9 Xchanobil

Li yaj tuneltak Diose skʼan sakikuk

¿Kʼu yuʼun skʼan sakukutik ta skotol? (1)

¿Kʼusi smelolal li sakilal ta muyubtaelale? (2)

¿Xchiʼuk li sakilal ta talelale? (3)  ¿Xchiʼuk li sakilal ta nopbenalile? (4) ¿Xchiʼuk li sakilal ta kʼusitik kuʼuntike? (5)

¿Kʼusitik ibal sba loʼil ti mu stakʼ xkaltike? (6)

1. Sak xchiʼuk chʼul ti Jeova Diose. Li Stuke tskʼan ti buchʼutik chmuyubtaate akʼo sakikuk li ta muyubtael chakʼike, ta stalelalike, ta snopbenalike xchiʼuk li ta kʼusitik yuʼunike (1 Pedro 1:16). Skʼan xkakʼbetik ep yipal sventa sakukutik-o ta sat ti Diose. Nakalutik ta jun lum ti chʼabal sakilale. Xchiʼuk xtok, oy letovajel kuʼuntik ta skoj ti oy onoʼox ta koʼontontik ta spasel li kʼusitik chopole. Pe mu xkakʼ jbatik ta tsalel.

2. Sakilal ta muyubtaelal. Mi ta jkʼan chi jtunutik ta Jeovae, skʼan ta jlokʼes ta koʼontontik skotol li chanubtasel xchiʼuk kʼusitik nopem ta spasel li jecheʼ relijione. Skʼan chi jlokʼ li ta jecheʼ relijione xchiʼuk mu jkoltatik mi jsetʼuk (2 Corintios 6:14-18; Apocalipsis 18:4). Yuʼun mi la jchantik xa li melel ta sventa Diose, skʼan me jchabi jbatik ti mu me xi sloʼlautik li buchʼutik chchanubtas jutbil kʼopetike (2 Juan 10, 11).

3. Sakilal ta talelal. Jeova tskʼan ti buchʼutik chmuyubtaate akʼo jechuk stalelalik skotol ora jech kʼuchaʼal melel stsʼaklomtak Kristoe (1 Pedro 2:12). Li Stuke chil skotol li kʼusi ta jpastike, xchiʼuk xtok chil li kʼusitik ta jpastik ta mukule (Hebreos 4:13). Mu stakʼ jpastik li mulil ta jun vinik xchiʼuk jun ants xchiʼuk kʼusitik ibal sba ta pasel liʼ ta lume (1 Corintios 6:9-11).

4. Sakilal ta nopbenalil. Mi ta jnojes li jnopbenaltik ta kʼusitik sakike, li jtalelaltike sak ek (Filipenses 4:8). Pe mi jaʼ noʼox ta jnopilantik li kʼusitik ibal sbae, chopol kʼusitik ta jpastik (Mateo 15:18-20). Mu me jchʼay koʼontontik ta kʼusitik ti xuʼ xikʼubtas jnopbenaltike. Mi ta jchantik li sKʼop Diose, ta jnojes li jnopbenaltik ta kʼusitik sake.

5. Sakilal ta kʼusitik kuʼuntik. Kʼuchaʼal stsʼaklomtak Kristo ti chi jkʼopojutik ta Diose, skʼan sakukutik ta jbekʼtaltik xchiʼuk ta jkʼuʼ jpokʼtik. Jpok me jkʼobtik kʼalal mi li jsutal ta chʼayobbaile, xchiʼuk kʼalal mu to chi jveʼe xchiʼuk mi ta jpiktik veʼlile. Mi chʼabal sbe bu chlokʼ batel li ikʼal voʼ ta jnatike, skʼan xichʼ mukel li ikʼobalile (Deuteronomio 23:12, 13). Li sakilal ta kʼusitik kuʼuntike, jaʼ chi skoltautik sventa mu xi j-ipaj. Skʼan lek sak xchiʼuk lek chʼubabil ta yut xchiʼuk ta spat xokon snaik li stsʼaklomtak Kristoe. Skʼan xvinajik lek ta slakʼnatak ti lek sakike.

6. Sakilal ta kʼopojelal. Li yaj tuneltak Diose, jaʼ noʼox ta xalik li kʼusi melele. Li jut kʼopetike muʼyuk ta x-ochik li ta sReino Diose (Efesios 4:25; Apocalipsis 21:8). Muʼyuk chopol loʼiltabilik li stsʼaklomtak Kristoe. Muʼyuk ta xchikintaik mi jaʼuk ta xalik chopol loʼiletik mi jaʼuk ta xchopol ixtol loʼilajik. Ojtikinbilik ta yabtelik, ta chanob vun xchiʼuk bu nakalik ti sak skʼopojelike (Efesios 4:29, 31; 5:3).

[Lokʼol ta pajina 19]

Li yaj tuneltak Diose skʼan sakikuk ta skotol