Kapitulo 9
Li kipaltik ti chakʼ li spatobil oʼontonal ta sventa li chaʼkuxesele
1. ¿Mi oy van spatobil oʼontonal ta sventa li animaetik ti manchukuk oy li chaʼkuxesele?
LI LAJELALE, ¿mi yelkʼanojbot junuk buchʼu ti akʼanoj tajmeke? Ti manchukuk oy li chaʼkuxesele, chʼabal xa spatobil oʼontonal sventa ta jchaʼkʼeltik jechuk li kanimatike, yuʼun ti jechuke te oyik-o ti kʼuyelan chal li Vivlia ti xie: «Li bochʼotic chamenic xae mu xa cʼusi snaʼic o, [...] yuʼun cʼalal me labat ta yavil animaetique [li mukinale], muʼyuc xa abtel, muʼyuc cʼusi stacʼ pasel, muʼyuc xa cʼusi jnaʼtic, muʼyuc xa bijubtasel» (Eclesiastés 9:5, 10).
2. ¿Kʼusi toj alakʼ sba chkʼot ta pasel ta sventa li chaʼkuxesele?
2 Ta skoj li slekil yoʼonton Jeovae mu albajuk yepal krixchanoetik xuʼ ta staik xkuxlejalik yan velta xchiʼuk xuʼ ta skʼupinik ta sbatel osil xkuxlejalik ta sventa li chaʼkuxesele. Taje jaʼ smelolal ti stakʼ jpat koʼontontik ti yuʼun chkʼot skʼakʼalil ta jtsob jbatik li ta achʼ balumil yuʼun Dios xchiʼuk li buchʼutik chamem kuʼuntike (Marcos 5:35, 41, 42; Hechos 9:36-41).
3. 1) ¿Kʼu yuʼun tsots skʼoplal li chaʼkuxesel sventa chkʼot ta pasel li kʼusi tskʼan yoʼonton Jeovae? 2) ¿Bakʼin chi stsatsubtasutik mas li spatobil oʼontonal ta sventa li chaʼkuxesele?
3 Ta skoj li chaʼkuxesele muʼyuk xa bu ta jxiʼtatik li lajelale. Li Jeovae xuʼ ta xakʼ akʼo spas li kʼusi tskʼan yoʼonton li Satanase, ti xuʼ tsmilbe li yajtuneltak Dios sventa jaʼuk jech chkʼot ta pasel li kʼusi laj yal ti xie: «Li cristianoe xuʼ chacʼ scotol cʼusi oy yuʼun, jaʼ noʼox venta mi cuxul chcom stuque», ti xie, pe taje maʼuk smelolal ti chʼabal xa xpoxile (Job 2:4). Manchuk mi icham li Jesuse tukʼ laj yakʼ sba ta stojolal Jeova, jech oxal, li Jeovae la xchaʼkuxes sventa chkuxi ta vinajel. Jaʼ jech taje, li xNichʼon Diose xuʼ laj yakʼ ta matanal ta stojolal sTot ta vinajel li sbalil stukʼil kuxlejal kʼuchaʼal krixchanoe, li matanal taje jaʼ xuʼ ta jtatik-o li kuxlejale. Li kʼusi chkʼot ta pasel yuʼun xtok li chaʼkuxesele jaʼ ti xuʼ chkʼotik ta ajvalil ta vinajel xchiʼuk Cristo li juteb chijetike, jaʼ ti koʼol kʼusi ta xuʼuninike (Lucas 12:32). Ta sventa li yan krixchanoetike oy spatobil yoʼontonik ek, xuʼ ta xchaʼkuxiik sventa tskʼupin xkuxlejalik ta sbatel osil ta paraiso liʼ ta Balumile (Salmo 37:11, 29). Li spatobil oʼontonal ta sventa li chaʼkuxesele jaʼ tstsatsubtasbe yoʼonton li yajtsʼaklom Cristoe, yuʼun «toj yan sba svuʼel» ta jtatik kʼalal jaʼo ta xkiltik prevaetik ti jutuk xa mu chi jcham yuʼune (2 Corintios 4:7).
