Sventa oyuk avamikotake, skʼan cha pas aba ta amiko ek

Li amikoinele jaʼ kʼanbail. Mi cha chan batel sventa Jeovae, ta x-epaj li kʼanbail avuʼun xchiʼuk ti cha kʼan cha tun ta stojole. Liʼe cha snikes sventa cha pas aba ta stsʼaklom Jesukristo (Mateo 28:19). Xuʼ xa vamikoin ti Dios ta sbatel osil mi cha tsʼak aba ta muyubajel utsʼ alal yuʼun xrextikotak Jeovae. ¿Kʼusi skʼan cha pas voʼot sventa cha tsʼak aba xchiʼuk liʼike?

Chʼunbo smantaltak ti Diose, jaʼ jech cha vakʼ ta ilel ti cha kʼan ti Diose. “Me jkʼanojtik o li Diose, ta jchʼunbetik li smantaltake. Muʼyuk tsots ta chʼunbel chkaʼitik li smantaltake.” (1 Juan 5:3.)

Paso li kʼusitik cha chane. Jesus la yal jun loʼil ti chakʼ ta aʼyel smelol liʼe. Jun pʼijil vinik la spas sna ta ba ton, xchiʼuk li yan bol vinik la spas ta ba jiʼtik. Kʼalal tal mukʼta ikʼal voʼe, li na pasbil ta ba tone vaʼal kom, pe li na pasbil ta ba jiʼtike lom yalel. Jesus la yal ti krixchanoetik ti chaʼiik xchiʼuk chchʼunik li chanubtasel yuʼune jaʼ xkoʼolajik kʼuchaʼal li pʼijil vinik ti la spas sna ta ba tone. Pe li buchʼutik chaʼiik li chanubtasel yuʼune pe mu xchʼunik jaʼ xkoʼolajik kʼuchaʼal li bol vinik ti la spas sna ta ba jiʼtike. ¿Bu junukal ta xchibal viniketik cha kʼan jechukot? (Mateo 7:24-27.)

Akʼ aba ta Dios. Stakʼ cha pas mi cha valbe Jeova ta orasion ti cha kʼan cha pasbe ta sbatel osil li kʼusi tskʼane. Mi cha pas li kʼusi tskʼan Diose, ta xa vakʼ ta ilel ti jaʼot stsʼaklom Jesukristo (Mateo 11:29).

Ichʼo voʼ. “Ichʼo voʼ, akʼo ta pokel amul, kʼanbo vokol ta stojol li Kajvaltike.” (Hechos 22:16.)

Tunan ta Dios skotol avoʼonton. “Skotol ti kʼusi cha pasike yutsiluk me avoʼntonik cha pasik yuʼun jaʼ cha abtejik yuʼun ti Kajvaltike [Jeova, NM], maʼuk noʼox cha abtejik yuʼun krixchanoetik” (Colosenses 3:23, LS [H].)