Kapitulo 1
¿Kʼusi smelolal ti tsobol chkichʼtik ta mukʼ Dios ta jkʼakʼaliltike?
1, 2. 1) ¿Kʼusi toj labal sba yakal chkʼot ta pasel ta jkʼakʼaliltik? 2) ¿Kʼusi alakʼ sba spatobil yoʼonton oy li buchʼutik tukʼ yoʼontonike?
TA SPʼEJEL Balumil oy kʼusi toj labal sba yakal chkʼot ta pasel: yakal ta xichʼik tsobel talel krixchanoetik ta skotol balumil, ta jujuchop stsʼunbalik xchiʼuk ta jujuchop skʼopik sventa chtal yichʼik ta mukʼ li Diose. Yantik x-epaj batel jujun jabil. Li epal krixchanoetik taje yajrextikotak Jeova sbi akʼbilik yuʼun li Vivliae xchiʼuk jaʼik la «epal cristianoetic» ti «cʼacʼal [...] acʼubal [...] chtunic» ta stojolal Diose (Isaías 43:10-12; Apocalipsis 7:9-15). ¿Kʼu yuʼun jech ta spasik? Yuʼun kʼalal ta xojtikinik li Jeovae, li jun noʼox melel Diose, solel ch-ayan ta yoʼontonik ta yakʼel ta xkuxlejalik li stukʼil mantaltake. Jech noxtok, xchanojik ti kuxulutik ta «slajebal cʼacʼale» ti poʼot xa chakʼbe slajeb Dios skotol li kʼusitik chopol chkiltik tanae, mi laje ta xichʼ talel jun paraiso (2 Timoteo 3:1-5, 13; 2 Pedro 3:10-13).
2 Li sKʼop Diose xi chal ta melele: «Mu xa jaluc liʼ oy li bochʼotic chopolique [...]. Yan li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o», xi (Salmo 37:10, 11). «Ti buchʼu oy slequil ti cʼusi ta spasique, ta xrextoinic ti banomile, sbatel osil ta xnaquiic tey.» (Salmo 37:29, Ch.) «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque.» (Apocalipsis 21:4.)
3. ¿Kʼusi yakal chkoltavan sventa jmojuk tsobol chichʼik ta mukʼ Dios li krixchanoetike?
3 Li krixchanoetik ti yichʼojik xa tsobel talel sventa chichʼik ta mukʼ ta melel li Diose, jaʼ me baʼyel chkʼot nakiikuk ta achʼ balumil. Xchanojik xa li kʼusi tskʼan yoʼonton Jeovae xchiʼuk yakal xa chakʼbeik yipal spasel. Li Jesuse laj yakʼ ta ilel ti toj tsots skʼoplal skʼan jech xichʼ pasel kʼalal xi laj yale: «Ti jech ta xcuxiic sbatel osile, yuʼun xa yotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale», xi (Juan 17:3). Yan li jtakbol Juane xi la stsʼibae: «Li banamile xchiʼuc li cʼusi chacʼ batuc coʼntontic yuʼune, ta onoʼox xlaj; yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil», xi (1 Juan 2:17).
Li melel smelolale
4. 1) ¿Kʼusi smelolal ti chichʼ tsobel talel epal krixchanoetik sventa jmojuk chichʼik ta mukʼ Dios ta jkʼakʼaliltike? 2) ¿Kʼuxi chal kaʼitik Vivlia ti kʼu yelan tstsob sbaik li krixchanoetike?
4 ¿Kʼusi smelolal ti chichʼ tsobel talel epal krixchanoetik sventa jmojuk chichʼik ta mukʼ Dios ta jkʼakʼaliltike? Taje jaʼ svinajeb ti toj nopol xa oyutik ta slajebal li kʼusitik toj chopol ta balumile, vaʼun ta xtal li achʼ balumil yuʼun Diose. Jkotoltik kilojtik ta jsatik ti kʼotem xa ta pasel li albil kʼopetik ta Vivlia ti laj yal kʼuyelan ta stsob sbaik li krixchanoetik sventa chichʼik ta mukʼ li Diose. Jun li albil kʼop taje xi chale: «Cʼalal slajebaltic xa batel cʼacʼale [li slajebal kʼakʼal liʼe], li vits yoʼ bu oy xchʼulna Mucʼul Diose [li smukʼul melel ichʼel ta mukʼe] jaʼ noʼox stuc toyol vits ta xcʼot [...]. Jaʼ te ta xtalic ta stojol li cristianoetic ta yantic lume. Ep yantic banamil ta xtalic, jech chalic: “Laʼic me, muycutic batel ta vits yuʼun li Mucʼul Diose; batic ta xchʼulna li Dios yuʼun Jacobe. Jech xuʼ chixchanubtasutic ta stamel li be yuʼune, jech xuʼ cuʼuntic ta jtambetic o batel li be yuʼune”», xi (Miqueas 4:1, 2; Salmo 37:34).