Kʼu yuʼun toj tsots skʼoplal sventa xchʼunel yoʼonton li yajtsʼaklom Cristoe
4. 1) ¿Kʼusi smelolal ti jaʼ «scʼop Cristo ta [sliqueb]» li chaʼkuxesele? 2) Ta sventa li chaʼkuxesele, ¿kʼusi tsnopik jutuk mu skotoluk li krixchanoetike?
4 Jech kʼuchaʼal chal Hebreos 6:1, 2, li chaʼkuxesele jaʼ li «scʼop Cristo ta sliquebe», yuʼun jaʼ jtos chanubtasel ti jaʼ yibel li xchʼunel koʼontontike, mu me xuʼ xi jyijubutik ta mantal mi muʼyuk jchanojtik baʼyuke (1 Corintios 15:16-19). Pe li chanubtasel ta sventa li chaʼkuxesele, toj jelel xchiʼuk li kʼusi tsnopik li yan krixchanoetik ta sventa taje. Yantik x-epaj batel ti buchʼutik muʼyuk ta yoʼontonik li sKʼop Diose, taje ta xalik ti jaʼ noʼox la mero kuxlejal li avie, jech oxal jaʼ batem ta yoʼontonik ta saʼel li kʼusi tskʼan tskʼupinike. Jech noxtok, li buchʼutik oyik ta relijion ti lek ojtikinbile, jlome xchʼunojik Cristo yane muʼyuk, li stukike tsnopik ti oy la xchʼulelik ti mu snaʼ xchame. Pe li kʼusi xchʼunojike, mu xkoʼolaj xchiʼuk li chanubtasel chakʼ Vivlia ta sventa li chaʼkuxesele, ti oyuk jchʼuleltik ti mu snaʼ xchame mu xa persauk jechuk li chaʼkuxesele. Kʼalal ta jkaptik li kʼusi xchʼunojik ta sventa li chʼulelal ti mu snaʼ xcham xchiʼuk li chaʼkuxesele muʼyuk chakʼ spatobil koʼontontik, kʼajomal noʼox ta xchibajesutik. ¿Kʼuxi xuʼ jkoltatik li krixchanoetik ti ta sjunul yoʼonton tskʼan tsnaʼik li kʼusi melele?
5. 1) Sventa chkaʼibetik smelolal kʼusi li chaʼkuxesele, ¿kʼusi baʼyel skʼan chkaʼibetik lek smelolal? 2) ¿Kʼusitik tekstoetik ta Vivlia xuʼ jtunestik sventa chkalbetik smelolal kʼu yelan oy li animaetike? 3) ¿Kʼusi stakʼ pasel mi oy buchʼu ta stunes junuk Vivlia ti mu toj lekuk jamal chal kaʼitik li kʼusi melele?
5 Sventa chkaʼibetik lek smelolal li alakʼ sba matanal ta sventa li chaʼkuxesele, baʼyel skʼan chkaʼibetik lek smelolal kʼuyelan oy li animaetike. Li buchʼutik tskʼan tsnaʼik li kʼusi melele, ta noʼox xaʼibeik smelolal ta jun chibuk noʼox tekstoetik (Salmo 146:3, 4; Eclesiastés 9:5, 10; Hechos 7:60). Pe oy jlom Vivliaetike muʼyuk lek jelubtasbilik o muʼyuk chalbeik lek smelolal, ta skoj taje mu xkaʼibetik lek smelolal li kʼusi melel ta sventa ti kʼuyelan oy li animaetike. Jaʼ yuʼun yikʼaluk van skʼan xichʼ kʼelel li kʼopetik ti laj yichʼ tunesel kʼalal laj yichʼ tsʼibael li Vivliae.
