XCHANOBIL 5
Tsmeltsan arka li Noee
Ta mas tsʼakale, lik epajuk li krixchanoetik ta balumile. Pe jutuk mu skotolikuk toj chopolik. Xchiʼuk oy junantik anjeletike la stoy sbaik, yuʼun laj yiktaik li vinajel sventa xtalik li ta balumile. ¿Mi xanaʼ kʼu yuʼun? Yuʼun tal spas sbaik ta krixchanoetik sventa xikʼik li antsetike.
Li anjeletik taje laj yil xnichʼnabik xchiʼuk li antsetik ti laj yikʼike. Kʼalal chʼiik xa ox talel li xnichʼnabike, toj echʼ xa noʼox tsotsik xchiʼuk toj echʼ xa noʼox tsaʼik kʼop. Pe li Jeovae muʼyuk laj yakʼ ti jechuk-o spasike. Jaʼ yuʼun, la snop ti tslajes ta jun nojelal ta voʼ li chopol krixchanoetike, noj ta voʼ spʼejel li balumile.
Pe oy jun vinik ti toj jelel tajek xchiʼuk li yan krixchanoetike. Yuʼun li stuke skʼanoj tajek li Jeovae, jaʼ sbi Noe. Oy yajnil xchiʼuk oy oxib skeremtak, jaʼ Sem, Kam xchiʼuk Jafet. Naka oy xa yajnilik. Li Jeovae laj yalbe Noe ti akʼo smeltsan jun arka ti pasbil ta teʼe, taje xkoʼolaj kʼuchaʼal jun mukʼta kaxa ti xuʼ xkajet chanav ta sba voʼe. Taje jaʼ sventa te x-ochik li Noe xchiʼuk yutsʼ yalal sventa kuxul xkomik li ta Nojelal ta voʼe. Li Jeova xtoke laj yalbe Noe ti akʼo stikʼ ochel epal chonbolometik sventa kuxul xkomik eke.
Li Noe xchiʼuk yutsʼ yalale ta anil noʼox lik smeltsanik li arkae. Te van 50 jabil laj yichʼ yuʼunik. Jaʼ jech la smeltsanik jech kʼuchaʼal laj yal li Jeovae. Ti kʼu sjalil taje, li Noee la xchol mantal xchiʼuk laj yalbe krixchanoetik ti chtal nojelal ta voʼe. Pe muʼyuk buchʼu la xchʼun.
Avie, sta xa yorail ti ch-ochik ta arkae, ¿mi chakʼan chanaʼ kʼusi chkʼot ta pasel?
«Jech kʼuchaʼal kʼot ta pasel ta skʼakʼalil Noee, jaʼ jech chkʼot ta pasel ek kʼalal liʼ xa oy li Xnichʼon krixchanoe» (Mateo 24:37).