Nopajanik ta stojolal Dios sventa xamuyubaj ta anupunelik

Jaʼ laj yakʼ nupunikuk baʼyel vinik xchiʼuk baʼyel ants li Jeovae.a Chal Vivlia ti jaʼ la spas Jeova li baʼyel antse, vaʼun «te la svaʼan ta stojol li vinique». Jaʼ yuʼun xi xmuyubaj tajek laj yal li Adane: «Liʼi jaʼ jbecʼtal; jaʼ jbaquil» (Génesis 2:22, 23). Oy-o ta yoʼonton Jeova ti jechuk-o xmuyubajik li nupultsʼakaletik avie.

Xuʼ van snopik li krixchanoetik ti xmuyubajik noʼox ta jyalel kʼalal chnupunike. Pe bu chata, oy onoʼox vokolil, manchuk mi solel skʼanoj sbaik ta jyalel (1 Korintios 7:28). Pe mu xavat avoʼonton, oy beiltaseletik ta Vivlia li ta foyeto liʼe, ti jaʼ tskoltautik sventa xijmuyubaj xchiʼuk jnup jchiʼiltik xchiʼuk kutsʼ kalaltik mi ta jchʼuntik li kʼusi chale (Salmo 19:8-11).

1 PASO ME LI KʼUSI ABAINOJ YUʼUN JEOVAE

LI KʼUSI CHAL VIVLIAE: Jaʼ jolil ta utsʼ alalil li malalile (Efesios 5:23).

Mi malalilote chalbot Jeova ti akʼo xakʼel xchiʼuk xakʼuxubin li avajnile (1 Pedro 3:7). Yuʼun jaʼ la spas sventa tskoltaot, jaʼ yuʼun chalbot ti xavichʼ ta mukʼe xchiʼuk ti xakʼane (Génesis 2:18). Jaʼ yuʼun chaʼa, li buchʼu skʼanoj tajek yajnile jaʼ me mas toj tsots skʼoplal chaʼi li kʼusi oy ta yoʼonton yajnile, maʼuk li kʼusi tskʼan stuke (Efesios 5:25-29).

Mi ajnilalote chalbot Jeova ti akʼo xavichʼ ta mukʼ ta sjunul avoʼonton li amalale xchiʼuk ti xakolta ta spasel li kʼusi sbainoje (1 Korintios 11:3; Efesios 5:33). Ta slekiluk avoʼonton xakolta ta spasel li kʼusi tsnop tspase (Kolosenses 3:18). Kʼalal jaʼ jech tspas li antse batsʼi ep sbalil ch-ilat yuʼun smalal xchiʼuk li Jeovae (1 Pedro 3:1-6).

LI KʼUSI SKʼAN XAPASE:

• Jakʼbo anup achiʼil kʼusi skʼan xapas sventa masuk xlekub atalelal kʼuchaʼal malalil o ajnilal. Tsʼetanbo lek xchikinal li kʼusi chale, vaʼun akʼbo yipal ta spasel

• Oyuk me smalael avuʼun, yuʼun mu ta orauk ti chkaʼibetik lek smelolal li kʼusi oy ta yoʼonton jnup jchiʼiltike

2 TSOTSUK SKʼOPLAL XAVAʼI LI KʼUSI OY TA YOʼONTON ANUP ACHIʼILE

LI KʼUSI CHAL VIVLIAE: Skʼan me tsotsuk skʼoplal xavaʼi ta melel li kʼusi oy ta yoʼonton anup achiʼile (Filipenses 2:3, 4). Mu me xavutilan li anup achiʼile, vuleso me ta ajol ti tskʼan Jeova ti akʼo ‹lekuk noʼox koʼontontike› (2 Timoteo 2:24). Nopo baʼyuk ti kʼusi chavale, yuʼun xi chal li Vivliae: «Oy buchʼu xmichʼet xa ta xcom oʼntonal yuʼun ti cʼusi ta xale, jaʼuc scʼopojel ti buchʼu oy sbijile, siquet xa ti banomil yuʼune» (Proverbios 12:18, Ch). Jaʼ me tskoltaot li xchʼul espiritu Jeova sventa oyuk slekil yutsil li akʼopojele (Galatas 5:22, 23; Kolosenses 4:6).

LI KʼUSI SKʼAN XAPASE:

• Kʼalal mu to chavalbe anup achiʼil li kʼusitik toj tsots skʼoplale kʼanbo Jeova ti akʼo mu xkap ajole xchiʼuk ti mu me chopoluk kʼusi xanop ta anile

• Nopo lek kʼusi chaval xchiʼuk kʼuxi chaval

3 JMOJUK ME XA-ABTEJIK

LI KʼUSI CHAL VIVLIAE: «Tspas ta jun sbekʼtalik» li vinik xchiʼuk ants kʼalal chnupunike (Mateo 19:5). Akʼo mi jech, oy onoʼox me bu ti jelel snopbenike. Jaʼ yuʼun, toj tsots skʼoplal ti akʼo jmojuk oyoxuk ta sventa li kʼusi chanopike xchiʼuk li kʼusi oy ta avoʼontonike (Filipenses 2:2). Toj tsots me skʼoplal ti jmoj xanopik li kʼusi chapasike. Yuʼun xi chal li Vivliae: «Li cʼusi ta jnoptique ta xcʼot ta pasel ti me lec nopbile» (Proverbios 20:18). Jech oxal chaʼa, skʼan me xatsakik ta venta li kʼusi chal beiltaseletik ta Vivlia sventa lek xkʼot ta nopel avuʼunik li kʼusitik toj tsots skʼoplal chapasike (Proverbios 8:32, 33).

LI KʼUSI SKʼAN XAPASE:

• Mu me jpʼelchaʼpʼeluk noʼox xachiʼin abaik ta loʼil, albo me abaik li kʼusi oy ta avoʼontonike

• Skʼan me baʼyuk xajakʼbe anup achiʼil mi oy kʼusi chavakʼ ave ta spasele