6. Kʼalal lek chichʼ chanel li Vivliae, ¿kʼusi chakʼ ta ilel ta sventa ti kʼusi chkʼot ta pasel kʼalal chi jchamutike?
6 Junantik Vivliaetik ti jelubtasbilik jech kʼuchaʼal li ta tsotsile, jeltos tsjelubtasik li jpʼel kʼop né·fesch ta hebreo ti jaʼ xkoʼolaj xchiʼuk li jpʼel kʼop psy·kjé ta griegoe. Tsjelubtasik kʼuchaʼal «krixchano», «vinik», «kʼusitik kuxajtik», «kuxlejaletik» xchiʼuk «chʼulelal». Kʼalal ta xichʼ kʼelbel lek smelolal li jpʼel kʼop ta hebreo xchiʼuk ta griegoe, li jchanun ta Vivliae ta xlik yakʼ venta ti chaʼpʼel kʼop taje jaʼtik onoʼox chalbe skʼoplal li krixchanoe (Génesis 2:7; Hechos 2:43; 1 Pedro 3:20). Jech noxtok li chaʼpʼel taje xuʼ xichʼ tunesel sventa chalbe skʼoplal chonbolometik (Génesis 1:20, 24). Pe li kʼopetik taje muʼyuk onoʼox bu chakʼ ta aʼiel ti oy kʼusi chlokʼ ta jbekʼtaltik ti mu xkiltike, ti mu stakʼ pikele xchiʼuk ti kuxul to chkom ta bu jotukal kʼalal chi jchamutike.
7. ¿Kʼuxi xuʼ chavalbe smelolal kʼu yelan oyik li buchʼutik te oyik ta Seol, ta Hades xchiʼuk ta Gehenae?
7 Li Vivliaetik ta tsotsile koʼoltik onoʼox ta sjelubtasik kʼuchaʼal «yavil animaetic» o «muquinal», li jpʼel kʼop ta hebreo scheʼóhl (Seol) xchiʼuk li jpʼel kʼop ta griego hái·des (Hades), bakʼintik xtoke ta sjelubtasik kʼuchaʼal «lajel» o «stojol mulil». Jech noxtok, li jpʼel kʼop ta griego ti jaʼ gué·en·na (Gehena) ta sjelubtas kʼuchaʼal «kʼokʼ», «mukʼta kʼokʼ», «tojob mulil» o «kʼatinbak». Pe taje muʼyuk lek jelubtasbil li jpʼel kʼop Gehenae. Li Seole jaʼ koʼol xchiʼuk li jpʼel kʼop Hadese (Salmo 16:10; Hechos 2:27). Li Vivliae jamal chakʼ ta ilel ti jpʼel kʼop Seol xchiʼuk Hadese, jaʼ chalbe skʼoplal li mukinal ta komon yuʼun li krixchanoetike xchiʼuk snitoj sba skʼoplal xchiʼuk li lajelale, maʼuk snitoj sba xchiʼuk li kuxlejale (Salmo 89:48; Apocalipsis 20:13). Jaʼ noʼox jech xtok, li Vivliae chakʼ kiltik ti ta skoj li chaʼkuxesele xuʼ chkuxiik tal li buchʼutik te oyik ta mukinal ta komone (Job 14:13; Hechos 2:31). Li Gehenae maʼuk chalbe skʼoplal li mukinal ta komone mi jaʼuk chalbe skʼoplal li mukʼta kʼokʼe. Moʼoj, jaʼ smelolal lajelal ta j-echʼel. Jaʼ yuʼun li buchʼutik te chbatike muʼyuk xa spatobil yoʼontonik sventa kuxlejal ta tsʼakal kʼuchaʼal tstaik li buchʼutik te oyik ta Seol xchiʼuk ta Hadese, yuʼun li ta Gehenae muʼyuk onoʼox bu chichʼ alel mi oy kuxlejal te (Mateo 10:28).
8. ¿Kʼuxi xuʼ chvinaj ta stalelal xchiʼuk ta snopben jun krixchano ti kʼalal yabinojbe lek smelolal li chaʼkuxesele?
8 Kʼalal laj xa kaʼibetik lek smelolal li kʼusitik taje, mas xa me kʼun chkaʼitik ta skoltael li krixchanoetik ta yaʼibel smelolal kʼuxi chtun ta xkuxlejalik li chaʼkuxesele, jech noxtok, mas to me chkʼuxubinik ek li kʼanelal yakʼoj ta ilel Jeova ta sventa li alakʼ sba matanal taje. Kʼalal ta jnoptik ti xuʼ ta jtsob jbatik li ta achʼ balumil yuʼun Dios xchiʼuk li buchʼutik chamem kuʼuntike ta me sjutukajes li yatel koʼontontike. Ta yaʼibel lek smelolal li kʼusitik taje toj tsots skʼoplal sventa chkaʼibetik smelolal li kʼusi skʼan xal li slajel Cristoe. Li yajtsʼaklomtak Cristo ta baʼyel sigloe, laj yakʼik venta ti jaʼ jtos ti kʼusitik baʼyel skʼan chʼunel li xchaʼkuxesel Jesuse, yuʼun jaʼ la sjambe sbelel sventa chchaʼkuxi li yan krixchanoetike. Jaʼ yuʼun chaʼa, li yajtsʼaklomtak Cristo taje laj yalbeik skʼoplal li chaʼkuxesele xchiʼuk laj yalik xtok li spatobil oʼontonal chakʼe. Jaʼ jech xkoʼolaj li avie, li buchʼutik oy sbalil ta xilik li chaʼkuxesele, solel oy tajmek ta yoʼontonik ta yalbel batel skʼoplal li kʼusi melel ti toj ep sbalil taje (Hechos 5:30-32; 10:42, 43).
