Kapitulo 10
Jun ajvalil ti «muʼyuc bochʼo xuʼ chtuchʼbat yabtel[e]»
1. ¿Kʼusi yakʼoj tal ta ilel li kʼusitik kʼotemik ta pasel ta spʼejel Balumil ti kʼu xa sjalil likem tal li kuxlejale?
LI KʼUSITIK chkʼot ta pasel jujun kʼakʼal ta spʼejel Balumile, chakʼ ta ilel ti muʼyuk bu staojik-o muyubajel li krixchanoetik kʼalal spʼajojik li ajvalilal yuʼun Jeova xchiʼuk ti tskʼan tsventain sba stukike. Mi jtosuk ajvalilal juʼem yuʼun ti akʼo koʼol oyuk slekilal li krixchanoetike. Li krixchanoetike ep xa kʼusitik xchanojik tajmek ti mu toʼox xojtikinike, manchuk mi jech, muʼyuk bu juʼem yuʼunik ta slajesel li chameletike xchiʼuk li lajelale, mi jaʼuk ta stojolal junuk krixchano. Li ajvalilal yuʼun krixchanoe muʼyuk bu yakʼojbe slajeb li pas kʼope, li majbaile, li jpʼaj mantale, li manbail ta takʼine xchiʼuk li abol baile; jech noxtok un ep krixchanoetik ta epal lumetik ta xil svokolik ta skoj ti toj tsots tspasvanik ta mantal li j-ilbajinvanej ajvaliletike (Eclesiastés 8:9). Li kʼusitik achʼ chlokʼanuk tale, li pichʼ oʼontonale xchiʼuk ti muʼyuk yojtikinobil yuʼunik li krixchanoetike, lek xa snup-o sba sventa tsokesik li balumile, li voʼe xchiʼuk li ikʼ ti chkichʼtike. Ta skoj ti muʼyuk lek ta stunesik takʼin li ajvaliletike, ep krixchanoetik mu toj kʼunuk chaʼiik ta stael li kʼusitik chtun yuʼunik ti mas tsotsik skʼoplale. Ti oy xa ta smilal jabil ch-ajvalilaj tal li krixchanoe yakʼoj ta ilel ti jech kʼotem ta pasel liʼe: «Ti muc sventainojuc stuc yorail li cristianoe, ti mu xuʼ yuʼun tspas mantal stuc li cʼusi chcʼot ta pasel ta stojole» (Jeremías 10:23).
2. ¿Kʼusi noʼox jaʼ ti xuʼ chakʼbe slajeb svokol li krixchanoetike?
2 ¿Kʼusi ti xuʼ chakʼbe slajeb taje? Jaʼ li Ajvalilal yuʼun Diose, ti xi laj yakʼbe xchan yajtsʼaklomtak Jesús ti akʼo skʼanik ta orasione: «Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele» (Mateo 6:9, 10). Ta 2 Pedro 3:13 «achʼ vinajel» ta sbiiltas li ajvalilal taje, jaʼ tsventain li «achʼ banamil[e]», li tukʼil krixchanoetike. Li Ajvalilal ta vinajel yuʼun Diose toj tsots skʼoplal tajmek, yuʼun li Jesuse jaʼ jech laj yakʼ ta ilel ti kʼalal jaʼ mas laj yalbe skʼoplal li ta chol mantal la spase (Mateo 4:17). Sventa chakʼ ta ilel kʼuyelan skʼan jtsaktik ta venta ta jkuxlejaltik li ajvalilal taje, li Jesuse xi laj yale: «Jaʼ yuʼun tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane» (Mateo 6:33).
3. ¿Kʼu yuʼun toj tsots xa tajmek skʼoplal ti akʼo xa noʼox me xkaʼibetik skʼoplal li Ajvalilal yuʼun Diose?
