Jambo lek smelolal li kʼusitik mas tsotsik skʼoplale

¿KʼUSITIK li mas tsotsik skʼoplal ta jun mantale? Jaʼ li kʼusitik tsots skʼoplal skʼan xaval venta xkʼot ta pasel li kʼusi anopoj chakʼan akʼo spasik li buchʼu te chaʼibote, jaʼ yuʼun skʼan xavalbe lek skʼoplal xchiʼuk mu jlikeluk noʼox xata ta alel.

Jtos kʼusi lek ta pasele jaʼ ti xatʼuj lek xchiʼuk ti xcholet xatsʼiba sventa xavakʼ lek ta aʼiel li kʼusitik mas tsotsik skʼoplale. Jutuk mu skotoluk velta kʼalal chachapan abae, ep tajek chata aʼyejetik ti xuʼ van muʼyuk chatunes skotole. ¿Kʼuxi xuʼ xatʼuj ti kʼusitik chatunese?

Baʼyel: teuk ta ajol li buchʼutik te chaʼiike. ¿Mi ep ti jaʼ to sba velta chaʼiik li kʼusi chavalbe skʼoplale o mi snabeik xa lek skʼoplal? ¿Mi xchʼunoj skotolik ti jaʼ jech chchanubtasvan Vivlia li kʼusi chavalbe skʼoplale o mi moʼoj? ¿Kʼusi vokolil tsnuptanik jujun kʼakʼal ta skoj ti chakʼik persa yakʼel ta xkuxlejalik li kʼusi chavalbe skʼoplal ti lokʼem ta Vivliae? Xchibal: nopo lek baʼyel kʼusi chakʼan akʼo spasik li buchʼutik te oyik ta sventa li kʼusi chavalbe skʼoplale. Teuk ta ajol li chaʼtos taje, vaʼun kʼelo lek li aʼyejetik ataoj ta saʼele xchiʼuk jaʼ noʼox xatunes li butik sta-oe.

Jaʼ noʼox me xatunes mi cha-akʼbat junuk voskejo ti te xa onoʼox chal li kʼusi chavalbe skʼoplale xchiʼuk mi yichʼoj tal li kʼusitik mas tsotsik skʼoplale. Pe mas to me tstabeik sbalil kʼalal chaval batel lek li kʼusitik mas tsotsik skʼoplal mi chatsak ta venta li chaʼtos laj xa kalbetik skʼoplal echʼ parafoe. Mi muʼyuk la-akʼbat avoskejoe, voʼot skʼan xatʼuj li kʼusitik mas tsotsik skʼoplale.

Mas me kʼun chavaʼi ta sjelubtasel mantal xchiʼuk mas tstabeik sbalil yantik mi te oy lek ta ajol li kʼusitik mas tsotsik skʼoplale xchiʼuk li sprevailtak ti chakʼ ta ilel ti jaʼ melele.

Kʼutik yelan xuʼ xcholet xatsʼiba li apartee. Ep kʼutik yelan xuʼ jpastik sventa lekuk xcholet xkaltik batel li jpartetike. Mi latojob stunesele, maʼuk noʼox van jtos lek chavaʼi stunesel ta skoj ti jeltos kʼusi chakʼan akʼo spasik li buchʼutik te chaʼiike.

Li baʼyel kʼusi xuʼ skoltaote jaʼ ti xachʼak li kʼusitik mas tsotsik skʼoplale. (Jtunel skotol li kʼusitik mas tsotsik skʼoplale, yuʼun jaʼ tsjambe smelolal li kʼusi chkalbetik skʼoplale o sventa xkʼot ta pasel li kʼusi ta jkʼantik akʼo spasike.) Li xchibal kʼuxi xuʼ xavetʼese jaʼ ti xcholet xavalbe skʼoplal li kʼusitike. (Jaʼ jun skʼelobil liʼe: baʼyel chkalbetik skʼoplal kʼusi kʼot ta pasel kʼalal skʼan toʼox xtal li Nojelal ta voʼe, laje chkaltik kʼusi kʼot ta pasel kʼalal skʼan toʼox xichʼ lajesel li Jerusalen ta sjabilal 70 ta jkʼakʼaliltike, ta slajebal une chkaltik ta sventa li jkʼakʼaliltike.) Li yoxibal kʼusi xuʼ skoltaote jaʼ ti xaval kʼusi chichʼ pasel xchiʼuk kʼusi chkʼot ta pasel yuʼune. (Xuʼ jaʼ xaval baʼyel li kʼusi chichʼ pasele o baʼyel li kʼusi chkʼot ta pasel yuʼune. Xuʼ van xavalbe skʼoplal jtosuk kʼusi chkʼot ta pasel avi, jaʼ xkaltik, li kʼusi chkʼot ta pasel yuʼune, laje albo skʼoplal kʼusi ta skoj, jaʼ xkaltik, li kʼusi chichʼ pasele.) Ta xchanibale jaʼ ti xavalbe smelolal li kʼusi mu xkoʼolaj skʼoplale. (Xuʼ xavakʼ ta ilel ti jelel li kʼusi lek xchiʼuk li kʼusi chopole o li kʼusi oy sbalil xchiʼuk li kʼusi chakʼ vokolile.) Xuʼ xatunes jtoschaʼtosuk li ta junantik apartee.