Stunesel li syaveal yavil animaetike
9. Li Jesuse, ¿bu baʼyel ta stunes li «sllavial li lajele xchiʼuc li yavil animaetique»?
9 Skotolik li buchʼutik ch-ajvalilajik ta vinajel xchiʼuk li Cristoe skʼan xchamik baʼyuk. Pe snaʼojik lek li kʼusi laj yal Jesús ti xie: «Licham, pero lichaʼcuxi; cuxulun o sbatel osil. Vuʼun jventainoj scotol. Vuʼun oy ta jcʼob sllavial li lajele xchiʼuc li yavil animaetique», xi (Apocalipsis 1:18). ¿Kʼusi smelolal ti kʼusi laj yale? Chkʼopoj ta sventa xkuxlejal stuk. Icham toʼox, pe li Diose muʼyuk te laj yikta ta yavil animaetik, moʼoj, yuʼun ta yoxibal kʼakʼale ichaʼkuxesat, akʼbat xkuxlejal ti mu xvinaj ta kʼelele xchiʼuk ti mu snaʼ xchame (Hechos 2:32, 33; 10:40). Jech noxtok akʼbat li «sllavial li lajele xchiʼuc li yavil animaetique», sventa jech chi spojutik lokʼel tal li ta komon mukinal yuʼun li krixchanoetike xchiʼuk li ta xchopolal smul Adane. Li Jesuse xuʼ ta xchaʼkuxes li tukʼil yajtsʼaklomtake yuʼun te yichʼoj li yaveetike. Baʼyel ta xchaʼkuxes li xchiʼiltak ta tsobobbail ti yichʼojik tʼujel ta chʼul espiritue, ta xakʼanbe li alakʼ sba kuxlejal ta vinajel ti mu snaʼ xlaje, jech kʼuchaʼal akʼbat yuʼun li sTote (Romanos 6:5; Filipenses 3:20, 21).
10. ¿Bakʼin chkʼot ta pasel li chaʼkuxesel ta sventa li tukʼil yajtsʼaklomtak Cristo ti yichʼojik tʼujele?
10 ¿Bakʼin chkʼot ta pasel li chaʼkuxesel ta vinajel ta sventa li tukʼil yajtsʼaklomtak Cristo ti yichʼojik tʼujele? Li Vivliae ta xal ti likem xae. Li jtakbol Pabloe laj yal kaʼitik ti jaʼo chchaʼkuxiik ti «cʼalal ta sut tal yan [velta]» li Cristoe, taje lik tal ta sjabilal 1914 (1 Corintios 15:23). Li buchʼutik tʼujbilik ti tukʼ yoʼonton tstsuts xkuxlejalik liʼ ta Balumil li avie, ti kʼalal sutem xaʼox tal yan velta li Cristoe, mu xa persauk tsmalaik tsut tal li Yajvalike. Kʼalaluk mi ichamike, ta xichʼik chaʼkuxesel kʼuchaʼal kuxlejaletik ti mu xvinajik ta kʼelele, «ta anil noʼox, jmaqʼuel noʼox ta satil chcʼot ta pasel». Xmuyubajik ta jyalel «yuʼun te xa xchiʼuquic [batel] li yabteli[k]» ti lek la spasike (1 Corintios 15:51, 52; Apocalipsis 14:13).
11. ¿Kʼusi junukal chaʼkuxesel ta skʼupinik jutuk mu skotoluk li krixchanoetike, xchiʼuk bakʼin ta xlik?