3 Li ta jkʼakʼaliltike toj tsots xa tajmek skʼoplal ti akʼo xa noʼox me xkaʼibetik skʼoplal li Ajvalilal yuʼun Diose, yuʼun me poʼot xa tsjel ta sbatel osil ti kʼuyelan ta xichʼ ventainel li Balumile. Xi onoʼox laj yal li Daniel 2:44: «Cʼalal jaʼo ochemic ta ajvalilal li ajvaliletic leʼe [li ajvaliletik ta jkʼakʼaliltike], li Dios te oy ta vinajele ta sliques jun ajvalil [te ta vinajel]; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun [mi jutebuk xa tsventain krixchanoetik li balumile]. Jaʼ ta stsal, jaʼ ta slajesbe scʼoplal scotol li yantic ajvaliletique [li ajvaliletik ta jkʼakʼaliltike]; yan li stuque jʼechʼel te chcom o sbatel osil». Jech kʼuchaʼal chkiltike, li Ajvalilal ta vinajele ta stsutsesbe skʼoplal li slajebal kʼakʼal kʼalal mi laj yakʼbe slajeb ta j-echʼel li kʼusitik toj chopol li avie, jaʼ jech muʼyuk xa me buchʼu ta spojbe sbaik li ajvalilal liʼ ta Balumile. Skʼan me oyuk tajmek ta koʼontontik stojel ta vokol ti poʼot xa xtal li xkuxetel koʼontontike.
4. Ta sventa li Ajvalilale, ¿kʼusi kʼot ta pasel ta vinajel ta sjabilal 1914, xchiʼuk kʼu yuʼun tsots skʼoplal ta jtojolaltik?
4 Li Jeovae laj yakʼ ochuk ta ajvalil ta sjabilal 1914 li Cristo Jesuse xchiʼuk laj yakʼbe yabtel, xi laj yalbee: «Paso me mantal ta stojol li avajcontrataque» (Salmo 110:1, 2). Li ta jabil taje te lik talel xtok li «slajebal cʼacʼale», li slajebal skotol li kʼusitik toj chopol liʼ chkil ta jkuxlejaltike (2 Timoteo 3:1-5, 13). Jech noxtok, jaʼo te ikʼot ta pasel ta vinajel ek li kʼusitik kak xa onoʼox akʼbat yil li Daniele. «Li Bochʼo mu snaʼ xlaj yoraile» li Jeova Diose, laj yakʼbe «yabtel; [...] svuʼel, spas mantal» li xNichʼon krixchanoe, li Jesucristoe. «Li cristianoetic ta jujun lum, ta jujun banamil, ta jujuchop cʼope te chtunic ta stojol». Xi la stsʼiba li Daniel ta sventa li kʼusi laj yile: «Li yabtel iʼacʼbate mu xlaj scʼoplal o; li yabtel ta ajvalilale mu xuʼ chichʼ tuchʼbel o» (Daniel 7:13, 14). Ta sventa li Ajvalilal ta vinajel ti oy ta skʼob li Cristo Jesuse, li Diose ta spas ti akʼo skʼupinik mu albajuk yepal bendisionetik li buchʼutik skʼanojik li tukʼilale, yuʼun jaʼ onoʼox jech la skʼan Dios ta slikebal ti kʼalal te laj yakʼ ta Paraiso li baʼyel jtot jmeʼtike.
5. ¿Kʼusitik tsots skʼoplal skʼan xkaʼibetik lek smelolal ta sventa li Ajvalilale, xchiʼuk kʼu yuʼun?
5 ¿Mi ta jkʼan tukʼ koʼontontik tsventainutik li Ajvalilale? Mi jaʼ jeche, skʼan me oyuk tajmek ta koʼontontik snaʼel kʼuyelan chapanbil xchiʼuk kʼuyelan ch-abtej li ajvalilal ta vinajel taje. Ta jkʼan ta jnaʼtik li kʼusi yakal tspase, li kʼusi tspas ta mas tsʼakale xchiʼuk li kʼusi tskʼan akʼo jpastike. Kʼalal ta jchanbetik mas skʼoplal li Ajvalilale mas to me ta jkʼuxubintik. Mi chkakʼtik akʼo spasutik ta mantale, mas to me lek chapalutik sventa chkalbetik yan krixchanoetik li kʼusitik alakʼ sba tspas li Ajvalilal yuʼun Dios ta sventa li buchʼutik chchʼunik mantale (Salmo 48:12, 13).
Li ajvaliletik ta Ajvalilal yuʼun Diose
6. 1) ¿Kʼuxi chakʼ ta ilel Vivlia ti buchʼu jaʼ yuʼun li ajvalilal tspas Mesiase? 2) ¿Kʼusi skʼan tstij koʼontontik ta spasel jechuk li kʼusi ta jchantik ta sventa li Ajvalilale?
