12 Xchanobil

Kichʼtik ta mukʼ li kuxlejal xchiʼuk li chʼichʼe

¿Kʼuxi skʼan ta jkʼeltik li kuxlejale? (1)  ¿Xchiʼuk li yalesel olole? (1)

Li stsʼaklomtak Kristoe, ¿kʼuxi chakʼik ta ilel ti yatoj yoʼontonik ta sventa li xchabiel xkuxlejalike? (2)

¿Mi chopol ta milel li chonetike? (3)

¿Kʼusitik chakʼ ta ilel ti muʼyuk ichʼbil ta mukʼ li kuxlejale? (4)

¿Kʼusi smantal Dios ta sventa li chʼichʼe? (5)

¿Xchiʼuk li yichʼel chʼichʼ xtoke? (6)

1. Jaʼ sNioʼal kuxlejal ti Jeovae. Skotol li kʼusi kuxajtike oy yilik ta Dios (Salmo 36:9). Ta sat Diose, chʼul li kuxlejale. Li xkuxlej jun olol ti muʼyuk to ayanem, ti oy to ta yut xchʼut smeʼe, toj ep sbalil chil ti Jeovae. Ta sat Diose, muʼyuk lek ti yalel chichʼ milel jun olol ti yakal to chchʼi ta yut xchʼut smeʼe (Éxodo 21:22, 23; Salmo 127:3).

2. Li melel stsʼaklomtak Kristoe yatoj yoʼontonik ta xchabiel xkuxlejalik. Tskʼelik lek ti mu xiʼeluk sba skaroik xchiʼuk snaik (Deuteronomio 22:8). Li yaj tuneltak Diose mu yaleluk ta xakʼik ta vokol xkuxlejalik ta skʼupinel kʼusiuk noʼox mi jaʼuk li ta kʼusi noʼox tskʼan yoʼontonike. Jaʼ yuʼun, muʼyuk ta spasik tajimol ti bu yalel ta syayijesik yantik krixchanoetike. Mu spasik li chʼayob oʼontonal ti chepajes li majbaile (Salmo 11:5; Juan 13:35).

3. Li jPasvaneje chal ti xkuxlejal chonetike chʼul ek. Li stsʼaklom Kristoe stakʼ smil chonetik sventa tstiʼ, tskʼuʼinbe snukulil, xpoxta xchamel xchiʼuk ti mi xibal sba xtiʼate (Génesis 3:21; 9:3; Éxodo 21:28). Pe muʼyuk lek ti mi jaʼ noʼox chkutsʼintatik xchiʼuk ta jmiltik chonetik ta tajimol noʼox xchiʼuk ta skʼupinel noʼoxe (Proverbios 12:10).

4. Sikʼolajel, smatsʼel moy xchiʼuk yan kʼusitik ti chchʼaybe sjol li krixchanoe, maʼuk sventa stsʼaklomtak Kristo. Ta spasel kʼusitik liʼe muʼyuk lek, yuʼun 1) ta smosovin li krixchanoe, 2) chakʼbe xchamel sbekʼtal xchiʼuk 3) ibal sbatak (Romanos 6:19; 12:1; 2 Corintios 7:1). Xuʼ van toj tsots ta iktael ta spasel li kʼusitik liʼe, pe mi ta jkʼan ta jlekubtasbetik yoʼonton ti Jeovae skʼan ta xkiktatik.

5. Ta sat Diose, li chʼichʼe jaʼ chʼul ek. Stuke chal ti chʼulelale, jaʼ xkaltik, li kuxlejale, te oy ta chʼichʼ. Jaʼ yuʼun mu stakʼ tiʼel li chʼichʼe. Jech xtok, mu stakʼ tiʼel sbekʼtal jkot chon ti mi muʼyuk lek lokʼesbil xchʼichʼele. Mi michʼbil noʼox snukʼ o mi ta jun petsʼ cham jkot chone, mu stakʼ tiʼel. Mi la jyichʼ milel ta jun lansa o mi ta tukʼe, skʼan lokʼesbel ta anil xchʼichʼel sventa stakʼ tiʼel (Génesis 9:3, 4; Levítico 17:13, 14; Hechos 15:28, 29).

6. ¿Mi chopol ta ichʼel li chʼichʼe? Vuleso ta ajol ti Jeovae mu skʼan xkichʼtik mi jsetʼuk. Liʼe jaʼ smelolal ti mu stakʼ jtikʼtik mi jsetʼuk ta buyuk jotukal jbekʼtaltik li xchʼichʼel yan krixchano; mi jaʼuk li jchʼichʼeltik mi kʼejbile (Hechos 21:25). Jaʼ yuʼun, li melel stsʼaklomtak Kristoe mu xichʼik li chʼichʼe. Pe ta xchʼamik xchiʼuk ta xichʼik yantik poxiletik ti muʼyuk yichʼoj chʼichʼe. Tskʼan chkuxiik, pe muʼyuk ta xiktaik ta xchʼunel smantaltak Dios sventa ta spoj xkuxlejalik (Mateo 16:25).

[Lokʼol ta pajina 25]

Sventa ta jlekubtasbetik yoʼonton ti Diose, skʼan mu xkichʼtik chʼichʼ, mu jpastik kʼusitik ibal sba xchiʼuk mu yaleluk xkakʼtik ta vokol jkuxlejaltik