10 Xchanobil

Li kʼusitik ta pasel ti tspʼaj Diose

¿Kʼuxi skʼan cha kʼel li kʼusitik chal Dios ti chopolike? (1)

¿Kʼusitik talelal ta lutsʼbail ti chopolik ta pasele? (2)

¿Kʼuxi skʼan skʼelik li jutbil kʼop li stsʼaklomtak Kristoe? (3)

¿Xchiʼuk li tajimol ta takʼine? (3)  ¿Xchiʼuk li elekʼe? (3)  ¿Xchiʼuk li majbaile? (4)  ¿Xchiʼuk li espiritismoe? (5)  ¿Xchiʼuk li yakubele? (6)

¿Kʼuxi xuʼ xi jkolutik ta spasel li kʼusitik chopole? (7)

1. Li yaj tuneltak Diose tskʼanik li kʼusitik leke, pe skʼan xchanik ta spʼajel ek li kʼusitik chopole (Salmo 97:10). Liʼe jaʼ smelolal ti mu stakʼ jpastik li kʼusitik tspʼaj ti Diose. ¿Kʼusitik jaʼ taje?

2. Mulivajel ti maʼuk ta nupunel. Li lutsʼbail kʼalal muʼyuk to nupunel, sloʼlael chiʼilil ta nupunel, slutsʼel chonetik, slutsʼel utsʼ alalil, lutsʼbail ta xchiʼil noʼox sbaik ta antsil xchiʼuk xchiʼil noʼox sbaik ta vinikale, jaʼ tsatsal muliletik ta skontra Dios (Levítico 18:6; Romanos 1:26, 27; 1 Corintios 6:9, 10). Mi oy jun vinik xchiʼuk jun ants jmoj nakalik ti muʼyuk nupunemike, skʼan xchʼak sbaik, mi moʼoje, akʼo nupunikuk ta svunal smantal ajvaliletik (Hebreos 13:4).

3. Jutbil kʼop, tajimol ta takʼin, elekʼ. Mu xuʼ sjut kʼop ti Jeova Diose (Tito 1:2). Jaʼ yuʼun, li krixchanoetik ti tskʼanik lek ch-ilatike mu stakʼ sjutik kʼop (Proverbios 6:16-19; Colosenses 3:9, 10). Skotol tajimoletik ta takʼine, ta xepajes li pichʼ oʼontonale. Jaʼ yuʼun, li stsʼaklomtak Kristoe muʼyuk ta xtajinik ta loteria mi jaʼuk ta xchʼay stakʼinik ta tsalbail ta kaʼetik mi jaʼuk ta kʼusiuk noʼox (Efesios 5:3-5). Mi jaʼuk ta x-elkʼajik mi jaʼuk ta smanik kʼusitik snaʼojik ti elkʼanbilike mi jaʼuk ta xichʼik batel kʼusitik muʼyuk akʼbilike (Éxodo 20:15; Efesios 4:28).

4. Kʼakʼal oʼontonal, majbail. Li ilinel muʼyuk spajebe xuʼ xi xujutik ta majbail (Génesis 4:5-8). Li jmajvanejetike mu xuʼ xamikoinik ti Diose (Salmo 11:5; Proverbios 22:24, 25). Muʼyuk lek ti ta jpaktik sutel mi oy buchʼu kʼusi chopol chi spasbutike (Proverbios 24:29; Romanos 12:17-21).

5. Tiʼavalil xchiʼuk espiritismo. Junantik krixchanoetike chikʼik tal li espirituetik sventa chkoltaatik ta xpoxtael chameletik. Yantike chilbajin skontraik sventa chakʼbeik xchamel o jaʼ to mi la smilike. Ta spasel skotol kʼusitik liʼe jaʼ ta snikes oʼontonal li Satanase. Jaʼ yuʼun, li stsʼaklomtak Kristoe mu stakʼ spasik mi jsetʼuk li kʼusitik liʼe (Deuteronomio 18:9-13). Li toj lek chabiel ta skontra li tiʼavalile jaʼ ti nopol oyukutik ta stojolal ti Jeovae (Proverbios 18:10).

6. Yakubel. Ta yuchʼel jutuk yaʼlel tsʼusub, chʼail voʼ xchiʼuk kʼusuk poxal, muʼyuk chopol (Salmo 104:15; 1 Timoteo 5:23). Pe ta yuchʼel ep xchiʼuk li yakubele muʼyuk lek chil ti Diose (1 Corintios 5:11-13; 1 Timoteo 3:8). Ta yuchʼel epe, xuʼ cha ipaj yuʼun xchiʼuk ta xchʼak avutsʼ avalal. Jech xtok, xuʼ cha skʼunibtasot ta spasel yantik kʼusitik chopol (Proverbios 23:20, 21, 29-35).

7. Li krixchanoetik ti tspasik li kʼusitik chal Dios ti mu xtune «mu xuʼuninik li sreino Diose» (Gálatas 5:19-21, NM). Mi cha kʼan ta melel ti Diose xchiʼuk cha kʼan cha lekubtasbe yoʼontone, xuʼ cha kol ta spasel li kʼusitik chopole (1 Juan 5:3). Chano ta spʼajel li kʼusi chal Dios ti jaʼ chopole (Romanos 12:9). Tsobo aba xchiʼuk krixchanoetik ti xvinaj ti chichʼik ta mukʼ ti Diose (Proverbios 13:20). Li jchiʼiltaktik ta stsʼaklinel Kristo ti yijubemik xa ta mantale, xuʼ ep chi skoltautik (Santiago 5:14). Pe li kʼusi toj tsots skʼoplal ta skotole, jaʼ ti xa pat avoʼonton ti oy koltael avuʼun ta orasion ta stojolal Diose (Filipenses 4:6, 7, 13).

[Lokʼol ta pajina 20, 21]

Diose tspʼaj li yakubele, li elekʼe, li tajimol ta takʼine xchiʼuk li majbaile