6 Kʼalal ta jchantik ta sventa li Ajvalilal yuʼun Mesiase, jlom ti kʼusi baʼyel chakʼ kiltike jaʼ ti jaʼ yuʼun Jeova li ajvalilale, yuʼun jaʼ laj yakʼbe «tsots yabtel», laj yakʼbe «svuʼel» xchiʼuk laj yakʼbe «spas mantal» li xNichʼone. Jaʼ jech un chaʼa, kʼalaluk laj yichʼ sjuʼel sventa ilik ajvalilajuk li xNichʼon Diose, toj lek staʼo ti xi laj yichʼ alel ta vinajele: «Laj scʼoplal ta xventainvanic ti ajvaliletic liʼ ta banomile, jaʼ xa ta xlic ventainvanuc ti Cajvaltic Diose [li Jeovae] xchiʼuc ti Cristo yuʼune, jaʼ xa ta xlic pasvanuc ta mantal sbatel osil [li Jeovae]» (Apocalipsis 11:15, Ch). Jaʼ jech un chaʼa, skotol li kʼusitik chkiltik ta sventa li Ajvalilal taje xchiʼuk li kʼusi chkʼot ta pasel yuʼune mas me chi jnopaj yuʼun ta stojolal li Jeovae. Li kʼusi ta jchantike jaʼ me tstij koʼontontik ti jechuke sventa chkakʼ jbatik ta sbatel osil ta stojolal li ajvalilal yuʼun Jeovae.
7. ¿Kʼu yuʼun toj tsots skʼoplal chkaʼitik ti laj yichʼ biiltasel sventa ch-ajvalilaj ta sbi Jeova li Jesucristoe?
7 Jnoptik xtok ta sventa ti ivaʼanat ta ajvalilal yuʼun Jeova li Jesucristo sventa ch-ajvalilaj ta Sbi li Jeovae. Ta sventa ti laj yichʼ tunesel yuʼun Dios ta Pʼijil J-abtel ta spasel li Balumil xchiʼuk li krixchanoetike, li Jesuse xojtikin lek li kʼusitik chtun kuʼuntike, li voʼotike mu junuk buchʼu snaʼ kuʼuntik. Jech noxtok, ta slikebal onoʼox yakʼoj tal ta ilel xkʼuxul yoʼonton ta stojolal li yalab xnichʼnabtak krixchanoetike (Proverbios 8:30, 31; Colosenses 1:15-17). Solel toj echʼ noʼox tajmek la skʼanutik, yuʼun tal stuk liʼ ta Balumile vaʼun laj yakʼ xkuxlejal sventa tsmanutik (Juan 3:16). Jaʼ jech la spojutik li ta mulile, li ta lajelale, xchiʼuk ta sventa xuʼ jtatik li kuxlejal ta sbatel osile (Mateo 20:28).
8. 1) ¿Kʼu yuʼun jaʼ mas ta xjalij li Ajvalilal yuʼun Diose ti jaʼ mu xjalij li ajvalil krixchanoetike? 2) ¿Kʼuxi tsakal skʼoplal li j-abtel ti tukʼ yoʼonton, ti lek pʼij xchiʼuk li ajvalilal ta vinajele?
8 Li Ajvalilal yuʼun Diose jaʼ jun ajvalilal ti muʼyuk chjele xchiʼuk ti te oy-o sbatel osile. Jnaʼojtik ti chjalije, yuʼun li Jeovae mu snaʼ xcham (Habacuc 1:12). Jech noxtok, li buchʼu laj yakʼbe ta skʼob li Ajvalilal ti jaʼ li Jesucristoe mu xkoʼolaj xchiʼuk li ajvalil krixchanoetike, yuʼun li stuke mu snaʼ xcham ek (Romanos 6:9; 1 Timoteo 6:15, 16). Yan ti buchʼutik ch-akʼbatik xkuxlejalik ti mu snaʼ xlaj xtoke jaʼik li 144,000 tukʼil yajtuneltak Dios ti likemik tal «ta jujuchop stsʼunubal, ta jujuchop cʼop, ta jujun lum, xchiʼuc ta jujun banamile», taje koʼol ch-ajvalilajik ta vinajel xchiʼuk li Cristoe (Apocalipsis 5:9, 10; 14:1-4; 1 Corintios 15:42-44, 53). Te xa oyik ta vinajel jutuk mu skotolikuk, ti buchʼutik liʼ to oyik ta Balumile, jaʼ li j-abtel ti tukʼ yoʼonton, ti lek pʼije, ti tukʼ yoʼontonik chakʼik ta ojtikinel liʼ ta Balumil li yabteltak li Ajvalilale (Mateo 24:45-47).
