XCHANOBIL 6

Tukʼ chakʼ sba li Jobe

Li Satanase chchibal kʼoptabe ta stojolal Dios li stukʼil yoʼonton Jobe, pe li stuke tukʼ-o yoʼonton ta stojolal Jeova

¿MI XUʼ van tukʼ chakʼ-o sba ta stojolal Dios junuk yajtunel mi tsnuptan tsatsal vokoliletik, akʼo mi muʼyuk kʼusi sbalil tstabe yileluke? Jun vinik ti Job sbie, jech ikʼot ta stojolal. Jkʼeltik kʼusi kʼot ta pasel.

Li Jobe jaʼ yutsʼ yalal sbaik xchiʼuk Abraham ti te toʼox nakal ta jun lum ti Arabia sbi avie, jaʼo kʼalal te nakalik ta Egipto li j-israeletike. Jun kʼakʼale te la stsob sbaik ta yeloval Dios li anjeletike, te oy ek li jtoyba Satanase. Vaʼun li Jeovae la skʼupil kʼoptabe li stukʼil yoʼonton Jobe. Jech, laj yal ti muʼyuk buchʼu yan jech tukʼ yoʼonton kʼuchaʼal stuke. Pe li Satanase laj yal ti jaʼ noʼox la chtun ta stojolal Dios ta skoj ti oy kʼusitik ch-akʼbate xchiʼuk ti chchabiate. Laj yal ta melel ti mi pojbat li kʼusitik oy yuʼune, ta la svalopatin komel li Jeovae.

Te stsoboj sbaik ta vinajel li anjeletik ta stojolal Diose xchiʼuk te oy ek li Satanase

Li Diose laj yakʼ akʼo spojbe skotol li kʼusitik oy yuʼun Job li Satanase, ta tsʼakale la smilbe li xnichʼnabtake xchiʼuk akʼbat xchamel li Jobe. Ta skoj ti mu snaʼ mi jaʼ Satanás buchʼu chakʼ li vokoliletike, li Jobe mu xaʼibe smelolal kʼu yuʼun ti jech chakʼ kʼotuk ta pasel li Diose. Akʼo mi jech, muʼyuk la svalopatin komel li Jeovae.

Vaʼun tal vulaʼanatuk oxib yamigotak ta alel li Jobe xchiʼuk lik yalbeik mantal. Li ta mantaletik laj yalike, ti jaʼ chalbe skʼoplal jutuk mu skotoluk li ta slivroal Jobe, tskʼanik ox ti akʼo xchʼun ti jaʼ yakal ch-akʼbat stoj smul yuʼun Dios ta skoj ti oy la snakʼoj smule. ¡Mu jechuk ta melel maʼ taje! Kapal laj yalik xtok ti Diose mu la sventauk li yajtuneltake xchiʼuk mi jaʼuk la spatoj yoʼonton ta stojolal li krixchanoetike. Pe li Jobe muʼyuk la xchʼun li kʼusi laj yalike xchiʼuk laj yal ti tukʼ-o chakʼ sba ta stojolal Dios jaʼ to mi chame.

Manchuk mi jech, li Jobe la spas smul yuʼun jaʼ bat tajek ta yoʼonton tspak skʼoplal stuk. Jun kerem ti Eliú sbie, ti te laj yaʼi skotol li loʼile, la stukʼibtas Job ta skoj ti jaʼ mas bat ta yoʼonton spakel skʼoplal stuke, ti mu jaʼuk li sbi xchiʼuk ti jaʼ Jpas mantal li Jeovae. Xchiʼuk xtok, tsots mantal laj yakʼbe li jecheʼ yamigotak Jobe.

Ta slajebe, jaʼ stuk Jeova la stukʼibtas li Jobe. La stunes li kʼusitik labalik sba pasbil sventa chakʼbe yil ti toj bikʼit li krixchano kʼalal chichʼ koʼoltasel xchiʼuk li smukʼulal Diose. Li Jobe bikʼit laj yakʼ sba xchiʼuk la xchʼam li tukʼibtasele. Li Jeova ti «oy slequil yoʼnton, [ti] jaʼ stalel Jcʼuxubinvanej[e]», la xpoxtabe li xchamele xchiʼuk chib to velta yepal laj yakʼbe skʼulejal xchiʼuk lajunvoʼ to xnichʼnab xtok (Santiago 5:11). Li stukʼil yoʼonton Jobe jpʼel-o la stakʼbe li kʼusi la xchibal kʼopta Satanase xchiʼuk sventa chakʼ ta ilel ti xuʼ tukʼ yoʼonton chakʼ sba li krixchanoetike akʼo mi tsots svokolik.

(Lokʼem ta slivroal Job.)

LI KʼUSI LAJ YICHʼ CHIBAL KʼOPTAEL TI MAS TSOTS SKʼOPLALE

Li ta skʼakʼalil taje li Jobe jaʼ toʼox li yajtunel Dios ti mas tukʼ yoʼonton ta Balumile. Jaʼ yuʼun kʼalal laj yal Satanás ti jaʼ noʼox chchʼunbe smantal Dios ta skoj ti oy kʼusi ch-akʼbat li Jobe, la yakʼ ta aʼyel xtok ti skotol li krixchanoetike —xchiʼuk li anjeletike— jaʼ noʼox ta xtunik ta stojolal Dios mi oy kʼusi ch-akʼbatike. Ta melel, li kʼusi laj yal taje te tsakal skʼoplal li kʼusi la xchibal kʼopta Satanás ta Paraisoe, jaʼ xkaltik, mi oy s-derecho ch-ajvalilaj li Jeovae, mi tukʼ xchiʼuk mi lek ti jech tspase. Li slivroal Jobe chakʼ ta ilel ti skotol buchʼu tukʼ chakʼ sba ta stojolal Diose chakʼ ta ilel ti oy ta stojolal Jeova ta sventa li kʼusi laj yichʼ chibal kʼoptaele.