¿Mi ta melel likem tal ta stojolal Dios li lekil aʼyejetike?

1. ¿Buchʼu la spas li Vivliae?

Li lekil aʼyej ti chijkuxi sbatel osil liʼ ta balumile te ta jtatik ta Vivlia (Salmo 37:29). Li Vivliae yichʼoj 66 bikʼtal livroetik ti te van 40 tukʼil viniketik la stsʼibaik ti tʼujbilik yuʼun Diose. Li baʼyel voʼob livroetike oy xa ta 3,500 jabil la stsʼiba li Moisese. Li slajeb livroe oy xa ta 1,900 jabil la stsʼiba li jtakbol Juane. Li aʼyejetik oy ta Vivliae likem tal ta stojolal Dios. Li stuke laj yakʼbe snaʼ ta xchʼul espiritu li jtsʼibajometike (2 Samuel 23:2). Li jtsʼibajometike maʼuk la stsʼibaik li kʼusi tsnop stukike jaʼ la stsʼibaik li kʼusi tsnop Diose. Jaʼ yuʼun, li buchʼu la spas Vivliae jaʼ li Jeovae. Kʼelo 2 Timoteo 3:16; 2 Pedro 1:20, 21.

Kʼelo li video ¿Buchʼu la spas li Vivliae?

2. ¿Kʼu yuʼun xuʼ jchʼuntik ti melel li kʼusi chal Vivliae?

Yuʼun likem tal ta stojolal Dios xchiʼuk lek jamal chal li kʼusi chkʼot ta pasel ta tsʼakale, taje mi junuk krixchano jech spas yuʼun (Josue 23:14). Jaʼ noʼox spas yuʼun li Dios ti skotol xuʼ yuʼune. Kʼelo Isaías 42:9; 46:10.

Mi ta stojolal Dios likem tal li Vivliae, jaʼ skʼan xal ti stuk noʼox jeche. Li Vivliae ta smiyonal noʼox pukbil ta jeltos kʼopetik. Akʼo mi voʼne xa laj yichʼ tsʼibael, koʼol kʼusi chal xchiʼuk li kʼusitik staojik ta chanel li sientifikoetike. Li jtsʼibajometik xtoke muʼyuk tskontrain sba li kʼusi la stsʼibaike.a Li Vivliae oy-o sjuʼel avi sventa tsjelbe xkuxlejal li krixchanoetik xchiʼuk te chvinaj ti kʼanvanem li Diose. Ta skoj taje, ta smiyonal noʼox krixchanoetik xchʼunojik lek ti jaʼ Skʼop Dios li Vivliae. Kʼelo 1 Tesalonicenses 2:13.

Kʼelo li video ¿Kʼu yuʼun xuʼ jchʼuntik ti melel kʼusi chal li Vivliae?

3. ¿Kʼusi chalbe skʼoplal li Vivliae?

Li Vivliae chalbe skʼoplal lekil aʼyejetik. Chalbe skʼoplal li kʼusi tskʼan tspas Dios ta stojolal li krixchanoetike. Chal kʼuxi chʼay yuʼun krixchanoetik li jun matanal ti xuʼ xkuxiik ta jun paraisoe. Jech xtok, chalbe skʼoplal ti kʼu yelan chchaʼmeltsaj li paraisoe. Kʼelo Apokalipsis 21:4, 5.

Li Skʼop Diose yichʼoj mantaletik, beiltaseletik xchiʼuk tojobtaseletik. Jech xtok, te chalbutik kʼu yelan ch-ilatik yuʼun Jeova li krixchanoetike, te chkakʼtik venta kʼu yelan li stalelale. Jaʼ yuʼun, li Vivliae tskoltautik ta yojtikinel li Diose. Jech xtok, chchanubtasutik kʼuxi xuʼ xijkʼot ta yamigo. Kʼelo Salmo 19:7, 11; Santiago 2:23; 4:8.

4. ¿Kʼusi xuʼ skoltautik sventa xkaʼibetik smelolal li Vivliae?

Sventa xalbe ‹smelolal Tsʼibetik› li Jesuse, laj yalbe skʼoplal tekstoetik xchiʼuk la sjambe smelolal. Li foyeto liʼe tskoltautik ta yaʼibel lek smelolal li chanubtaseletik ta Vivlia eke. Kʼelo Lucas 24:27, 45.

Jnaʼojkutik lek ti chakʼupin xchanbel mas skʼoplal li lekil aʼyejetik yakʼoj Diose. Akʼo mi jech, mu skotoluk krixchanoetik oy ta yoʼontonik, li yan xtoke ch-ilinik-o mi laj avalbe ta sventa li Vivliae. Pe mu xavakʼ xchibajes avoʼonton li krixchanoetike. Yuʼun li Vivliae chal ti xuʼ xkuxiik sbatel osil li buchʼutik chchanik ta sventa Diose. Kʼelo Juan 17:3.