3 Xchanobil
¿Buchʼu jaʼ ti Jesukristoe?
¿Kʼu yuʼun jaʼ sbiinoj «baʼyel» Nichʼonil yuʼun Dios ti Jesuse? (1)
¿Kʼu yuʼun sbiinoj «li Kʼope»? (1)
¿Kʼu yuʼun tal ta Balumil kʼuchaʼal vinik ti Jesuse? (2-4)
¿Kʼu yuʼun la spas li skʼelobiltak juʼelale? (5)
¿Kʼusi poʼot xa ta spas ti Jesuse? (6)
1. Kʼalal muʼyuk toʼox talem ta Balumil ti Jesuse, te toʼox kuxul ta vinajel kʼuchaʼal jun jkuxlej ti mu xvinaj ta kʼelele. Jaʼ baʼyel spasben ti Diose, jaʼ yuʼun sbiinoj «baʼyel» Nichʼonil yuʼun Dios (Colosenses 1:15, NM; Apocalipsis 3:14). Jesus jaʼ stuk noʼox Nichʼonil ti la spas Dios ti muʼyuk buchʼu koltaat ta spasele. Jeova la stunes ti Jesus kʼalal muʼyuk toʼox talem ta Balumil kʼuchaʼal jun «pʼijil j-abtel» kʼalal la spas skotol li kʼusitik oy ta vinajel xchiʼuk ta Balumile (Proverbios 8:22-31, NM; Colosenses 1:16, 17). Xchiʼuk xtok, Dios la stunes ta bankilal jelubtasej kʼop. Jech oxal, Jesus sbiinoj «li Kʼope» (Juan 1:1-3; Apocalipsis 19:13).
2. Kʼalal la stak tal ta Balumil xNichʼon ti Diose, la sjelubtasbe xkuxlejal ta yalajeb ti Mariae. Jaʼ yuʼun, maʼuk jun krixchano stot ti Jesuse; jech oxal, muʼyuk la xkuchin li mulile mi jaʼuk li chopolile. Dios la stak tal ta Balumil ti Jesus ta oxib srasonal: 1) sventa chchanubtasutik li melel ta sventa ti Diose (Juan 18:37), 2) sventa tukʼ chakʼ sba-o xchiʼuk la jyakʼ kiltik kʼuxi xuʼ jpastik jech kʼuchaʼal la spase (1 Pedro 2:21) xchiʼuk 3) sventa ta xakʼ xkuxlejal sventa tspojutik ta mulil xchiʼuk ta lajelal. ¿Kʼu yuʼun persa la jyakʼ li xkuxlejale? (Mateo 20:28.)
3. Kʼalal muʼyuk la xchʼunbe smantaltak Dios li baʼyel vinik Adane, la spas li «mulil», ti jech ta sbiiltas li Vivliae. Jaʼ yuʼun, Dios la jyalbe ta melel ti ta onoʼox xchame (Génesis 3:17-19). Maʼuk xa jun vinik chʼabal smul, yuʼun la jyikta ta xchʼunbel smantaltak ti Diose. Molib ta kʼunkʼun, ta tsʼakal ne icham. La sjelubtasbe mulil xnichʼnabtak ti Adane. Jaʼ yuʼun, chi jmalubutik, chi j-ipajutik xchiʼuk chi jchamutik. ¿Kʼuxi van xuʼ xkol li krixchanoetike? (Romanos 3:23; 5:12.)
4. Jesuse jaʼ toʼox jun krixchano chʼabal smul jech kʼuchaʼal Adane. Pe liʼ ne jaʼ jelel, Jesuse la xchʼunbe skotol smantaltak ti Diose akʼo mi echʼ yuʼun li mukʼta tsatsal prevae. Vaʼun chaʼa, xuʼ toʼox ta xakʼ xkuxlejal chʼabal smul sventa tstojbe smul ti Adane. Ti vaʼ yelanil taje, li Vivliae tsbiiltas «pojelal». Jaʼ jech li xnichʼnabtak Adan xuʼ ta xkolik li ta mosovinel yuʼun li lajelale. Xuʼ ta staik perton sventa smulik xchiʼuk kuxlejal sbatel osil skotol li buchʼutik ta xakʼ xchʼunel yoʼontonik ta Jesuse (1 Timoteo 2: 5, 6; Juan 3:16; Romanos 5:18, 19).
5. Kʼalal liʼ toʼox oy ta Balumil ti Jesuse la xpoxta j-ipajeletik, la smakʼlintas krixchanoetik ti chviʼnajike xchiʼuk la spajes tsatsal ikʼal voʼetik. Xchiʼuk la xchaʼkuxes animaetik. ¿Kʼu yuʼun la spas li skʼelobiltak juʼelale? 1) Kʼux ta yoʼonton li krixchanoetik ti oy svokolike xchiʼuk oy ta yoʼonton ta skoltaan. 2) Li skʼelobiltak juʼelal la spase la jyakʼanan ta ilel ti jaʼ xNichʼon Dios. 3) La jyakʼanan ta ilel li kʼusitik tspas ta sventa li jchʼunej mantal krixchanoetik, kʼalal ta x-ajvalilaj kʼuchaʼal Rey ta sba Balumile (Mateo 14:14; Marcos 2:10-12; Juan 5:28, 29).
6. Cham ti Jesuse, Dios la xchaʼkuxes kʼuchaʼal jun espiritu xchiʼuk sut batel ta vinajel (1 Pedro 3:18). Dios la spas ta Rey ta tsʼakal. Poʼot xa ta slajes skotol choplejal xchiʼuk vokolil ta Balumil ti Jesuse (Salmo 37:9-11; Proverbios 2:21, 22).
[Lokʼol ta pajina 7]
Li kʼusitik la spas ta yabtel ti Jesuse: chanubtasvan, la spas skʼelobiltak juʼelal xchiʼuk la jyakʼ xkuxlejal ta jtojolaltik