5, 6. 1) ¿Kʼusi smelolal ti tstsob sbaik talel mukʼtikil lumetik ta stojolal Jeovae? 2) ¿Kʼusitik skʼan jakʼbe jbatik?
5 Manchuk mi mu sjunuluk mukʼtikil lum chtal yichʼik ta mukʼ ti Jeovae, pe ta smiyonal noʼox chlokʼik talel ta jujun mukʼtikil lum ti chnopajik talel ta stojolal li Diose. Li krixchanoetik taje laj xa yojtikinik li kʼusi tskʼan yoʼonton Jeovae xchiʼuk li slekil talelale, taje jaʼ chkʼot tajmek ta yoʼontonik. Bikʼit yakʼoj sbaik ta yakʼbel yipal xchanel li kʼusi chkʼanbatik yuʼun Diose, jech ta xalik kʼuchaʼal li jtsʼibajom yuʼun Salmo ti xie: «Chanubtasun ta spasel li cʼusi tscʼan avoʼntone, yuʼun voʼot Diosot cuʼun», xi (Salmo 143:10).
6 ¿Mi te achiʼuk li epal krixchanoetik ti tsobbilik yuʼun Jeova sventa ch-ichʼat ta mukʼe? ¿Mi chavakʼ ta ilel ti avabinojbe xa lek smelolal ti te chlik tal ta stojolal Jeova li chanubtasel cha chan ta Vivliae? ¿Bu to kʼalal cha xanav batel «li [ta] be yuʼune»?
¿Kʼuxi xuʼ ta stsob sbaik talel?
7. 1) ¿Bu to kʼalal ta xichʼik tsobel sventa chichʼik ta mukʼ li Diose? 2) ¿Kʼu yuʼun anil xa noʼox skʼan xkichʼtik ta mukʼ li Jeova tanae, xchiʼuk kʼuxi xuʼ jkoltatik yan krixchanoetik ti akʼo jech spasik eke?
7 Li Jeovae oy ta yoʼonton ti skotoluk li kʼusitik kuxajtik ti pʼijik spasoje akʼo stsob sbaik sventa lek chichʼik ta mukʼ li Diose. ¡Oy tajmek ta koʼontontik ti akʼo xkʼot skʼakʼalil ti xichʼik ta mukʼ li jun noʼox melel Diose! (Salmo 103:19-22.) Pe kʼalal mu to chkʼot ta pasel taje, li Jeovae ta xakʼbe slajeb skotol li buchʼutik mu skʼan xchʼunbat li Stukʼil mantaltake. Li Jeovae ta slekil yoʼonton ta xalbe krixchanoetik ti kʼusi snopoj ta spase, jech oxal chakʼbe to yorail sventa xuʼ snopik mi tsjel li stalelalike (Isaías 55:6, 7). Jaʼ yuʼun chaʼa, li ta jkʼakʼaliltike ta xichʼ albel «scotol jnaclumetic ta jujun banamil, ta jujuchop stsʼunubalic, ta jujuchop cʼop, xchiʼuc ta jujun lum» li mantal ti anil skʼan chʼunele: «Xiʼanic me yuʼun li Diose; albeic slequilal. Yuʼun laj xa sta yorail chchapanvan. Ichʼic me ta mucʼ, yuʼun jaʼ la spas li vinajel banamile, xchiʼuc li nabetique, xchiʼuc scotol li nioʼetique» (Apocalipsis 14:6, 7). ¿Mi atsakoj xa ta venta li takel ta ikʼel taje? Mi jaʼ jeche, oy jun amoton unbi, jaʼ ti chavalbe batel yan krixchanoetik sventa xojtikinik li melel Diose xchiʼuk ti akʼo xichʼik ta mukʼe.