11 Pe maʼuk noʼox chkʼot ta pasel li chaʼkuxesel ta vinajel ta sventa li buchʼutik chventainvanik li ta Ajvalilale. Moʼoj, yuʼun ta Apocalipsis 20:6 chal ta sventa «li sba velta chaʼcuxesele», taje jaʼ smelolal ti oy to yane. Li buchʼutik ta xichʼik kʼuxubinel ta sventa li slajebal chaʼkuxesel liʼe, ta me xilik muyubajel, yuʼun xuʼ ta xkuxiik ta sbatel osil ta jun Balumil ti jaʼ xaʼox jun nichimaltike. ¿Bakʼin chkʼot ta pasel taje? Jech kʼuchaʼal chakʼ ta ilel Apocalipsise jaʼ to mi chʼay batel «li vinajel banamile», jaʼ xkaltik, skotol li kʼusitik chopol li avie xchiʼuk li ajvaliletik yuʼune. Mi echʼ slajebal li kʼusitik liʼe, ti toj nopol xa tajmeke, ta xlik li chaʼkuxesel ta balumil ti kʼusi ora snopoj onoʼox Dios chkʼot ta pasele (Apocalipsis 20:11, 12).
12. ¿Buchʼutik chchaʼkuxiik tal ek li ta Balumile, xchiʼuk kʼu yuʼun jaʼ jun muyubajel taje?
12 ¿Buchʼutik tsbalinik li chaʼkuxesel ta balumile? Jlome jaʼik li tukʼil yajtuneltak Jeova ta voʼnee, ta skoj ti tsots xchʼunel yoʼontonik li viniketik xchiʼuk antsetik ta sventa li chaʼkuxesele «muc sutes scʼopic yuʼun acʼo colicuc», jaʼ xkaltik, muʼyuk bu la xchibajes yoʼontonik ta stojolal Jeova sventa noʼox tsnatubtas li xkuxlejalike xchiʼuk ti mu xil svokolik kʼalaluk ta xchamike. Jaʼ jun melel muyubajel ti chkojtikintik lek li buchʼutik taje xchiʼuk ti chkaʼibetik ta ye stukik yantik loʼiletik ta Vivlia ti jutuk noʼox chalbe skʼoplale. Jaʼ jech noxtok, ta xchaʼkuxiik ta Balumil li krixchanoetik kʼuchaʼal Abel, li tukʼil baʼyel yajrextiko Jeovae; Enoc xchiʼuk Noé, viniketik ti tsots yoʼonton laj yalbeik smantal Dios ti kuxiik kʼalal mu toʼox chtal li Nojelal ta voʼe; Abraham xchiʼuk Sara, ti la xchʼamik anjeletik ta snaike; Moisés, ti jaʼ akʼbat li Mantal ta vits Sinaie; j-alkʼopetik ti mu xiʼik kʼuchaʼal Jeremías, ti laj yil kʼalaluk laj yichʼ jinesel li Jerusalén ta sjabilal 607 kʼalal maʼuk toʼox jkʼakʼaliltike (kʼ.m.jkʼ.), xchiʼuk li Juan J-akʼvanej ta voʼe, ti laj yaʼi ti kʼalaluk laj yal Dios ti jaʼ XNichʼon li Jesuse. Jech xtok, ta xchaʼkuxiik epal viniketik xchiʼuk antsetik ti tukʼ yoʼonton ichamik li ta slajebal skʼakʼalil li kʼusitik toj chopolik liʼe (Hebreos 11:4-38; Mateo 11:11).
13, 14. 1) ¿Kʼusi chkʼot ta stojolal li yavil animaetike xchiʼuk li animaetik ti te oy ta stojolale? 2) ¿Buchʼutik ta xichʼik chaʼkuxesel xtok, xchiʼuk kʼu yuʼun?