9, 10. 1) ¿Kʼusitik jaʼ ti ta xchʼakvan xchiʼuk ti tsokesvan ti chichʼik lajesel yuʼun li Ajvalilale? 2) ¿Kʼusitik mu stakʼ jkap jbatik-o sventa mu xi jpas ta yajkontra li Ajvalilal yuʼun Diose?
9 Leʼ batele, kʼalal mi kʼot yorail ti kʼusi ora onoʼox snopoj Jeova tspase, ta me xalbe mantal li buchʼutik ep sjuʼelik ta vinajel sventa chchʼubaik li Balumile. Taje ta xakʼbe slajeb ta sbatel osil li buchʼutik yalel mu skʼan xichʼik ta venta li mukʼta ajvalilal yuʼun Jeovae xchiʼuk ti tspʼajik li matanaletik yakʼojbutik ta slekilal yoʼonton ta stojolal li Jesucristoe (2 Tesalonicenses 1:6-9). Taje jaʼ skʼakʼalil li Jeovae, ti jaʼ yorail ti malabil tajmek sventa chchaʼta yav li ajvalilal ta vinajel-balumil yuʼun Jeovae. «Aʼyo avaʼyic, ta xa sta yorail scʼacʼalil li Mucʼul Diose; toj xiʼbal sba, yuʼun tstsan, chtil li scʼacʼal yoʼntone, chcom ta xocol banamil li yosilalique; ta xules scotol li jpasmuliletic te nacajtique.» (Isaías 13:9.) «Jaʼ scʼacʼalil ch-ilin li Mucʼul Diose; jaʼ scʼacʼalil at-oʼnton, xchiʼuc vocolajel; jaʼ scʼacʼalil oqʼuel avanel xchiʼuc yavnaijesel; jaʼ scʼacʼalil icʼ osil xchiʼuc acʼubaltic; jaʼ scʼacʼalil chmac osil xchiʼuc butʼulaltic.» (Sofonías 1:15.)
10 Vaʼun ta xichʼ lajesel ta sbatel osil skotol li jecheʼ relijionetike xchiʼuk skotol li ajvalil krixchanoetike xchiʼuk li yajsoltarotakike, ti jaʼ noʼox tunesbilik kʼuchaʼal munyeka yuʼun li ajvalil ti mu xvinaj ta kʼelel liʼ ta balumile. Jaʼ noʼox jech ek, ta xichʼik lajesel skotol li buchʼutik koʼol stalelalik xchiʼuk li balumil liʼe, jech kʼuchaʼal li buchʼutik batem ta yoʼonton sba stukike, ti chloʼlavanike xchiʼuk ti mu sakuk xkuxlejalike. Ta slajebale, ta xichʼ chukel jmil jabil li Satanás xchiʼuk li spukujtake sventa mu xa stikʼ sbaik ta stojolal li jnaklejetik ta Balumile. Vaʼun li Ajvalilal yuʼun Diose jaʼ xa me ta sventain skotol li kʼusitik oy ta Balumile. ¡Solel xkuxet noʼox me yoʼontonik tajmek li buchʼutik skʼanojik li tukʼilale! (Apocalipsis 18:21, 24; 19:11-16, 19-21; 20:1, 2.)
Kʼuxi chkʼot ta pasel yuʼun li kʼusi tskʼan li Ajvalilale
11. 1) ¿Kʼuxi chkʼot ta pasel yuʼun li kʼusi tskʼan Jeova ta sventa Balumil li Ajvalilal yuʼun Mesiase? 2) ¿Kʼusi ta xilik li buchʼutik kuxulik ta Balumil ti kʼalal yakal xaʼox ch-ajvalilaj li Ajvalile?
