ep xa kʼusitik skʼan snop, jaʼ yuʼun 40 kʼakʼal bat ta jun lum ti bu muʼyuk buchʼu te oye. Te tal li Satanás ta stojolale. Li Satanase oxib velta la spas ox yaʼi ta preva li Jesuse. Pe li Jesuse muʼyuk bu la spas li kʼusi tskʼan Satanase.

Kʼalaluk lokʼ tal ti bu toʼox oy li Jesuse, la jyojtikin jayvoʼ viniketik ti kʼot ta baʼyel yajtsʼaklomtake. Li sbi li viniketik taje jaʼ: Andrés, Pedro (ti Simón sbiinoj xtoke), Felipe xchiʼuk Natanael (ti Bartolomé sbiinoj xtoke). Li Jesús xchiʼuk li yajtsʼaklomtake batik ta yosilal Galilea. Te pajik ta Caná ta slumal Natanael, ti bu ta jun kʼin nupunele, la spas li baʼyel skʼelobil juʼelal li Jesuse. ¿Mi xa naʼ kʼusi ti la spase? La skʼatajes ta yaʼlel tsʼusub li voʼe.