13 Ta mas tsʼakale ta xchaʼkuxiik yan krixchanoetik noxtok, maʼuk noʼox li tukʼil yajtuneltak Jeovae, yuʼun muʼyuk xa buchʼu te chkom li ta komon mukinale. Li Jesuse ta xokobtas skotol, ta stunes li syaveal yavil animaetike, taje jaʼ sventa slekilal skotol krixchanoetik, ti vaʼ yelan chkʼot ta pasele, kak xa onoʼox laj yil li jtakbol Juane, laj yil ti «yavil animaetique [ijipat] ochel ta mucʼta cʼocʼ» (Apocalipsis 20:14). ¿Kʼusi smelolal taje? Jaʼ smelolal ti chakʼbe slajeb ta j-echʼel yavil animaetik li Jesuse, jaʼ xkaltik, ti chakʼbe slajeb li mukinal ta komon yuʼun li krixchanoetike. Kʼalal xokol ta xiktae jaʼ jech ta stupʼbe skʼoplal, yuʼun maʼuk noʼox ta xchaʼkuxes li buchʼutik tukʼ laj yichʼik ta mukʼ Jeovae, moʼoj, yuʼun ta slekil yoʼonton ta xchaʼakʼbe xkuxlejal ek li buchʼutik muʼyuk tukʼike. Li sKʼop Diose xi chale: «Ta xchaʼcuxiic li bochʼotic lequique xchiʼuc li bochʼotic chopolique», xi (Hechos 24:15).
14 Li buchʼutik muʼyuk tukʼik taje ti ch-akʼbat yan velta xkuxlejalike maʼuk me chchaʼkuxiik sventa chichʼik chapanel sventa chchamik noxtok. Ti kʼalal tspas xaʼox mantal ta spʼejel Balumil li Ajvalilal yuʼun Diose naka xa me tukʼilal oy, ta xichʼik koltael li buchʼutik muʼyuk tukʼik sventa chlekub batel xkuxlejalik ta smantaltak li Jeovae. Li kʼusi laj yil Juane chal kaʼitik ti chichʼ jamel «li vun sventa cuxlejale», jech oxal chaʼa, xuʼ me spas yuʼunik sventa xichʼik tsʼibabel te li sbiike. «Jech scotolic [chlik] yichʼic chapanel ta sventa ti cʼu xʼelan yabtelique», li yabtelik taje, jaʼ ti tspasik kʼalal laj xaʼox yichʼik chaʼkuxesele (Apocalipsis 20:12, 13). Jech oxal chaʼa, jech kʼuchaʼal chkʼot ta pasel ta slajebale, xuʼ jaʼ sventa «ta xchaʼcuxiic loqʼuel sventa chcuxiic sbatel osil», mu jaʼuk noʼox sventa «ta xchaʼcuxiic loqʼuel sventa chbatic ta tojob mulil [lajelal]» (Juan 5:28, 29).
15. 1) ¿Buchʼutik muʼyuk ta xichʼik chaʼkuxesel? 2) Kʼalal chkojtikintik li kʼusi melel ta sventa li chaʼkuxesele, ¿kʼusi skʼan tstij koʼontontik ta spasel?
15 Pe mu skotoluk ta xchaʼkuxiik li buchʼutik chamemike. Oy jlome saʼoj smulik ti mu akʼbajuk ta pertone, ta skoj taje muʼyuk te oyik ta yavil animaetik, te oyik ta Gehena, taje jaʼ smelolal ti lajik-o ta j-echʼele. Te chbatik ek li buchʼutik ta xichʼik lajesel li ta tsatsal vokolil ti poʼot xae (Mateo 12:31, 32; 23:33; 24:21, 22; 25:41, 46; 2 Tesalonicenses 1:6-9). Jaʼ jech, li Jeovae toj ep tajmek xkʼuxul yoʼonton kʼalal tslokʼes tal ta stojolal yavil animaetik li buchʼutik chamemike, manchuk mi jech, taje maʼuk srasonal sventa chi jkuxi ti kʼuyelan tskʼan koʼontontike, yuʼun muʼyuk ta xichʼik chaʼkuxesel li buchʼutik yalel tstoy sbaik ta stojolal li ajvalilal yuʼun Jeovae. Li yojtikinel taje, jaʼ me tstij koʼontontik jechuk sventa jech xi jkuxiutik ti kʼuchaʼal tskʼan yoʼonton li Diose, jaʼ me jech chkakʼtik ta ilel xtok ti jkʼanojtik ta sjunul koʼontontik li slekil yoʼonton Diose.
Li chaʼkuxesele ta xakʼbe stsatsal koʼontontik
16. ¿Kʼu yuʼun jaʼ jun mukʼta patob oʼontonal li chaʼkuxesele?
