¿Kʼusi ta jpas mi chilbajinikun o tslabanikun li ta eskuelae?

LI VOʼOTE, ¿KʼUSI VAN CHAPAS?

Nopo ta sventa liʼe: Li Tomase mu skʼan xbat ta eskuela li avie. Mi jaʼuk li okʼobe, yuʼun mu xa skʼan xbat-o. Leʼ xa onoʼox ta yoxibal u lik talele, taje jaʼ ta skoj ti oy kʼusitik albat ta stojolale xchiʼuk ti mu meleluke. Vaʼun ta tsʼakale chopolik tajek laj yakʼbeik yixtol bi. Bakʼintike yalel xa ch-echʼ xujik Tomás sventa xpʼaj li slivrotake. Bakʼintik xtoke, oy buchʼu chujat ta spat, vaʼun kʼalal chjoypʼije muyuk xa kʼusi tspasik yilel. Li voljee mas to tsatsaj li svokole yuʼun laj yichʼ takbel batel jun mensaje ta Internet sventa tsibtasat...

Ti voʼotuk li Tomase, ¿kʼusi van laj apas?

NOPO ME LEK

Oy kʼusi xuʼ xapas. Xuʼ xapak akʼoplal pe mu persauk ta majel. ¿Kʼu yelan?

• MU XATSAK TA VENTA. Xi chal li Vivliae: «Li bochʼo bole mu xuʼ yuʼun spajesel li scʼacʼal yoʼntone; yan li bochʼo tucʼ yoʼntone xuʼ yuʼun tspajes sba» (Proverbios 29:11). Mi muʼyuk kʼusi laj aval jpʼeluk akʼo mi te xtiʼet li ajole, xuʼ van xlubik li buchʼutik chilbajinote, vaʼun muʼyuk xa chayutilanoxuk.

• MU XAPAK AKʼOPLAL. Xi chal li Vivliae: «Mu me chopoluk kʼusi xapakbe abaik sutel» (Romanos 12:17). Mi chapak sutele jaʼ noʼox me mas tstsatsaj-o li kʼope.

• JATAVAN MI STA-OE. Xi chal li Vivliae: «Li bochʼo bije ta xil li cʼusi xiʼbal sbae, jech mu xbat sticʼ sba te» (Proverbios 22:3). Mi xuʼ chavile, jatavan ta stojolal li j-ilbajinvanejetike xchiʼuk li bu xibal sba chavile.

• LABALUK TO XAʼIIK TI KʼU YELAN CHATAKʼAVE. Xi chal li Vivliae: «Li cʼunil tacʼovele jaʼ tspajes li cʼacʼal oʼntonale» (Proverbios 15:1). O xuʼ van xatunes ixtol loʼil. Jech kʼuchaʼal liʼe, mi oy junuk j-ilbajinvanej ti chalbot ti toj jupʼemote, xuʼ van xi xa takʼbee: «Jech onoʼox, skʼan xi yal jun chibuk kilo jnaʼ».

• JATAVAN. Nora, ti 19 sjabilale, xi chale: «Kʼalal muʼyuk chatakʼe, jaʼ me te chvinaj ti xanaʼ xa snopele, ti mu xanaʼ xa xiʼe xchiʼuk ti xanaʼ xapajes abae, pe ti mu spas yuʼunik jech li stukike» (2 Timoteo 2: 24).

• PATO MAS AVOʼONTON TA ATOJOLAL. Li buchʼutik ch-ilbajinvanike, chakʼik venta mi muʼyuk jbalil chkaʼi jbatike xchiʼuk mi muʼyuk ta jpak jkʼoplaltike. Pe akʼo mi jech, mi chilik ti muʼyuk chavakʼ aba ta tsalele jaʼ me jech muʼyuk xa chilbajinoxuk.

• ALBO TI BUCHʼU MAS LEK CHAVILE. Jun ants ti maestra toʼoxe xi chtojobtasvane: «Li kʼusi mas leke jaʼ ti xichʼ tikʼbel smul li buchʼu ch-ilbajinvane. Jaʼ li kʼusi skʼan xichʼ pasele xchiʼuk jaʼ sventa mu jechuk spasbeik li yantike».