Labalik sba kʼusitik la spas ta Kapernaum li Jesuse

Vaʼun li Jesuse laj xa stak ta ikʼel li chanvoʼ yajchankʼoptak sventa saʼik krixchanoetik jech kʼuchaʼal tsaʼik choye. Taje jaʼik li Pedroe, li Andrese, li Santiagoe xchiʼuk li Juane. Li avi une jaʼ xa skʼakʼalil Savado, jaʼ yuʼun bat skotolik ta nail tsobobbail ta Kapernaum. Te lik chanubtasvanuk li Jesuse, jaʼ jech toj labal sba laj yilik yan velta krixchanoetik ti kʼu yelan chchanubtasvane. Yuʼun vinaj ti tsots yabtel ti kʼu yelan chchanubtasvane, mu jechuk kʼuchaʼal li jchanubtasvanejetik ta Mantale.

Li vaʼ kʼakʼale te oy jun vinik ti uʼuninbil yuʼun pukuje. Te tsots x-avet ta nail tsobobbail, xi chale: «¿Kʼusi chasaʼ liʼ eke, Jnasaretal Jesus? ¿Mi yuʼun tal alajesunkutik? ¡Lek xakojtikin buchʼuot, voʼot li Buchʼu chʼul yuʼun Diose!». Vaʼun li Jesuse la stsak ta utel li pukuj ti ochem ta stojolal li vinik taje, xi laj yalbee: «¡Anchan, lokʼan ta stojolal li vinike!» (Markos 1:24, 25).

Vaʼun la sten ta lum vinik li pukuj ti toj chopol taje, la slikesbe stupʼ-ikʼ xchiʼuk xvikiket ta jyalel. Lokʼ ta stojolal vinik li pukuje, pe «muʼyuk la syayijes» (Lukas 4:35). ¡Batsʼi toj labal xa noʼox sba laj yilik li krixchanoetik ta nail tsobobbaile! Xi laj yalike: «¿Kʼusi xa noʼox leʼe? [...] Yuʼun kʼalal ta ibal sba pukujetik tsots chakʼbe mantal xchiʼuk chchʼunbat smantal» (Markos 1:27). Vaʼun ta anil noʼox puk batel skʼoplal ta buyuk noʼox ta sjunul yosilal Galilea li kʼusi labal sba kʼot ta pasele.

Te une lokʼik batel ta nail tsobobbail li Jesus xchiʼuk li yajchankʼoptake, te batik ta sna Simon ti Pedro sbi xtoke. Te la stabeik li smeʼniʼ Simon ti tsots ip ta kʼokʼe. Lik skʼanbeik vokol Jesus ti akʼo skoltae. Te une nopaj batel, la stsakbe skʼob xchiʼuk la snit likel. ¡Ta ora noʼox poxtaj! Vaʼun lik skʼel li smeʼniʼ Simon kʼusi chtun yuʼunik li Jesus xchiʼuk yajchankʼoptake, xuʼ van lik smeltsan veʼlil sventa xveʼik.

Vaʼun kʼalal chchʼay xaʼox batel Kʼakʼale, ep buchʼutik laj yikʼ tal yajchamelik ta sna li Pedroe. Ta ora noʼox la stsob sbaik yaʼel sjunul jteklum ta mero tiʼ na. ¿Kʼu yuʼun? Yuʼun tskʼanik poxtael. Ta melel, «skotol li buchʼutik oy yajchamelike laj yikʼbeik tal ta stojolal, kʼusiuk noʼox chamelal ti ip chaʼiike. Kʼalal la skajan skʼob ta sba li buchʼutik ipike, kolik» (Lukas 4:40). Jech onoʼox kʼuchaʼal albil skʼoplale, la xpoxta jchameletik li Jesuse, mu ventauk ti kʼusi ip chaʼiike (Isaías 53:4). Maʼuk noʼox taje, yuʼun lokʼ pukujetik ta stojolal li buchʼutik uʼuninbilike. Vaʼun kʼalal lokʼ li pukujetik ti toj chopole, xi tsots avanike: «Voʼot Xnichʼonot li Diose» (Lukas 4:41). Pe lajik ta utel yuʼun li Jesuse, mukʼ xa x-akʼat xkʼopojik. Snaʼojik ti jaʼ Kristo li Jesuse. Akʼo mi jech, muʼyuk xakʼ ti akʼo xloʼlavanik ti chtunik xa ta stojolal Dios yilele.