La smil yitsʼin ta skoj skapemal sjol

Kʼalal lokʼemik xa ox ta nichimaltik Eden li Adan xchiʼuk Evae, laj yil yalab xnichʼnabik. Li sba skeremike Kain sbi, jaʼ yabtel stsʼunel itajetik xchiʼuk sat teʼetik. Li xchibal skeremike Abel sbi, li stuke jaʼ jchabichij.

Jun velta li Kain xchiʼuk Abele, laj yakʼbeik smoton li Jeovae. ¿Mi xanaʼ kʼusi ti laj yakʼbeike? Jaʼ jun matanal ti toj tsots skʼoplal ti jaʼ noʼox chichʼ akʼbel li Jeovae. Pe li Jeovae jaʼ lek laj yil li matanal laj yakʼ Abele, jaʼ muʼyuk lek laj yil li matanal laj yakʼ Kaine. Jaʼ yuʼun, li Kaine ilin tajek. Vaʼun, albat yuʼun Jeova ti mi te ilinem-oe, xuʼ oy kʼusi chopol spas. Pe muʼyuk la xchʼun li kʼusi albate.

Jaʼ yuʼun, li Kaine xi laj yalbe li yitsʼine: «Batik ta paxyal ta osiltik». Kʼalal te xa ox oyike, la stsak ta majel li yitsʼine, vaʼun la smil. ¿Kʼusi van la spas li Jeovae? Laj yakʼbe kastigo li Kaine, yuʼun la stak batel ta namal balumil xchiʼuk albat ti muʼyuk xa bu tsut skʼel li yutsʼ yalale.

¿Kʼusi chakʼ jchantik taje? Kʼalal oy kʼusi muʼyuk lek chbat ta pasel kuʼuntike, xuʼ van xij-ilin. Pe mi chkakʼtik venta ti chij-iline o mi oy buchʼu chalbutik ti yakal xa chkap joltike, skʼan me xlekub noʼox koʼontontik ta anil sventa mu spasutik ta kanal li skapemal joltike, yuʼun mi la spasutik ta kanale, toj me chopol.

Li Abele lek la spas sba, yuʼun skʼanoj tajek li Jeovae. Jaʼ yuʼun, li Jeovae muʼyuk xchʼayoj ta sjol li Abele xchiʼuk ta xchaʼkuxes kʼalal mi la spas ta paraiso spʼejel li balumile.