4 Xchanobil

¿Buchʼu jaʼ li Yavloe?

¿Kʼuxi ipas li Yavlo Satanase? (1, 2)

¿Kʼuxi ta sloʼla li krixchanoetike? (3-7)

¿Kʼu yuʼun skʼan xa tsal li Yavloe? (7)

1. Li jpʼel kʼop «yavlo» jaʼ smelolal ti buchʼu chal chopol jutbil kʼopetik ta yan krixchano. «Satanas» jaʼ smelolal jkontrainvanej. Li biiletik liʼe, jaʼ la jyichʼ akʼbel li bankilal skontra Diose. Ta slikebe jaʼ toʼox jun anjel chʼabal smul ti kuxul toʼox ta vinajel xchiʼuk Dios, pe ta tsʼakal ne, la stoy sba xchiʼuk la skʼan la jyichʼ li muyubtaelal ti jaʼ noʼox yuʼun ti Diose (Mateo 4:8-10).

2. Ti anjel liʼe, li Satanase, la stunes jkot kiletel chon sventa tskʼopon ti Evae, ta sjutbil kʼoptak la spas ti akʼo mu xchʼunbe smantal ti Diose. Jaʼ jech ti Satanase la skontrain li «ajvalilal» yuʼun ti Diose, jaʼ xkaltik, li yavil buchʼu Toj Toyole. La xchibal-kʼopta mi lek ch-ajvalilaj ti Diose xchiʼuk mi ta saʼ li kʼusitik lek sventa li krixchanoetike. Jech xtok, la jyakʼ ta aʼiel smelolal ti mu junuk krixchano jun yoʼonton ta xakʼ sba ta stojolal ti Diose. Kʼalal jech la spase kʼataj ta skontra Dios. Jaʼ yuʼun, la jyichʼ biiltasel Yavlo Satanas (Génesis 3:1-5; Job 1:8-11; Apocalipsis 12:9).

3. Chakʼbe yipal ta sloʼlael krixchanoetik sventa chmuyubtaat ti Satanase (2 Corintios 11:3, 14). Li kʼuyelan jtosukal tspase jaʼ ti ta jecheʼ relijione. Mi oy relijion chchanubtasvan jutbil kʼopetik ta sventa Diose, ta melel jaʼ tspas li kʼusi tskʼan ti Satanase (Juan 8:44). Li krixchanoetik ti oyik ta jecheʼ relijionetike, xuʼ van ta xchʼunik ti ta melel tsmuyubtaik li melel Diose, pe ta melel jaʼ tspasik li kʼusi tskʼan li Satanase, yuʼun jaʼ li dios yuʼun li lum liʼe (2 Corintios 4:4).

4. Li kʼusi yan tstunes Satanas sventa oyuk ta skʼob li krixchanoetike, jaʼ li espiritismoe. Junantik krixchanoetik xuʼ van ta xikʼik tal espirituetik sventa chkoltaatik, sventa chakʼbeik svokol yantik, sventa chalik kʼusi chkʼot ta pasel ta tsʼakal xchiʼuk sventa tspasik skʼelobiltak juʼelal. Satanas jaʼ li chopol juʼelal ti ta snikes oʼontonal ta spasel li kʼusitik liʼe. Mi ta jkʼan ta jlekubtasbetik yoʼonton ti Diose, skʼan mu xi jnopaj mi jsetʼuk li ta espiritismoe (Deuteronomio 18:10-12; Hechos 19:18, 19).

5. Satanas tsloʼla xtok li krixchanoetik kʼalal tstoy sbaik ta skoj ti yan stsʼunbalike xchiʼuk li smuyubtael li juju tsop krixchanoetik ch-ajvalilajike. Junantik krixchanoetik chchʼunik ti slumalik xchiʼuk stsʼunbalike, jaʼ toj lek. Pe taje mu meleluk (Hechos 10:34, 35). Yantike smalaojik ti juju tsop krixchanoetik ch-ajvalilajike ta xchʼayes li svokoltak li krixchanoetike. Kʼalal jech ta spasik taje, chakʼik ta ilel ti mu xchʼamik li sReino Dios ti jaʼ noʼox xuʼ ta xchʼayes li jvokoltike (Daniel 2:44).

6. Yan smelolal ti kʼuyelan tsloʼla krixchanoetik ti Satanase, jaʼ ti chakʼbe ta yoʼonton ta skʼanel li muliletike. Jeova ta xalbutik ti mu jpastik li muliletike, yuʼun snaʼoj ti ta xakʼ jvokoltike (Gálatas 6:7, 8). Xuʼ van junantik krixchanoetik tskʼanik ti cha pas li kʼusi chopol ta spasike. Pe vuleso ta ajol ti jaʼ Satanas buchʼu tskʼan ti cha pas li kʼusitik liʼe (1 Corintios 6:9, 10; 15:33).

7. Satanas xuʼ tstunes xtok li nutsel o kontrainel sventa cha vikta ti Jeovae. Xuʼ van ta x-ilinik tajek li buchʼutik lek cha vile, ta skoj ti yakal xa chan li Vivliae. Xuʼ van cha snaʼleik li yantike. Pe, ¿buchʼu yakʼojbot li akuxlejale? Satanas tskʼan cha sibtasot sventa cha vikta aba ta xchanel ta sventa ti Jeovae. Mu xa vakʼ aba ta tsalel (Mateo 10:34-39; 1 Pedro 5:8, 9). Xuʼ cha lekubtasbe yoʼonton ti Jeova xchiʼuk cha vakʼ ta ilel ti avakʼoj aba ta ajvalilal Yuʼun, mi mu xa vakʼ aba ta tsalel yuʼun li Yavloe (Proverbios 27:11).

[Lokʼol ta pajina 9]

Li jecheʼ relijione, li espiritismoe xchiʼuk li skʼanel tajek lumalile, ta sloʼla li krixchanoetike

Chano batel sventa Jeova akʼo mu stsalot ti Satanase