Kʼalal laj yichʼ sabel smul li Estebane, lek xcholet laj yal kʼalal la spak skʼoplal ta Sanedrin yuʼun judaetike. La stʼuj lek kʼusi laj yal jech kʼuchaʼal chal ta Echos 7:2 kʼalal ta 53. Baʼyel laj yalbe lek skʼoplal kʼusitik ti lek xchʼunojik li buchʼutik te chchikintabate, vaʼun laj yalbe skʼoplal ti tunesat yuʼun Dios li Josee sventa tskolta xchiʼiltak ta vokʼel manchuk mi pʼajat yuʼun li xchiʼiltak ta vokʼele. Laje laj yalbe skʼoplal ti muʼyuk la xchʼunbeik smantal Moises li judaetike, ti jaʼ vaʼanbil yuʼun Diose. Ta slajebale jamal laj yal ti xkoʼolaj stalelalik li buchʼutik la smilik Jesus xchiʼuk li judaetik ta mas voʼnee.

Mu toj epuk xaval li kʼusitik mas tsotsik skʼoplale. Kʼusuk noʼox ti chavalbe skʼoplale, mu persauk ep ta tos kʼusi skʼan xaval. Manchuk mi 5 minuto, mi 10 minuto, mi 30 minuto o mas jal chakʼopoj, mu me xjelav ta voʼtos li kʼusitik mas tsotsik skʼoplale. Mu xavakʼ ta aʼiel ti tsots skʼoplal skotole, yuʼun jaytos noʼox chkom ta sjolik. Mi mas jal chavetʼese, mas skʼan xavakʼ ta aʼiel li kʼusitik mas tsotsik skʼoplale xchiʼuk mas anil skʼan xaʼibeik smelolal.

Chapbo lek smelolal skotol mu ventauk ti jaytos li kʼusitik mas tsotsik skʼoplale, akʼbo lek yorail sventa xaʼibeik lek smelolal li buchʼutik te oyike xchiʼuk ti xkom ta sjolike.

Skʼan kʼunuk ta aʼibel smelolal ti kʼu yelan chavetʼes li apartee, mu persauk toj ep li kʼusi chavale. Mi lek achʼakojan ta jaytos noʼox li kʼusitik mas tsotsik skʼoplal chaval batele, kʼun chaʼibeik batel smelolal xchiʼuk mas chkom ta sjolik.

Albo lek skʼoplal li kʼusitik mas tsotsik skʼoplale. Mi xcholet lek achapanoj li apartee, kʼun ta albel smelolal chavaʼi li kʼusitik mas tsotsik skʼoplale.

Sventa xavalbe lek skʼoplale, skʼan xavalbe sprevail ti jaʼ ta melele, alo tekstoetik xchiʼuk yan kʼusitik ti tsjambe mas smelolal li kʼusitik mas tsotsik skʼoplale. Li kʼusitik mu masuk tsots skʼoplale jaʼ sventa sjambe mas smelolal, chakʼ ta ilel ti melele o sventa xcholet xal batel li kʼusitik mas tsotsik skʼoplale, jaʼ yuʼun mu xa me kʼusi yan xaval manchuk mi labalik sba ta aʼiel. Jamal xaval kʼuxi snitojbe sba skʼoplal li kʼusitik mas tsotsik skʼoplal xchiʼuk li kʼusitik mu masuk tsotsik skʼoplale, vaʼun jech chaʼibeik lek smelolal. Jech oxal, skʼan xavalilan li jaypʼel kʼop ti jaʼ chakʼ ta aʼiel li kʼusi mas chavalbe skʼoplale o ti nopajtik xaval li kʼusitik mas tsotsik skʼoplale.

Jlom jelubtasej mantale ta numero chalik batel li kʼusitik mas tsotsik skʼoplale. Manchuk mi jtunel onoʼox ti jech tspasike, jaʼ me mas jtunel ti xichʼ jambel lek smelolal li kʼusitik mas tsotsik skʼoplal ta junuk partee.

Xuʼ van xi xapas xtoke, baʼyel xaval li kʼusi mas tsots skʼoplal kʼalal muʼyuk to avaloj li sprevail ti jech ta melele. Jech chakolta sventa oyuk sbalil xilik li kʼusi chavale xchiʼuk jech chavakʼ ta aʼiel lek li kʼusi mas tsots skʼoplale. Mas to jamal lek smelolal chkom xtok mi chaval to ta jpʼelchaʼpʼeluk noʼox kʼop mi laj xaʼox avalbe lek smelolal li kʼusitik mas tsotsik skʼoplale.

Li kʼusi skʼan jpastik ta cholmantale. Li mantaletik taje, maʼuk noʼox jtunel kʼalal ta jelubtastik mantale, jtunel xtok kʼalal ta jcholtik mantale. Teuk ta ajol kʼusi tsvul-o yoʼonton li krixchanoetik kʼalal chachapan abae, vaʼun nopo kʼusi chavalbe skʼoplal sventa xavakʼbe yil kʼusi chal Vivlia ti tspat koʼontontike. Xuʼ van xatʼuj chaʼtosuk li kʼusitik mas tsotsik skʼoplal sventa xcholet xaval batel li atemae. Nopo kʼuxi chkʼot alikes aloʼil mi atʼujoj xaʼox kʼusitik tekstoal chatunese. Kʼalal jech chachapan abae, jaʼ tskoltaot sventa xuʼ xajel mi jech skʼan chavil kʼalal chaloʼilaj xae xchiʼuk tskoltaot xtok sventa oyuk kʼusi xavalbe ti mu xchʼay ta sjol li buchʼu chachiʼin ta loʼile.