11 Li Ajvalilal yuʼun Mesiase ta me xkʼot ta pasel yuʼun skotol li kʼusitik onoʼox la skʼan yoʼonton Dios ta slikebal ta sventa li Balumile (Génesis 1:28; 2:8, 9, 15). Ta voʼne xa onoʼox kʼalal to li avie, li krixchanoetike muʼyuk stsakojik lek ta mukʼ li kʼusitik tskʼan li Jeovae. Pe «li banamil ta to xtale» jaʼ me ta xichʼ ta venta li xNichʼon krixchanoe, li Jesucristoe. Kʼalal mi laj yakʼbe slajeb skotol li kʼusitik chopol li Jeovae, li buchʼutik kuxul chkomike, jmoj xa me tsobol ch-abtejik ta stojolal li ventainel yuʼun li Ajvalil Cristoe, ta sjunul me yoʼontonik tspasik li kʼusi ch-albatike vaʼun ta me xkʼataj ta jun paraiso spʼejel li Balumile (Hebreos 2:5-9). Skotol li krixchanoetike ta me skʼupinik li yabtel skʼobike xchiʼuk ta me sbalinik lek skotol li kʼusitik chakʼ li Balumile (Salmo 72:1, 7, 8, 16-19; Isaías 65:21, 22).
12. Li buchʼutik ta xichʼik ventainel yuʼun li Ajvalilale, ¿kʼuxi ta xtukʼib li snopbenalike xchiʼuk li sbekʼtalike?
12 Li Diose tukʼ la smeltsan li Adán xchiʼuk Evae, tskʼan ox ti akʼo snojesik ta yalab xnichʼnabik li Balumile, ti jech tukʼuk-o sbekʼtalike xchiʼuk li snopbenike. Li kʼusi tskʼan taje ta me xkʼot ta pasel ta melel li ta ventainel yuʼun li Ajvalilale. Sventa jech chkʼot ta pasele, skʼan me chichʼ lajesel skotol li kʼusi chopol yakʼoj tal li mulile, sventa jech taje, li Cristoe maʼuk noʼox me chtun ta Ajvalil, moʼoj, yuʼun chtun ta Mero Bankilal Pale xtok. Oy me smukʼul yoʼonton sventa tskolta li buchʼutik tsventainan ti chchʼunik mantale sventa tstabeik lek sbalil li xkuxlejal ti tstupʼ mulil ti laj yakʼ ta stojolalike.
13. ¿Kʼusitik bendisionetik ta staik li buchʼutik ta xichʼik ventainel yuʼun li Ajvalilale?
13 Li ta Ventainel taje, ta me xichʼik epal kʼupil sba bendisionetik li jnaklejetik ta Balumile. «Jech ta xlic jamuc satic li maʼsatetique; ta xlic jamuc xchiquinic li coquetique. Li coxoetique xbitubajic noʼox liquel jech chac cʼu chaʼal teʼtical chij; xcuxet noʼox yoʼnton tsots chlic qʼuejinicuc li umaʼetique.» (Isaías 35:5, 6.) Li sbekʼtal jun krixchano ti sokem ta skoj li malubele o ta skoj li chameletike, mas to ch-uninaj sbekʼtal ti kʼuchaʼal sbekʼtal jun uni olole, jech ti te noʼox xi j-ip-une ta me xlaj skʼoplal, ta xlekub li jbekʼtaltike. «Li sbecʼtale chlic lecubuc yan velta; chlic sta jech chac cʼu chaʼal ta squeremal onoʼox.» (Job 33:25.) Ta me xkʼot skʼakʼalil ti muʼyuk xa srasonal ti oy buchʼu xi ta xale: «Toj ipun», ti xie. ¿Kʼu yuʼun? Yuʼun li buchʼutik ta xiʼtaik Diose ta me xichʼik koltael lokʼel ta yikatsinel li mulile xchiʼuk li vokoliletik toj kʼux chakʼe (Isaías 33:24; Lucas 13:11-13). Jech, «li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apocalipsis 21:4).
14. ¿Kʼusi to smakoj batel ti chtukʼib sbekʼtal li krixchanoe?
