La xchiʼin yol li tojol tseb Mariae

Stsakoj xa xchanibal u xchiʼuk yol li Mariae. Kʼuchaʼal laj xa jchantike, kʼalal te toʼox chib oxibuk u xchiʼuke, ay svulaʼan Elisabet ti te nakal ta sural svitstikaltik Judeae. Pe li avi une te xa oy ta sna ta Nasaret li Mariae. Poʼot xa xil krixchanoetik ti xchiʼuk yole. ¿Mi xnop xa noʼox kuʼuntik ti kʼu to yelan tsvul-o yoʼonton li Mariae?

Li kʼusi mas to chopole jaʼ ti makbil xa yuʼun jun karpintero ti Jose sbie, ti te nakal eke. Yuʼun snaʼoj lek Maria li kʼusi chal Smantal Dios ti akʼbatik j-israeletike, ti skʼan xichʼ milel ta ton li jun ants ti makbil xa mi chchiʼin ta vayel yan vinike (Deuteronomio 22:23, 24). Manchuk mi muʼyuk spasoj smul li Mariae, ta van xat yoʼonton ta sventa ti kʼuxi chalbe Jose ti xchiʼuk yole xchiʼuk ti kʼusi xuʼ xkʼot ta pasele.

Ta skoj ti oy xa ta oxib u muʼyuk xil Maria li Josee, oy van tajek ta yoʼonton tskʼel yaʼi. Kʼalal laj yil sbaike, laj yalbe Jose ti xchiʼuk yol li Mariae, xchapet lek laj yalbe ti xchiʼuk yol ta sventa sjuʼel li xchʼul espiritu Diose. Jnoptik avaʼi ti tsots van chaʼi Jose taje xchiʼuk ti mu chʼunbaj chaʼie.

Snaʼoj lek Jose ti jaʼ jun lekil tseb li Mariae, ti lek skʼoplale xchiʼuk ti skʼanoj tajeke. Manchuk mi lek la xchapbe smelolal li Mariae, laj van snop Jose ti oy buchʼu la xchiʼin ta vayel sventa xchiʼin yole. Pe mu skʼan ti smilik ta ton li Mariae xchiʼuk ti xakʼik ta kʼexlale, jaʼ yuʼun la snop tsutes-o ta mukul. Li vaʼ kʼakʼale xkoʼolaj xa kʼuchaʼal nupunem chilik li jun kerem xchiʼuk jun tseb kʼalal smakoj xa sbaike, jaʼ yuʼun skʼan sutes-o sbaik mi chtuchʼ skʼopike.

Vaʼun kʼalal yakal tsnopbe skʼoplal Jose li svokol taje och svayel. Laj yakʼ sba ta ilel ta xvayich li yaj-anjel Jeovae, xi albate: «Mu xaxiʼ ta yikʼel batel ta ana li avajnil Mariae, yuʼun li yol xchiʼinoje jaʼ ta sventa chʼul espiritu. Ta svokʼes jun kerem, Jesus chavakʼbe sbi, yuʼun jaʼ tskolta lokʼel ta mulil li steklumale» (Mateo 1:20, 21).

Kʼalal julav li Josee xmuyubaj tajek ta skoj ti laj xa yaʼibe lek smelolale. Jaʼ yuʼun, la spas ta anil li kʼusi albat yuʼun anjele, laj yikʼ batel ta sna li Mariae. Kʼalal jech la spas li Jose xchiʼuk Mariae jaʼ sventa xil skotol krixchanoetik ti yuʼun nupunik xae. Akʼo mi jech, li Josee muʼyuk la xchiʼin ta vayel Maria ti kʼu sjalil xchiʼuk Jesuse.

Kʼalal echʼ jayibuk ue, oy bu nom chbatik li Jose xchiʼuk Maria kʼalal poʼot xa xvokʼ li yole, jaʼ yuʼun skʼan xchapan sbaik sventa xlokʼik batel li ta snaik ta Nasarete. Ta skoj ti yual xa tajek li Mariae, ¿bu xa noʼox chbatik ti toj tsots skʼoplale?