13 Xchanobil

Kʼuxi xuʼ cha ta li melel relijione

¿Mi lek chil skotol relijionetik ti Diose, o mi jun noʼox? (1)

¿Kʼu yuʼun toj ep relijionetik ti chalik jaʼik stsʼaklomtak Kristoe? (2)

¿Kʼuxi xuʼ cha vojtikin buchʼutik jaʼ li melel stsʼaklomtak Kristoe? (3-7)

1. Jesus la slikes jun noʼox melel relijion stsʼaklom Kristo. Vaʼun chaʼa, kʼajomal noʼox jtsop melel jmuyubtasvanejetik yuʼun Jeova Dios oy ti jechuk li kʼakʼal liʼe (Juan 4:23, 24; Efesios 4:4, 5). Li Vivliae chchanubtasvan ti jutukik noʼox li buchʼu chanavik ta bikʼit be ti ch-ikʼvan batel ta kuxlejale (Mateo 7:13, 14).

2. Li Vivliae yaloj onoʼox ti kʼalal mi cham li jtakboletike, ta stsobobbailik stsʼaklom Kristo ta x-och jecheʼ chanubtasel xchiʼuk kʼusitik ta pasel ti maʼuk sventa stsʼaklomtak Kristoe. Ta tsʼakal oy viniketik ta sloʼla li jchʼunolajeletike xchiʼuk ta xchʼakananik ta stsʼaklinel li Kristoe (Mateo 7:15, 21-23; Hechos 20:29, 30). Jaʼ yuʼun chkiltik ep ta tos relijionetik, ti chalik ti jaʼik stsʼaklomtak Kristoe. ¿Kʼuxi xuʼ xkojtikintik li melel stsʼaklomtak Kristoe?

3. Li kʼusi toj lek xvinaj ti jaʼ ta melel stsʼaklomtak Kristoe jaʼ ti ta melel ta skʼanan sbaike (Juan 13:34, 35). Muʼyuk chanubtasbilik ta snopel ti xuʼ ta stoy sbaik ta skoj ti yan stsʼunbalik xchiʼuk ti yan yelan sbekʼtalike. Mi jaʼuk chanubtasbilik ta spʼajel krixchanoetik ti yan slumalike (Hechos 10:34, 35). Jaʼ yuʼun mi jaʼuk ta stikʼ sbaik ta junuk letovajel. Li melel stsʼaklomtak Kristoe ta xil sbaik kʼuchaʼal yutsʼ yalaltak sbaik (1 Juan 4:20, 21).

4. Li buchʼutik te oyik ta melel relijione oy to yan svinajebik, jaʼ ti ta sjunul yoʼontonik yichʼojik ta mukʼ li Vivliae. Yichʼojik ta mukʼ kʼuchaʼal sKʼop Dios xchiʼuk chchʼunik li kʼusi chale (Juan 17:17; 2 Timoteo 3:16, 17). Li sKʼop Diose jaʼ toj tsots skʼoplal ta xaʼiik, pe jaʼ muʼyuk li snopbenal xchiʼuk li kʼusitik nopem ta spasel li krixchanoetike (Mateo 15:1-3, 7-9). Skotol kʼakʼal chakʼbeik yipal ta yakʼel ta xkuxlejalik. Jaʼ yuʼun chakʼik ta ilel ti jech kuxulik kʼuchaʼal chchanubtasvanike (Tito 1:15, 16).

5. Li buchʼutik oyik ta melel relijione skʼan chichʼbeik ta mukʼ li sbi Diose (Mateo 6:9). Jesus la jyakʼ ta ojtikinel li sbi Diose, Jeova, li melel stsʼaklomtak Kristoe jech skʼan spasik ek (Juan 17:6, 26; Romanos 10:13, 14). ¿Buchʼutik chkʼopojik ta sbi Dios bu nakalote?

6. Li melel stsʼaklomtak Kristoe skʼan ta xcholik li sReino Diose. La xchol ti Jesuse. Li Stuke skotol ora kʼopoj ta sventa li Reinoe (Lucas 8:1). Xchiʼuk xtok, la jyalbe li stsʼaklomtak ti akʼo xcholik batel li aʼyej yuʼun Reino ta spʼejel li Balumile (Mateo 24:14; 28:19, 20). Li melel stsʼaklomtak Kristoe xchʼunojik ti jaʼ noʼox li sReino Dios ta xichʼ tal melel lekilal xchiʼuk chabielal ta Balumil (Salmo 146:3-5).

7. Li stsʼaklomtak Kristoe muʼyuk skapoj sbaik ta chopol lum (Juan 17:16). Mu skap sbaik ta kʼusitik tspasik li jtsop krixchanoetik ch-ajvalilajike mi jaʼuk tstikʼ sbaik ta kʼopetik ti oy ta lume. Muʼyuk chopol stalelik mi jaʼuk tspasik kʼusitik chopol nopem ta spasel xchiʼuk yelaniltak ti nopem ta spasel li lume (Santiago 1:27; 4:4). ¿Mi xa vojtikin li relijion bu nakalot ti xvinaj ti jech stalel xkuxlejalik kʼuchaʼal stsʼaklomtak Kristoe?

[Lokʼol ta pajina 27]

Li melel stsʼaklomtak Kristoe ta skʼanan sbaik, chichʼik ta mukʼ li Vivliae xchiʼuk ta xcholik li sReino Diose