14 Pe ta stael li tukʼilale maʼuk noʼox me smelolal ti chtukʼib li jbekʼtaltike xchiʼuk li jnopbenaltike, yuʼun oy to kʼusi mas smakoj batel. Li kʼusi to smakoje jaʼ ti chkakʼtik lek ta ilel ta jkuxlejaltik li stalelaltak Jeova ti kʼu onoʼox yelan skʼan pasele, yuʼun ta slokʼol spasojutik (Génesis 1:26). Sventa jech chkʼot ta pasele, skʼan ep chkichʼtik chanubtasel. Ta sventa ti «puru tucʼ xa cʼusitic te [oy]» li ta achʼ balumile, «jaʼ to [me] te chchanic cʼusi tucʼ ta pasel li cristianoetique», jech kʼuchaʼal yaloj xa onoʼox Isaiase (2 Pedro 3:13; Isaías 26:9). Li tukʼilal taje jaʼ me tspas ti akʼo oyuk lekilal ta stojolalik li krixchanoetik ti jeltos stsʼunbalike, ta stojolal yamigotakik, yutsʼ yalalik, jech noxtok li kʼusi mas tsots skʼoplale jaʼ me ti lek chil sbaik xchiʼuk li Diose (Salmo 85:10-13; Isaías 32:17). Li buchʼutik chchanik li tukʼilale ta kʼunkʼun me ta x-akʼbat xchanik li kʼusi tskʼan yoʼonton Dios ta stojolalike. Kʼalal ta xchʼi batel mas ta yoʼontonik skʼanel li Jeovae, ta me xakʼ batel ta xkuxlejalik skotol li smantaltak Diose. Jech kʼuchaʼal laj yal li Jesuse xuʼ me jech xi ta xalik eke: «Yuʼun jaʼ ta jpasbe scotol cʼacʼal li cʼusi lec [chil li jTote]» (Juan 8:29). ¡Toj alakʼ me sba li kuxlejal kʼalal mi kʼot skʼakʼalil ti jech ta xichʼ albel skʼoplal skotol li krixchanoetike!
Kʼusitik kʼotemik ta pasel ti xkiltik xae
15. Sventa chaval kaʼitik jlomuk li kʼusitik kʼotem ta pasel yuʼun li Ajvalilale xchiʼuk ti chaval kaʼitik li kʼusitik skʼan ta jpastik li avie, tuneso li sjakʼobiltak ti te oy ta yolon parafoe.
15 Li kʼusitik chkʼot ta pasel yuʼun li Ajvalilal yuʼun Diose xchiʼuk li buchʼutik ta sventainane toj echʼ noʼox me labal sba xchiʼuk xkiltik xa. Li sjakʼobiltak xchiʼuk li tekstoetik te ta olone ta me svules ta joltik li kʼusitik chkʼotanuk ta pasele, xchiʼuk noxtok ta me svules ta joltik jlomuk li kʼusitik xuʼ yuʼunik xchiʼuk ti skʼan spasik avi kʼakʼal li buchʼutik ta xichʼik ventainel yuʼun li Ajvalilale.
Li Ajvalilale, ¿buchʼutik la spas kʼop xchiʼuk li ta baʼyele, xchiʼuk kʼusi kʼot ta pasel? (Apocalipsis 12:7-10, 12.)
¿Buchʼutik skomelaltak yakal ta xichʼ tsobel tal kʼalaluk laj yichʼ chotanel ta ajvalil li Cristoe? (Apocalipsis 14:1-3.)
¿Kʼusi abtelal tspas laj yal Jesús kʼalal mi ilik li tsatsal vokolil kʼuchaʼal chal Mateo 25:31-33?
¿Kʼusi slikeb abtelal yakal ta xichʼ pasel batel li avie? ¿Buchʼutik ta x-abtejik te? (Salmo 110:3; Mateo 24:14; Apocalipsis 14:6, 7.)
¿Kʼu yuʼun muʼyuk bu juʼem yuʼunik ta spajtsanel chol mantal li jkontrainvanej politikoetik xchiʼuk li relijionetike? (Zacarías 4:6; Hechos 5:38, 39.)
¿Kʼusitik sjeloj ta xkuxlejalik li buchʼutik ta xakʼ sbaik ta ventainel yuʼun li Ajvalilale? (Isaías 2:4; 1 Corintios 6:9-11.)
Li Ajvalilal ta Jmil Jabile
16. 1) ¿Kʼu sjalil ch-ajvalilaj li Cristoe? 2) ¿Kʼusitik toj alakʼ sba chkʼot ta pasel yuʼun ti kʼu sjalil ventainele xchiʼuk ti kʼalal echʼem xaʼoxe?
