XCHANOBIL 8
La xchʼunbeik smantal Jeova li Abraan xchiʼuk Sarae
Oy jun lum ti nopol xil li mukʼta lum Babele, jaʼ sbi Ur. Li krixchanoetik tee chichʼik ta mukʼ epal jecheʼ diosetik. Pe li ta Ure oy jun vinik ti chichʼ ta mukʼ li Jeovae. Li vinik taje jaʼ sbi Abraan.
Li Jeovae xi laj yalbe li Abraane: «Komtsano avosil xchiʼuk avutsʼ avalaltak jaʼ te xabat ti bu chkakʼbot avile». Vaʼun, li Jeovae xi to jamal laj yalbe li Abraane: «Voʼot ta aventa ta jlikes jun muk’ta lum xchiʼuk jaʼ ta aventa chkakʼbe kʼusitik lekik li krixchanoetik ta spʼejel balumile».
Li Abraane mu snaʼ bu chtakatik batel yuʼun li Jeovae. Akʼo mi jech, la spat yoʼonton ta stojolal Jeova. La xchʼunbeik smantal Dios li Abraan xchiʼuk Sarae, jaʼ jech la spas li stot Abraan ti Tare sbie xchiʼuk li xjunichʼon ti Lot sbie. Jaʼ yuʼun, la xchapanik li kʼusitik oy yuʼunike xchiʼuk batik ti bu albatike.
Li Abraane 75 xa ox sjabilal kʼalal kʼotik xchiʼuk yutsʼ yalal li ta lum ti bu albatik yuʼun li Diose. Li lum taje jaʼ sbi Kanaan. Kʼalal te xa ox oyike, xi albat yuʼun li Jeovae: «Li balumil liʼ chavile jaʼ ta xkakʼbeik li amomnichʼnabtake». Pe li Abraan xchiʼuk Sarae ep xa sjabilalik xchiʼuk chʼabal yalab xnichʼnabik. Vaʼun chaʼa, ¿kʼuxi chkʼot ta pasel li kʼusi laj yal Jeovae?
«Ta skoj xchʼunel yoʼonton [Abraan] la xchʼun mantal, yuʼun lokʼ batel sventa oy bu chbat ti jaʼ ch-akʼbat kʼuchaʼal xrextoe; akʼo mi mu snaʼ ti bu chbate, bat onoʼox» (Ebreos 11:8).