7 Xchanobil

Kʼuxi xuʼ xi jnopaj ta stojolal Dios ta orasion

¿Kʼu yuʼun tsots skʼoplal skʼan jpasulantik orasion? (1)

¿Kʼuxi, xchiʼuk buchʼu skʼan jkʼopontik li ta j-orasiontike? (2, 3)

¿Kʼusitik stakʼ alel li ta orasione? (4)

¿Kʼusi ora stakʼ xa pas orasion? (5, 6)

¿Mi ta xaʼi skotol orasionetik ti Diose? (7)

1. Spasel orasion jaʼ smelolal ti ta jbikʼtajes jbatik ta skʼoponel ti Diose. Skʼan jpasulantik orasion ta stojolal Dios. Mi ta jpastike, nopol chkaʼi jbatik ta stojolal jech kʼuchaʼal jun kamikotik ti jkʼanojtik tajeke. Manchuk mi toj mukʼ xchiʼuk toj echʼem ep sjuʼel ti Jeovae, ta xaʼi li j-orasiontike. ¿Mi cha pasulan orasion ta stojolal Dios? (Salmo 65:2; 1 Tesalonicenses 5:17.)

2. Li orasione jaʼ stsʼak li muyubtael chkakʼtike. Jaʼ yuʼun, li j-orasiontike jaʼ noʼox jpastik ta stojolal Jeova Dios. Kʼalal liʼ toʼox oy ta Balumil ti Jesuse, jaʼ noʼox la skʼopon ta orasion li sTote, muʼyuk buchʼu yan. Voʼotike skʼan jech ta jpastik ek (Mateo 4:10; 6:9). Pe skotol li j-orasiontike skʼan chkaltik ta sbi Jesus. Jaʼ jech ta xkakʼtik ta ilel ti kichʼojbetik ta mukʼ li yabtel akʼbile xchiʼuk ti oy xchʼunel koʼontontik li ta xkuxlejal la jyakʼ sventa la spojutike (Juan 14:6; 1 Juan 2:1, 2).

3. Kʼalal ta jpastik orasion ta stojolal Diose, skʼan chlokʼ tal ta koʼontontik li kʼusitik chkalbetike. Mu stakʼ jchantik ta joltik li j-orasiontike, mi jaʼuk ta jkʼeltik ta svunal orasionetik (Mateo 6:7, 8). Kʼuuk noʼox oyukutik, kʼusuk noʼox ora xchiʼuk buyuk noʼox xuʼ jpastik orasion. Dios ta xaʼi li j-orasiontik manchuk mi ta koʼontontik ta jpastik (1 Samuel 1:12, 13). Lek ti ta jpastik j-orasiontik ti bu jtuktik noʼox oyutike (Marcos 1:35).

4. ¿Kʼusitik stakʼ xa val li ta aorasione? Ta kʼusuk noʼox ti mi mu sok li amikoinel avuʼun xchiʼuke (Filipenses 4:6, 7). Li orasion jTotik sbie, ta xakʼ ta ilel ti skʼan jpastik orasion ta sventa sbi xchiʼuk ta sventa li kʼusitik tskʼan ti Jeovae. Xchiʼuk xtok, xuʼ jkʼanbetik ti akʼo xakʼbutik li kʼusitik chtun kuʼuntike, ti akʼo spasbutik perton jmultik xchiʼuk ti akʼo spojutik li ta lajtsaelaletike (Mateo 6:9-13). Ta j-orasiontike maʼuk noʼox me ta jkʼantik li kʼusi tskʼan koʼontontike. Jaʼ noʼox stakʼ jkʼantik li kʼusitik ta skʼan ti Diose (1 Juan 5:14).

5. Voʼote xuʼ cha pas orasion kʼalal oy ta voʼonton cha tojbe ta vokol xchiʼuk ti cha kʼan cha kʼupil kʼopta ti Diose (1 Crónicas 29:10-13). Mu xa vikta aba ta spasel orasion kʼalal oy avokole xchiʼuk kʼalal mi oy ta preva li xchʼunel avoʼontone (Salmo 55:22; 120:1). Xchiʼuk xtok, jaʼ lek ti ta jpastik orasion kʼalal muʼyuk to veʼemutike (Mateo 14:19). Jeova ta xalbutik ti akʼo jpastik orasion «skotol orae» (Efesios 6:18).

6. Mi ta jpastik tsots mulile, tsots skʼoplal skʼan ta jpastik orasion xchiʼuk jkʼanbetik vokol ti akʼo xkʼuxubinutik xchiʼuk akʼo spasbutik perton ti Jeovae. Dios «ta x[...]chʼay li mulil», pe jaʼ noʼox mi jamal ta xkaltik li jmultike xchiʼuk mi chkakʼbetik yipal ti mu xa jchaʼ pastike (Salmo 86:5, Ch; Proverbios 28:13).

7. Jeova jaʼ noʼox ta xaʼibe s-orasion li buchʼu tukʼike. Sventa xaʼibot li aorasion ti Diose, skʼan cha vakʼbe yipal ta yakʼel ta akuxlejal li Smantaltake (Proverbios 15:29; 28:9). Kʼalal cha pas aorasione bikʼit xa vakʼ aba (Lucas 18:9-14). Paso batel jech li kʼusi cha kʼan ta aorasione. Jaʼ jech cha vakʼ ta ilel ti oy xchʼunel avoʼonton xchiʼuk ti ta sjunul avoʼonton cha pas orasione. Jaʼ noʼox jech xuʼ stakʼbot aorasion ti Jeovae (Hebreos 11:6).