16 Xchanobil

Li snopel avuʼun ti cha tun ta Diose

¿Kʼusi skʼan cha pas sventa cha vamikoin ti Diose? (1, 2)

¿Kʼuxi skʼan cha vakʼ aba ta stojolal Dios? (1)

¿Bakʼin skʼan cha vichʼ voʼ? (2)

¿Kʼuxi xuʼ tsta yip avoʼonton sventa tukʼ cha vakʼ aba ta stojolal ti Diose? (3)

1. Sventa cha vamikoin ti Diose, skʼan oy lek ojtikinelal avuʼun ta sventa li melel ta Vivliae (1 Timoteo 2:3, 4), skʼan cha vakʼ xchʼunel avoʼonton ta kʼusitik achanoj (Hebreos 11:6), skʼan cha sutes avoʼonton ta amultak (Hechos 17:30, 31) xchiʼuk skʼan cha vikta aba ta spasel li kʼusitik cha pas toʼoxe (Hechos 3:19). Vaʼun, li kʼanelal avuʼun ta Diose skʼan ta snikes avoʼonton sventa cha vakʼ aba ta stojolal. Liʼe jaʼ skʼan chal ti skʼan cha pas jun orasion kʼalal atuk noʼox oyot, sventa cha valbe Dios ti jaʼ xa yuʼunot sventa cha pas li kʼusi tskʼane (Mateo 16:24; 22:37).

2. Tana ti jech la xa achan li sKʼop Dios xchiʼuk ti la xa avakʼ aba ta stojolale, vaʼun skʼan cha vichʼ voʼ (Mateo 28:19, 20). Li ichʼ voʼe, chakʼbe yil yantik ti la xa avakʼ aba ta stojolal Jeova. Jaʼ yuʼun, jaʼ noʼox ta xichʼik voʼ li buchʼutik xtojobajik xa ta snopele, sventa tsnopik lek ti chtunik ta Diose. Kʼalal chichʼ voʼ jun krixchanoe, skʼan chmuki ta voʼ jlikeluk sjunlejala (Marcos 1:9, 10; Hechos 8:36).

3. Tana ti jech la xa avakʼ aba ne, Jeova tskʼan ti cha kuxi jech kʼuchaʼal la avalbe ta melele (Salmo 50:14; Eclesiastés 5:4, 5). Li Yavloe chakʼbe yipal sventa cha vikta aba ta spasbel yabtel ti Jeovae (1 Pedro 5:8). Pe nopajan ta stojolal Dios ta orasion (Filipenses 4:6, 7). Chanbo sKʼop skotol kʼakʼal (Salmo 1:1-3). Tsobilano aba ta tsobobbail (Hebreos 13:17). Mi cha pas skotol kʼusitik liʼe, tsta yip avoʼonton sventa tukʼ cha vakʼ-o aba ta stojolal ti Diose. Vaʼun, ¡xuʼ me spas avuʼun ta sbatel osil li kʼusi tskʼanbot ti Diose!

[Tsʼib ta yok vun]