5 Xchanobil

¿Kʼusi tskʼan Dios ta sventa li Balumile?

¿Kʼu yuʼun la spas Balumil ti Jeovae? (1, 2)

¿Kʼu yuʼun maʼuk jun paraiso li Balumil tanae? (3)

¿Kʼusi chkʼot ta stojolalik li chopol krixchanoetike? (4)

¿Kʼusi ta spas Jesus ta tsʼakal ta sventa li buchʼutik ipike?, ¿ta sventa li mol-meʼeletike?, ¿ta sventa li animaetike? (5, 6)

¿Kʼusi skʼan cha pas sventa cha kʼupin li lekilaletik ta tsʼakale? (7)

1. Jeova la pas li Balumil sventa ta skʼupin xkuxlejalik ta sbatel osil li krixchanoetike. Li Stuke tskʼan ox ti akʼo nakiikuk tukʼil xchiʼuk muyubajel krixchanoetik ta sbatel osil (Salmo 115:16; Isaías 45:18). Li Balumile muʼyuk ta xichʼ jinesel; te oy-o ta sbatel osil (Salmo 104:5; Eclesiastés 1:4).

2. Kʼalal muʼyuk toʼox spasoj li krixchanoe, Dios la stʼuj jsep osil li ta Balumile, la skʼatajes ta jun alakʼ sba paraiso, la sbiiltas «[nichimaltik, NM] Eden». Jaʼ te la jyakʼ li baʼyel vinike xchiʼuk li baʼyel antse: Adan xchiʼuk Eva. Diose tskʼan ox ti akʼo ayanuk xnichʼnabik xchiʼuk ti akʼo snojesik spʼejel li Balumile. Ta kʼunkʼun chkʼataj ox yuʼunik ta jun paraiso spʼejel li Balumile (Génesis 1:28; 2:8, 15).

3. Adan xchiʼuk Eva la spas smulik, yuʼun yalel muʼyuk la skʼan la xchʼunbeik smantal ti Diose. Jaʼ yuʼun, Jeova la snutsanan lokʼel li ta nichimaltik Edene, li paraiso une ichʼay (Génesis 3:1-6, 23). Pe Jeovae muʼyuk xchʼayoj ta sjol li kʼusi tskʼan ta sventa li Balumile. Stuke yaloj onoʼox ti ta skʼatajes ta jun paraiso sventa chnaki krixchanoetik ta sbatel osil. ¿Kʼuxi ta spas taje? (Salmo 37:29).

4. Kʼalal mu to ta xkʼataj ta jun paraiso li Balumile, baʼyel skʼan xchʼay li chopol krixchanoetike (Salmo 37:38). Liʼe ta xkʼot ta pasel ta Armajedon, ti jaʼ sleto Dios sventa tslajes skotol li kʼusitik toj chopole. Mi laj ne, ta xichʼ chukel mil jabil li Satanase, taje jaʼ smelolal ti muʼyuk xa buchʼu chopol chkom sventa tsokes li Balumile. Jaʼ noʼox kuxul ta xkom li steklum Diose (Apocalipsis 16:14, 16; 20:1-3).

5. Ti Jesus ne, ta x-ajvalilaj mil jabil ta sba Balumil (Apocalipsis 20:6), vaʼun ta kʼunkʼun ta xchʼay batel li mulil ta jnopbenaltik xchiʼuk li ta jbekʼtaltike. Chi jkʼatajutik ta tukʼil krixchanoetik jech kʼuchaʼal toʼox Adan xchiʼuk Eva kʼalal muʼyuk toʼox spasoj smulike. Vaʼun, chʼabal xa chameletik, malubel mi jaʼuk lajelal. Li j-ipajeletike ta xpoxtajik xchiʼuk li mol-meʼeletike ta xkerem-tsebajik (Job 33:25; Isaías 33:24; Apocalipsis 21:3, 4).

6. Li ta Mil Jabil Ajvalilal yuʼun ti Jesuse, li tukʼil krixchanoetike ta x-abtejik sventa tskʼatajesik ta jun paraiso spʼejel li Balumile (Salmo 37:29). Xchiʼuk xtok, epal animaetik ta xchaʼkuxiik sventa chkuxiik kʼuchaʼal krixchanoetik li ta Balumile (Hechos 24:15). Mi ta spasik li kʼusi chkʼanbatik yuʼun ti Diose, ta xkuxiik-o sbatel osil ta Balumil. Mi moʼoje, ta xichʼik lajesel ta sbatel osil (Juan 5:28, 29; Apocalipsis 20:11-15).

7. Jaʼ jech ta xkʼot ta pasel li kʼusi onoʼox ta skʼan Dios ta sventa li Balumile. ¿Mi cha kʼan cha kʼupin li lekilaletik ta tsʼakale? Mi jeche, skʼan xa chan batel ta sventa Jeova xchiʼuk chʼunbo batel li smantaltake. Li kʼusi cha skoltaot ta spasel taje, jaʼ ti cha bat ta tsobajel ti chichʼ pasel ta sNail Reino yuʼun li xRextikotak Jeova ti bu nopol nakalote (Isaías 11:9; Hebreos 10:24, 25).

[Lokʼol ta pajina 10]

Li chʼayem paraisoe

[Lokʼol ta pajina 11]

Kʼalal mi echʼ li Armajedone, ta xkʼataj ta jun paraiso li Balumile