8. Kʼalal mi laj yichʼ chanel li kʼusitik baʼyel skʼan chanel li ta Vivliae, ¿kʼusitik skʼan xkakʼbetik yipal ta spasel ta sjunul koʼontontik?
8 Jech un chaʼa, li Jeovae maʼuk jech ta skʼan ti xtal ichʼatuk ta mukʼ yuʼun krixchanoetik ti naka noʼox chalik ti xchʼunojike pe ti jaʼ noʼox batem ta yoʼontonik li kʼusi tskʼan stukike. Li kʼusi tskʼan Diose chaʼa, jaʼ «ti acʼo [jnaʼtik] lec cʼusi tscʼan yoʼnton[e]» xchiʼuk ti akʼo xkakʼtik ta ilel ta jkuxlejaltike (Colosenses 1:9, 10). Jech oxal chaʼa, li buchʼu chchan li kʼusitik baʼyel skʼan chanel ta Vivliae xchiʼuk ti oy ta yoʼonton stojel ta vokole, chakʼ ta yoʼonton chchʼi batel jaʼ to ti mi yijub ta mantale. Li kʼusi skʼan mas oyuk ta yoʼontone jaʼ ti akʼo xojtikin mas li Jeovae, ti xaʼibe mas smelolal li sKʼope xchiʼuk ti chakʼ batel ta xkuxlejal skotol li kʼusi ta xchane. Chakʼbe yipal ta xchanbel stalelal li jTotik ta vinajele xchiʼuk chakʼbe yipal ta yaʼibel smelolal ti kʼuyelan chil kʼusitik li Jeovae. Kʼalaluk jech ta spase, ta xtijbat yoʼonton ta skʼelel kʼuyelan xuʼ tspas li abtelal sventa kolebal ti yakal chichʼ pasel ta Balumil ta jkʼakʼaliltik ti tsbeiltas Diose. ¿Mi jech oy ta avoʼonton ek? (Marcos 13:10; Hebreos 5:12–6:3.)
9. ¿Kʼu yelan chkʼot ta pasel ti tsobol chichʼ ichʼel ta mukʼ li Jeovae?
9 Li Vivliae ta xal ti skʼan jmojuk tsobolik li buchʼutik chtunik ta stojolal Jeovae (Efesios 4:1-3). Manchuk mi kuxulutik ta jun balumil ti mu koʼoluk jnopbentike xchiʼuk ti yakal to ta xkakʼbetik yipal stsalel li jchoplejaltike, xuʼ xa me jmoj tsobol li slumal Jeovae. Li Jesuse ta sjunul yoʼonton la skʼanbe ta orasion Dios ti akʼo jmojikuk li yajtsʼaklomtake, ti akʼo skʼupinik ti jun yoʼonton tsobolik ta melele. ¿Kʼusi smakoj batel taje? Li kʼusi mas tsots skʼoplale jaʼ ti lek oyikuk ta stojolal Jeova xchiʼuk ta stojolal li xNichʼone xchiʼuk noxtok skʼan me lek oyikuk ta stojolal li xchiʼiltakik ta chʼunolajele (Juan 17:20, 21). Sventa jech chkʼot ta pasel taje, li tsobobbail yuʼun yajtsʼaklomtak Cristoe jaʼ me li s-organisasion Jeova ti tstunes sventa chchanubtas li slumale.
¿Kʼusitik xuʼ chi skoltautik sventa jmojuk tsobolutik?
10. 1) Kʼalaluk ta jtunes jVivliatik ta stakʼel li sjakʼobiltak ti oy ta koʼontontike, ¿kʼusi ta jtatik kʼalal jech ta jpastike? 2) Kʼelo lek li kʼusitik xuʼ chkoltavan sventa jmoj tsobolikuk li yajtsʼaklomtak Cristoe xchiʼuk takʼo li sjakʼobiltak tee.