16 Li buchʼutik jpatoj koʼontontik yuʼun li chaʼkuxesele jaʼ me chakʼ tsots kipaltik. Jnaʼojtik ti manchuk mi ta jtunestik kʼusitikuk poxilale, mu xnatub kuʼuntik batel li jkuxlejaltik kʼalal chkʼot xa onoʼox yorail chi jchamutike (Eclesiastés 8:8). Mi tukʼ koʼontontik tunemutik tal ta stojolal Jeova xchiʼuk li s-organisasione, xuʼ me jun koʼonton jmalatik li kʼusi chkʼot ta pasel ta mas tsʼakale, yuʼun me jnaʼojtik ti ta jchaʼkʼupintik li kuxlejal ta sventa li chaʼkuxesel ti kʼusi ora mas lek ta xil li Diose. Jaʼ me jun alakʼ sba kuxlejal, li jtakbol Pabloe laj yal ti jaʼ «li mero» kuxlejale (1 Timoteo 6:19; Hebreos 6:10-12).
17. ¿Kʼusi xuʼ chi skoltautik sventa tukʼuk koʼontontik ta stojolal li Jeovae?
17 Kʼalal jnaʼojtik ti oy chaʼkuxesele xchiʼuk ti xkojtikintik Buchʼu ti jech ta spase jaʼ me tstsatsubtas-o xchʼunel koʼontontik. Ta stsatsubtasutik sventa tukʼuk koʼontontik ta stojolal Dios, yuʼun manchuk mi oy kajkontratik ti toj chopol yoʼontonik ti chalik tskʼan tsmilutike. Ta voʼne onoʼox mosoinbilik yuʼun Satanás li krixchanoetike, yuʼun yakʼojbe snop ti chcham xa yalojike. Pe li Jesuse muʼyuk bu ixiʼ, tukʼ laj yakʼ sba ta stojolal Jeova kʼalal to icham, ta sventa li xkuxlejal ti laj yakʼ ta matanale la spoj lokʼel yan krixchanoetik li ta xiʼelal ta skoj li lajelale (Hebreos 2:14, 15).
18. Ti jech vinajem tal skʼoplalik ti lek tukʼ yoʼontonik li yajtuneltak Jeovae, ¿kʼusi koltabilik-o sventa jech chkʼot ta pasel?
18 Koliyal ti yakʼoj xchʼunel yoʼontonik li ta matanal laj yakʼ Jesús xchiʼuk li ta chaʼkuxesele, li yajtuneltak Jeovae vinajem tal skʼoplalik ti lek tukʼ yoʼontonike. Kʼalal ta xichʼik ilbajinele yakʼojik ta ilel ti «yuʼun muʼyuc scʼoplal chaʼyic me chmilati[ke]», yuʼun jaʼ mas skʼanojik li Jeovae (Apocalipsis 12:11). Lek pʼij chakʼ ta ilel stalelalik, yuʼun muʼyuk bu chikta sbaik ta xchʼunel li beiltaseletik sventa li yajtsʼaklomtak Cristo sventa noʼox mu xchʼay li xkuxlejalik li avie (Lucas 9:24, 25). Manchuk mi chchamik ta skoj ti tukʼ yoʼonton ch-abtejik batel ta sventa li ajvalilal yuʼun Jeovae, snaʼojik ti chtojbat svokolik li ta chaʼkuxesele. ¿Mi jaʼ jech yelan xchʼunel avoʼonton li voʼote? Jaʼ jech yelan mi ta melel akʼanoj li Jeovae xchiʼuk mi toj ep sbalil chavil li spatobil koʼontontik ta sventa li chaʼkuxesele.
Svulesobil ta joltik
• Kʼalal mu to chaʼibeik smelolal kʼusi li chaʼkuxesele, ¿kʼu yuʼun baʼyel skʼan xaʼiik li krixchanoetik kʼu yelan oy li animaetike?
• ¿Buchʼutik chchaʼkuxiik, xchiʼuk kʼusi tstij koʼontontik ta spasel jechuk ti kʼalal chkojtikintik taje?
• ¿Kʼu yuʼun chakʼ jtsatsaltik li spatobil oʼontonal sventa li chaʼkuxesele?
[Lokʼol ta pajina 85]
Li Jeovae ta xal ta melel ti ta xchaʼkuxiik li buchʼutik tukʼike xchiʼuk li buchʼutik muʼyuk tukʼike