16 Kʼalal tikʼil xaʼox ta xab li Satanás xchiʼuk li spukujtake, li Jesucristo xchiʼuk li 144,000, koʼol ta x-ajvalilajik xchiʼuk chtunik ta paleal jmil jabil (Apocalipsis 20:6). Ti kʼu sjalil taje jaʼo me ta xichʼ lajesel ta sbatel osil li mulil xchiʼuk li lajelal ti laj yiktabutik li Adane, vaʼun ta skoltaik li krixchanoetike sventa chkʼotik ta tukʼil krixchanoetik. Mi laj li Jmil Jabil ventainele, kʼalal tun xaʼox ta Ajvalil xchiʼuk ta Paleal li Mesías ti jaʼ li Jesuse, «chacʼbe ta scʼob Dios Totil scotol li yabtele», «yuʼun jech jaʼ chlic sventain o scotol li Diose» (1 Corintios 15:24-28). Vaʼun ta xichʼ koltael kʼuk yuni jalil li Satanase sventa tspas ta preva skotol li manbil krixchanoetike, sventa jech ta xvinaj mi tukʼik ta stojolal li mukʼta ajvalilal ta vinajel-balumil yuʼun Jeovae. Mi tsuts li slajebal preva taje, li Diose ta me slajes li Satanase xchiʼuk li jtoybaetik ti laj yakʼ sbaik ta stojolale (Apocalipsis 20:7-10). Li buchʼutik chakʼ sbaik ta stojolal li ajvalilal ta vinajel-balumil yuʼun Jeovae —li sderecho ta ajvalilale— jaʼ me jech ta xakʼik ta ilel ti solel tukʼ yoʼontonike. Vaʼun xuʼ me tskʼupinik ti lek ta xil sbaik xchiʼuk li Jeovae; jaʼ jech chkʼotik ta skerem ta stseb, vaʼun xuʼ ta x-akʼbatik xkuxlejalik sbatel osil (Romanos 8:21).
17. 1) ¿Kʼusi chkʼot ta pasel ta stojolal li Ajvalilal mi tsuts li jmil jabile? 2) ¿Kʼusi smelolal ti «muʼyuc bochʼo xuʼ chtuchʼbat yabtel» li Ajvalilale?
17 Jech oxal chaʼa, li yabtel tspas Jesús xchiʼuk li 144,000 ta sventa li Balumile, ta xjel. ¿Kʼusi van ta spasik un chaʼa? Li Vivliae muʼyuk bu ta xalbutik. Pe mi tukʼ koʼontontik chkakʼ jbatik ta stojolal li mukʼta ajvalilal yuʼun Jeovae, kuxulutik me chi jkom li ta slajebal li Ajvalilal ta Jmil Jabile, vaʼun ta me jnaʼtik li kʼusi snopoj tspas Jeova ta sventaik taje xchiʼuk ta sventa li labal sba vinajel-balumil Yuʼune. Vaʼun chaʼa, ¿kʼu yuʼun ta xichʼ alel ti «mu xlaj scʼoplal o» li Ajvalilal yuʼun Cristo ta Jmil Jabile xchiʼuk ti «mu xuʼ chichʼ tuchʼbel o» li Ajvalilal yuʼune? (Daniel 7:14.) Jun srasonal ti jeche, jaʼ ti maʼuk ch-och ajvalilajuk krixchanoetik ti jeltostik kʼusi tskʼan yoʼontonike, yuʼun jaʼ stuk Jeova ti buchʼu ch-ajvalilaje. Jech noxtok, li Ajvalilale «muʼyuc bochʼo xuʼ chtuchʼbat yabtel», taje jaʼ smelolal ti yuʼun te oy-o sbatel osil li kʼusitik chkʼot ta pasel yuʼune (Daniel 2:44). Jech noxtok, li Ajvalil, li Pale Mesiase xchiʼuk li yan ajvaliletik xchiʼuk paleetik eke ta xichʼik tsakel ta mukʼ sbatel osil ta skoj li tukʼil abtel la spasik ta stojolal Jeovae.
Svulesobil ta joltik
• ¿Kʼu yuʼun jaʼ noʼox li Ajvalilal yuʼun Dios xuʼ chakʼbe slajeb li svokoltak krixchanoetike? ¿Bakʼin ilik ventainvanuk ta Ajvalilal yuʼun Dios li Ajvalile?
• ¿Kʼusitik yabtel Ajvalilal yuʼun Dios xchiʼuk ti kʼusi chkʼot ta pasel yuʼun ti mas chkʼot ta avoʼontone?
• ¿Kʼusitik ti xkiltik xa kʼotem ta pasel yuʼun li Ajvalilale, xchiʼuk kʼusi kabteltik ta jpastik ek?
[Lokʼol ta pajina 93]
Li ta Ajvalilal yuʼun Diose skotolik me chchanik li tukʼilale