10 Tana liʼe ta xkaltik vuktos kʼusitik toj tsotsik skʼoplal ti tskoltautik sventa jmoj tsobolutik ta yichʼel ta mukʼ li Diose. Kʼalal mi laj atakʼ li sjakʼobiltak tee, nopo me lek kʼuxi xuʼ cha skoltaot ta sventa ti kʼuyelan chavil abaik xchiʼuk li Jeovae xchiʼuk li avermanotake. Snopbel lek smelolal taje xchiʼuk saʼel li tekstoetik ti muʼyuk te lokʼtabile jaʼ me cha skoltaot stael li apʼijil ti te chlik tal ta stojolal Diose, ti cha chan lek snopele xchiʼuk ti xa naʼ lek skʼelel li kʼusi leke xchiʼuk li kʼusi chopole, talelaletik ti toj tunelik kuʼuntike (Proverbios 5:1, 2; Filipenses 1:9-11). Kʼelo lek ta jujuntal.
1) Jnaʼojtik lek ti jaʼ oy sderecho Jeova ta yalel li kʼusi leke xchiʼuk li kʼusi chopole. «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be.» (Proverbios 3:5, 6.)
¿Kʼu yuʼun skʼan jsaʼtik li tojobtasel xchiʼuk li beiltasel chakʼ Jeova kʼalal oy kʼusi ta jnop ta jpastike? (Salmo 146:3-5; Isaías 48:17.)
2) Chi sbeiltasutik li sKʼop Diose. «Cʼalal laj avaʼyic li scʼop Dios la jcholcutic avaʼyique, lec laj avichʼic ta mucʼ. Muc xanopic ti yaʼyej noʼox cristianoe. Laj achʼunic ti jaʼ scʼop Diose, ti jaʼ melele, jech te ch-abtej o ta avoʼntonic voʼoxuc ti achʼunojique.» (1 Tesalonicenses 2:13.)
¿Kʼu yuʼun xibal sba ti kʼalal jaʼ noʼox ta jpastik li kʼusi lek chkil jtuktik «ta alele»? (Proverbios 14:12; Jeremías 10:23, 24; 17:9.)
Mi mu jnaʼtik kʼusi chal Vivlia ti kʼusi lek ta pasel ta sventa jtosuk kʼusie, ¿kʼusi skʼan jpastik? (Proverbios 2:3-5; 2 Timoteo 3:16, 17.)
3) Jkotoltik jmoj ta jbalintik li veʼlil ta mantal chakʼ Jeovae. Li Jeova xi laj yale: «Vuʼun ta jchanubtas jtuc li avalab anichʼnabe», xi (Isaías 54:13). «Jsaʼilantic cʼu sʼelan yoʼ ta jcoltaan jbatic ta jujun tal, yoʼ jech cʼux ta xcaʼi jbatic, xchiʼuc ta spasel ti cʼusi leque. Maʼucuc jchanbetic yoʼntonic ti buchʼutic laj xa yicta sbaic ti mu xa xcʼotic ta tsobobbail cuʼuntique, yuʼun jaʼ noʼox tsots scʼoplal scʼan ti acʼo jtsatsubtasbe jba coʼntontic ta jujun tale, yuʼun nopol xa talel scʼacʼalil [li lajelale].» (Hebreos 10:24, 25, Ch.)
¿Kʼusitik sbalil tstabeik li buchʼutik tslajesik lek li veʼlil ta mantal chakʼ Jeovae? (Isaías 65:13, 14.)
4) Li Kajvaltik o Jbeiltasvanej kuʼuntike maʼuk jun krixchano, jaʼ me li Jesucristoe. «Li voʼoxuque mu me jaʼuc lec xavaʼyic ti “Jchanubtasvanej” xi acʼoplalique. Yuʼun jun noʼox li jchanubtasvanej avuʼunique. Li voʼoxuque achiʼil noʼox aba acotolic. Mu me bochʼo xacuy ta atotic liʼ ta banamile. Yuʼun jun noʼox li Atotic te oy ta vinajele. Mu me jaʼuc lec xavaʼyic ti “Cajval” xaʼutatique. Yuʼun jun noʼox li Avajvalique, jaʼ li Cristoe.» (Mateo 23:8-10.)
¿Mi lek van ti tstoy sba junuk krixchano ta stojolal li yantike? (Romanos 3:23, 24; 12:3.)
5) Oy ta koʼontontik ti kʼajomal noʼox jaʼ spatobil koʼontontik li Ajvalilal yuʼun Diose. «Li voʼoxuque jaʼ jech xacʼopanic Dios chac liʼi: “Jtotic Dios, te oyot ta vinajel, ichʼbiluc ta mucʼ abi. Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele[”]. Jaʼ yuʼun tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane.» (Mateo 6:9, 10, 33.)
«Tscʼan baʼyuc chavacʼ abaic ta ventainel yuʼun li Diose», xi chal li Vivliae, taje ¿kʼuxi chkoltavan sventa jmojuk tsobolutik? (Miqueas 4:3; 1 Juan 3:10-12.)
6) Li chʼul espiritue jaʼ tskolta li yajtuneltak Jeovae, sventa xchʼi stalelalik ti toj tsotsik skʼoplal sventa jechuk jmoj tsobolik xchiʼuk li xchiʼiltakik ta chʼunolajele. «Li yabtel Chʼul Espiritue jaʼ jech chac liʼi: ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc, jnaʼtic spajesel jbatic.» (Gálatas 5:22, 23.)
¿Kʼusi skʼan jpastik sventa ch-abtej ta jtojolaltik li xchʼul espiritu Diose? (Hechos 5:32.)
Kʼalal oy ta jtojolaltik li xchʼul espiritu Diose, ¿kʼuxi ch-abtej sventa lek xkil jbatik xchiʼuk li jchiʼiltaktik ta chʼunolajele? (Juan 13:34, 35; 1 Juan 4:8, 20, 21.)
7) Skotol li buchʼutik ta xichʼik ta mukʼ ta melel li Diose ta xalik batel li lekil aʼyejetik ta sventa li Ajvalilal yuʼune. «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale.» (Mateo 24:14, Ch.)
¿Kʼusi skʼan stij koʼontontik ta spasel mas li abtelal ta xcholel mantale? (Mateo 22:37-39; Romanos 10:10.)
11. ¿Kʼusi ta jtatik kʼalal chkakʼ ta jkuxlejaltik li mantaletik ta Vivliae?
11 Kʼalal jmoj tsobolutik ta yichʼel ta mukʼ li Jeovae jaʼ chi jnopaj-o mas ta stojolal xchiʼuk ta jkʼupintik ta xchiʼinel ta loʼil li jchiʼiltaktik ta chʼunolajele. Li Salmo 133:1 xi ta xale: «Qʼuelavilic, toj lec, toj jun yutsil cʼalal lec coʼol coʼntontic ti cutsʼ calal jbatique», xi. Ta melel, tstsatsubtas koʼontontik ti chi jnamajutik lokʼel ta stojolal li buchʼutik jaʼ tsaʼik li kʼusi tskʼan stukike, li buchʼutik chmulivajike xchiʼuk li buchʼutik nopem xaʼiik majbaile, yuʼun chtal jtsob jbatik xchiʼuk li krixchanoetik ti ta sjunul yoʼonton skʼanojik li Jeovae xchiʼuk ti chchʼunbeik li smantaltake.
Mu me jpastik li kʼusi xuʼ chchʼakutike
12. ¿Kʼu yuʼun skʼan mu jechuk jchantik ti ta jchʼak jbatik ta stojolal li Diose?
12 Sventa mu jsokestik ti tsobolutik ta spʼejel Balumil ta yichʼel ta mukʼ li Diose skʼan me mu jpastik li kʼusi xuʼ chchʼakutike. Jtose jaʼ ti kʼalal xchʼakoj sbaik ta stojolal Dios xchiʼuk ti muʼyuk chchʼunbeik li smantaltake. Li Jeovae ta skoltautik sventa mu jechuk jpastik kʼalal chalbutik buchʼu yakʼojbe slikeb li talelaletik taje: jaʼ li Diablo Satanase (2 Corintios 4:4; Apocalipsis 12:9). Jaʼ li buchʼu laj yalbe Adán xchiʼuk Eva ti akʼo mu xchʼunbeik smantal li Diose xchiʼuk ti akʼo la mu xichʼbeik ta venta li kʼusi tskʼan yoʼonton kʼalal oy kʼusi tsnop tspasike, ta skoj taje la saʼ svokolik xchiʼuk laj yakʼ tal jvokoltik ek (Génesis 3:1-6, 17-19). Kuxulutik ta jun lum ti bu toj ep chʼakbaile, jech oxal toj tsots skʼoplal ti mu me xkakʼtik akʼo sokesutik li talelal taje.
13. ¿Kʼuxi chvinaj ti yakal xa ta jchapan jbatik ta sjunul koʼontontik ti ta jkʼan chi jkuxiutik li ta achʼ tukʼil balumil yuʼun Diose?
13 Jnoptik li kʼusi alakʼ sba yaloj ta melel Jeovae, ti chopol balumil liʼe ta sjel ta achʼ vinajel xchiʼuk ta achʼ balumil «ti bu puru tucʼ xa cʼusitic te oye» (2 Pedro 3:13). Taje, ¿mi mu jaʼuk tstij koʼontontik ta xchapanel jbatik sventa xi jkuxiutik ta skʼakʼalil ti bu naka xa tukʼilal oye? Taje jaʼ smelolal ti skʼan xkaʼibetik smelolal li mantal ti xi chale: «Mu me xbat avoʼntonic yuʼun li cʼusi sventa banamile xchiʼuc li cʼusitic chopol oy ta banamile. Li bochʼo jaʼ batem yoʼnton ta sventa banamile, jaʼ muʼyuc scʼanoj o li Jtotic Diose», xi (1 Juan 2:15). Jech oxal chaʼa, mu me jchanbetik stalelal li krixchanoetike —ti xchʼakoj sbaike, ti jaʼ tsaʼ li kʼusi tskʼan stukike, ti chmulivajike xchiʼuk ti tsmaj sbaike— jaʼ lek jnopes jbatik ta xchikintabel smantal li Jeovae xchiʼuk ta sjunuluk me koʼontontik jchʼunbetik, manchuk mi muʼyuk nopem xkaʼitik ta skoj ti jsaʼ mulilutike. Ta jkuxlejaltik me chvinaj ti oy ta jol ta koʼontontik ti ta jkʼan ta jpastik li kʼusi tskʼan yoʼonton Diose (Salmo 40:8).
14. 1) ¿Kʼu yuʼun skʼan xa noʼox xkojtikintik li Jeovae xchiʼuk ti xi jxanav batel ta sbee? 2) ¿Kʼuxi chtun kuʼuntik ta jujuntal li tekstoetik te ta parafoe?
14 Kʼalal mi kʼot yorail yuʼun Dios sventa chakʼbe slajeb skotol li kʼusitik toj chopole xchiʼuk li buchʼutik jaʼ jech tskʼan chkuxiik kʼuchaʼal taje, li Jeovae muʼyuk me bu chjalij. Muʼyuk bu tsjelbe skʼakʼalil mi jaʼuk tsjel li smantaltak sventa noʼox chakʼ akʼo xmuyubaj li buchʼutik chchanik mantal ti muʼyuk tspasik skotol li kʼusi tskʼan Diose, yuʼun jaʼ batem ta yoʼontonik li kʼusitik oy ta sba balumile. Jech un chaʼa, mu me jecheʼuk jchʼaytik kʼakʼal (Lucas 13:23, 24; 17:32; 21:34-36). Xpatet noʼox koʼontontik yuʼun li epal krixchanoetike, yuʼun mu jecheʼuk noʼox te skʼeloj sbaik, yuʼun ta sjunul yoʼonton ta saʼik batel li chanubtasel chakʼ Jeova ta sKʼope xchiʼuk li ta S-organisasione xchiʼuk jmoj tsobolik batel ta sbe li Diose, ta sbelel li achʼ balumile. Kʼalal mas ta jchantik ta sventa li Jeovae, mas to me ta jkʼantik ta sjunul koʼontontik xchiʼuk mas to me ta jkʼan chi jtunutik ta stojolal.
Svulesobil ta joltik
• ¿Kʼusi oy ta yoʼonton Jeova ta sventa li ichʼel ta mukʼe?
• ¿Kʼusi skʼan xkakʼbetik yipal spasel ta sjunul koʼontontik kʼalal mi la jchantik xa li chanubtaseletik ta Vivlia ti baʼyel skʼan chanele?
• ¿Kʼusi xuʼ jpastik ta jujuntal sventa jmojuk tsobolutik xchiʼuk li yantik yajtuneltak Jeovae?
[Lokʼol ta pajina 4]
«Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o»